Hosea 10 - Baibuli Ekibono kya Katonda 2014

¹ Abaisiraeli bali ng'oti n'omuzabbibu ogubala emizabbibu kamaala. Ye baakoma okweyongera obungi, ye baakoma n'okuzimba alutaari enhingi. Era ensi yaibwe ye yakoma okweyongera okuba enungi, ye baakoma n'okulungiya empango dh'amabaale dhe baasinzanga.

² Bali n'emyoyo emiguyaguya. Kale ni buti bali n'okubonerezebwa olw'ebibi byaibwe. Musengwa Katonda alimenhagho alutaari dhaibwe, era yaazikiriza empango edh'amabaale dhe basinza.

³ Abantu abo balikoba bati: “Tuzira kyabazinga kuba twaloba okutya Musengwa Katonda. Aye era kyabazinga ni bwe yandibairegho, yanditukoleire ki?”

⁴ Boogera bibono bubono aye nga biziramu makulu naire. Balayira ebiziramu era baakola endagaano edhitagasa. Kale ni ensala y'omusango ebeefuukiire, yaaba ng'oti n'eisubi ery'obutwa erimeze mu bigufulugufulu eby'enimiro ye balimiisa embago y'ente.

⁵ Abatyamye ab'omu Samaria balidhugumira olw'okuviibwaku ekifaananie eky'ente ento eky'e Bethaveni. Abantu abakisinza balikiririra amaziga, ni bakabona abagheereza ekisinzibwa ekyo ekitali Katonda, baliwowoola, nga kitooleibwaku ekitiibwa kyakyo.

⁶ Bwenebwene ekifaananie ekyo abazigu balikitwala mu Assiria ng'ekirabo eri kyabazinga waayo omukologho. Ensoni dhirigema Abaisiraeli, baaswala olw'ekisinzibwa kyaibwe ekyo ekitali Katonda.

⁷ Kyabazinga w'e Samaria balimutwalagania, ng'oti kibaadho kya muti bwe kitwalibwa amaadhi.

⁸ Ebifo ebigulumivu ebisinzibwamu ebiri mu Aveni, Abaisiraeli bye bajaamu ni bakola ebibi, birizikirizibwa. Amawa n'enkandwa birimera ku alutaari dhaibwe. Balikoba ensozi bati: “Mutugweku,” baakoba n'obusozi bati: “Mutusandikire!”

Musengwa Katonda asalira Isiraeli omusango

⁹ Musengwa Katonda akoba ati: “Abaisiraeli tibalekeranga kukola bibi, okuviira irala ku biseera bye baakoleramu ebibi e Gibea. Kale yeene eyo e Gibea olutalo ye lulibaagaana.

¹⁰ Ndirumba abantu abo aboonooni naababonereza. Amaghanga galyesoloza ghalala okubalwanisa, baabonerezebwa olw'ebibi byaibwe ebingi.

¹¹ Isiraeli eira yali ng'oti nte nto eyatendekebwa obukalamu, ng'eyenda inho okusibwaku ekintu ekimulungula engaano, nze nga mmusaasiranga olw'enkoto ye enungi. Aye Isiraeli oyo ndimuta ekikoligo mu nkoto ekiriku embago, era alikumula eitaka, ni Buyudaaya yaatoodha eitaka.

¹² Nze naakoba nti, ‘Mulime enimiro dhaimwe edhaawuumuzibwaku okulimwa, musige ensigo ey'obutuufu. Mwidha kukungula ebibala olw'okungonza nze obutalekera. Kino n'ekiseera okuunoonia nze Musengwa Katonda. Era ndidha kwidha mbamwageku emikisa egy'obulokozi mingi ng'oti n'amaadhi agagwa.’

¹³ Aye ate mwasiga kukola bibi, mwakungulamu obutakola mazima, era mwalya ebibala ebiva mu buguyaguya; kuba mwesiga ebigaali byaimwe eby'omu lutalo, n'abalwani baimwe olukunkumuli.

¹⁴ Kale ni olutalo luliidhira abantu baimwe, n'ebifo byaimwe eby'okwewogomamu byazikirizibwa. Kiriba ng'oti bwe kyali mu lutalo kyabazinga Shalumani mwe yazikiririza ekibuga Betharubeli, ni bakuba ghansi abakazi ghalala n'abaana baibwe, ni babamanhiangula okutuusa okufa.

¹⁵ Mwena Abaisiraeli batyo bwe balibakola olw'ebibi byaimwe ebitaloodheka. Kyabazinga wa Isiraeli aliitibwa ng'olutalo lwakatoolera.”