Filemoni 1 - Baibuli Ekibono kya Katonda 2014

¹ Ninze Paulo, omusibe olwa Kurisito Yesu, era ni Timotheo muganda waife. Mpandiikira mukagwa waife era mukozi munaife Filemoni,

² ni Affia mwanhina ife, ni Arikippo mulwani munaife, era n'Ekikunsu eky'Abaikiriza mu Kurisito ekyesololeza mu ndhu yo.

³ Katonda era Lata waife, ni Musengwa Yesu Kurisito abaghe enkabi n'emiraala.

Okugonza kwa Filemoni n'okwikiriza kwe

⁴ Buliidho nkwidhukira mu kusaba kwange era naasiima Katonda wange.

⁵ Kuba mpulira okugonza kw'ogonzaamu abatuukirivu boonaboona, era n'okwikiriza kw'oli nakwo mu Musengwa Yesu.

⁶ Era nsaba nti okwisania kwaife n'iwe mu kwikiriza, kutwongere okumanha ebirungi bye tuli nabyo mu Kurisito.

⁷ Muganda wange, okugonza kwo kundeeteire okusagamba einho era n'okwiramu amaani, kuba ku lulwo emyoyo gy'abatuukirivu, giize buyaaka.

Okwewolerezaagho Onesimo

⁸ Olw'okugonza kw'ogonzaamu abatuukirivu boonaboona, nze ng'owoluganda mu Kurisito tikyandintiisiisa kukulagira bulagire kukola ekyo ekigwaine.

⁹ Aye olw'okuba tugonzania, nkweghemba bweghembe, waire nga ninze Paulo omukwenda wa Kurisito Yesu, era omusibe ku lwa Kurisito oyo.

¹⁰ Ndi kukweghemba ku lw'omwana wange Onesimo eyafuuka omwana wange nga ndi musibe.

¹¹ Eira tiyakugasanga, aye mperaano yafuuka wa mugaso ye iwe ninze.

¹² Ndi kumutuma aire y'oli, aye nga mmugonza inho.

¹³ Nandyenze inho mmusigaze ghano ninze, anhambe mu kifo kyo nga ndi mu busibe buno bwe ndimu olw'Amawulire Amalungi.

¹⁴ Aye tyayenda kukola kintu kyonakyona nga toganhie olwo obuyambi bwonabwona bw'okola bube nga buviire mu mwoyo gwo mwene aghazira kukakibwa.

¹⁵ Oba katyo kyali nti Onesimo yali ali n'okukuvaaku entangama entonotono, memale aghange okwira okuba owuwo ekiseera kyonakyona.

¹⁶ Era mperaano ti mwiru bwiru kyonka, aye asinga omwiru: buti waluganda waife, omugonzi einho ye nze, aye ate okusingira irala ye iwe. Kuba mwiru ate kabiri yaaba muganda wo mu Musengwa!

¹⁷ Mbeeni oba nga nze ndi mwino, Onesimo musangaalire oti ni bwe wandisangaaliire nze.

¹⁸ Oba nga ghaligho ekibi kye yakukola oba ekintu ky'omubandha, kibale ku nze.

¹⁹ Kino nkighandiise n'omukono gwange mwene nti: nze Paulo ndidha kukusasula. Ndidhi nti ni bwe ntakwidhukiza, okiidhi bukalamu ng'okaali kunsasula olw'obulamu bwo.

²⁰ Kale ni owoluganda, nkolera eky'omugaso ku lwa Musengwa. Kola ekinaasangaaza omwoyo gwange mu Kurisito.

²¹ Nga neesiga obugonvu bwo, mpandiise nga ndidhi nti oidha kukola ekisingagho ku ekyo kye nsabye.

²² Ekindi kye nsaba, ntegekeraayo agh'okusula ng'omugeni, kuba ndi kusuubira nti Katonda aidha kwiramu okusaba kwaimwe mwenamwena andhize ye muli.

Okusiibula

²³ Epafura musibe munange ku lwa Kurisito Yesu,

²⁴ era ni bakozi banange bano: Mariko, Arisitaruko, Dema ni Luka, babalamwisa.

²⁵ Enkabi dha Musengwa Yesu Kurisito dhibe n'imwe mwenamwena.