Habakkuku 1 - Baibuli Ekibono kya Katonda 2014

¹ Buno n'obukwenda bwa Katonda omulanzi Habakkuku bwe yafuna mu kwolekebwa.

Habakkuku yeemuluguunhia olw'abantu obutajiira ku butuufu

² Wo Musengwa Katonda, ndituusa li okukulirira okutuyamba ng'otusiriikiriire? Oli tuwonia li abo abatukola ebikolwa eby'obukambwe?

³ Lwaki ondeka ni ngwa ku bizibu? Lwaki olingirira bulingirire ng'abantu bakola ebibi? Buli ghe ninga mbona bikolwa bya bukambwe na kuzikiriza, abantu basoola era baalwana.

⁴ Amateeka tigakaakola era abantu tibakaajiira ku butuufu bwa nsonga. Abakozi ab'ebibi basinga abatuufu emisango lwa kusaliriza kwa balamuzi. Mu nsambo eyo bavuluga obutuufu obw'ensonga.

Musengwa Katonda airamu Habakkuku

⁵ Agho Musengwa Katonda yaakoba abantu be ati: “Mulingirire amaghanga agabeezungulwire, era mwidha kubona ebinaabeewuunhisa ni bibasamaaliriza. Kuba nja kukola ekintu kye mutaghanga kwikiriza nga bakibakobeire bukobere.

⁶ Bona eno, nja kuleetera Abababilonia babe eighanga ery'amaani einho era ery'obukumu. Baje n'obukambwe mu nsi yoonayoona nga banhaga ebiketezo eby'abantu abandi.

⁷ Abababilonia abo batiisa era beeraliikiriza bubi inho. Beidhi nga bonka n'ab'amaani, era ng'ezira iteeka libafuga.

⁸ “Embalaasi dhaibwe dhirumuka embiro okusingaku n'empala, era nkambwe okusingaku emisege egiri endhala einho; dhimaduka nga dhizira kye dhitya. Abadhivuga bava ghala, baidha nga baguluka buguluke ng'oti n'enkookooma bw'eika n'eswankula ky'eja okulya.

⁹ Boonaboona baidha okulwana nga bakambughaire, era entiisa yaibwe n'ebeesookayo emberi. Baasoloza abanhage abangi einho ng'oti musenho.

¹⁰ Tibata kinhagansi mu bakyabazinga, era batwala buli mufuzi ng'eky'okuzaanhisa. Ezira kifo kya kwewogomamu kibalema; bakibungaku emungo ey'eitaka kwe baniinira, baakitwala.

¹¹ Agho baafuumuuka embiro ng'oti mpewo baaja. Abantu abo bali n'omusango, amaani gaibwe ge batwala okuba katonda waibwe.”

Habakkuku yeemuluguunhiza Musengwa Katonda kabiri

¹² Wo Musengwa Katonda wange, oli Katonda okuva eira n'eira. Oli Mutukuvu ow'ebyanda n'ebyanda. Wo Musengwa Katonda, niiwe olubaale mwe twewogoma era niiwe walonda Abababilonia, waabafuula ba maani era waabagha okutubonereza.

¹³ Amaiso go matukuvu tigagwaine kubona kibi, oba okulinga ku akola ekibi. Kale lwaki olingirira obulingirire abantu abo abateesigika? Lwaki osirika busirike ng'abakozi b'ebibi bazikiriza abantu ababasinga obulungi?

¹⁴ Bona, abantu obafiire okuba ng'oti byanhandha, era ng'oti n'ebintu ebyeghaluliza ku itaka ebizira mukulembeze.

¹⁵ Abababilonia abo bagema abantu ng'oti n'ole bw'agemya ebyenhandha ku irobo baabaghaluza ng'oti n'ole bw'aghaluza ebyenhandha mu katimba akatono oba mu katimba akanene ka kokota. Era bwe bamala beeseka baasagamba olw'obungi bw'abo be bagemiisa.

¹⁶ Era baaghaayo n'emisengo eri obutimba bwaibwe obutono, baaniokeza obutimba bwaibwe obunene obubbaani; kuba ebyo n'ebibafunisa ebirungi mu bulamu era ni balya emere esinga bulungi.

¹⁷ Aye mbo baja kutuusa li okuzikiriza amaghanga aghazira na kusaasira, byanda na byanda?