Haggai 1 - Baibuli Ekibono kya Katonda 2014

Musengwa Katonda alagira okuzimba obuyaaka eisinzizo

¹ Mu mwaka ogwokubiri nga Dario ni kyabazinga w'e Perusia, ku lunaku olusooka mu mwezi ogwomukaaga, Musengwa Katonda yaagha Haggai omulanzi obukwenda. Haggai oyo ng'ali n'okutwala obukwenda obwo abukobere Zerubbabeli mutabane wa Shealutieli era omufuzi wa Buyudaaya, ni Yoshua mutabane wa Yehozadaki era omukulu wa bakabona.

² Musengwa Katonda Afuga Amagye yakoba Haggai ati: “Abantu bano bakoba bati, ‘Kino ti n'ekiseera ekituufu eky'okwiramu okuzimba obuyaaka eisinzizo lya Musengwa Katonda.’ ”

³ Agho Musengwa Katonda yaamala yaayogera ng'abita mu Haggai omulanzi, ati:

⁴ “Lwaki imwe beene musula mu mayumba amayooyoote, aye ng'eisinzizo lyange liri bifulukwa byereere?

⁵ Aye kale ni, mubone ebibatuuseeku?

⁶ Mwasiga bingi aye mwakungula bitono. Muli n'emere ey'okulya aye tebamala kubaigusa. Muli n'omwenge ogw'okunhwa aye tigubamala ndiwo! Muli n'engoye edh'okuvaala aye tidhibamala kusuugha. Abakozi empeera ye bafuna tebamala mu byetaago byaibwe.

⁷ Aye kale ni, muboine ebibatuuseeku?

⁸ Mpegaano ni muje mu nsozi muleete emiti, mwiremu okuzimba buyaaka eisinzizo, memale nsiime. Olwo ekitiisa kyange kyeyoleke. Nze Musengwa Katonda, ninze nkobye.

⁹ “Mwasuubira okukungula ebirime kamaala, aye wo, mwafunayo bitono. Era n'ebitono ebyo bwe mwabituusa eka, naabyonoona. Lwaki nabyonoona? Lwa kuba eisinzizo lyange liri bifulukwa byereere, aye nga imwe buli muntu yeefubiriire ku kulabirira ndhu ye.

¹⁰ Kyova eigulu ligemereire amaadhi obutagwa, n'eitaka lyaloba kubaza birime.

¹¹ Ndeeteire endoboozi okugwa mu nsi eno: egwe ku nsozi dhaayo, ni ku nimiro dhaayo edh'engaano, n'edh'emizabbibu, n'edh'emiti emyoliva, ni ku birime byonabyona. Era egwe ni ku bantu, ni ku nsolo, ni ku ebyo byonabyona bye mukola.”

Abantu bagondera ekiragiro kya Musengwa Katonda

¹² Agho Zerubbabeli mutabane wa Shealutieli era omufuzi wa Buyudaaya, ni Yoshua mutabane wa Yehozadaki era omukulu wa bakabona, n'abantu boonaboona abaira okuva mu bunhage e Babilonia, baakola ekyo Musengwa Katonda waibwe kye yabalagira. Baatya era baagondera obukwenda bwa Haggai omulanzi Musengwa Katonda ye yatuma.

¹³ Haggai oyo yaakobera abantu obukwenda bwa Musengwa Katonda ati: “Musengwa Katonda akoba ati, ‘Ndidha kubanga ghalala n'imwe.’ ”

¹⁴ Agho Musengwa Katonda yaata mu bantu abo boonaboona omwoyo ogwenda okukola. Omwoyo ogwo yaaguta mu Zerubbabeli mutabane wa Shealutieli era omufuzi wa Buyudaaya, ni mu Yoshua mutabane wa Yehozadaki era omukulu wa bakabona, ni mu bantu boonaboona abaira okuva mu bunhage. Baatoolera okukola ku isinzizo lya Musengwa Katonda Afuga Amagye Katonda waibwe,

¹⁵ ku lunaku olwamakumi abiri n'eina, olw'omwezi ogwomukaaga, mu mwaka ogwokubiri nga Dario ni kyabazinga.