Ezera 8 - Baibuli Ekibono kya Katonda 2014

Abantu abaira okuva mu bunhage

¹ Luno n'olukalala olw'abakulu mu bika n'abakulu ab'enda dha baiseibwe abaira ninze Ezera, nga tuva mu nsi Babilonia mu kiseera Arutazerizesi kye yabeeramu kyabazinga:

² Gereshomu n'eyali akulira ab'oku nda ya Finehasi; Danieli yaakulira ab'oku nda ya Ithamari; Hattushi yaakulira ab'oku nda ya Daudi;

³ Zekaria yaakulira ab'oku nda ya Shekania, baidhukulu ba Paroshi. Zekaria oyo yeeghandiisa n'abantu kikumi n'ataanu (150).

⁴ Eliehoenai mutabane wa Zerahia yaakulira ab'oku nda ya Pahathimoabu, era yeeghandiisa n'abantu ebikumi bibiri (200).

⁵ Shekania mutabane wa Yahazieli yaakulira ab'oku nda ya Zattu, era yeeghandiisa n'abantu ebikumi bisatu (300).

⁶ Ebedi mutabane wa Yonathani yaakulira ab'oku nda ya Adini, era yeeghandiisa n'abantu amakumi ataanu (50).

⁷ Yeshaia mutabane wa Athalia yaakulira ab'oku nda ya Elamu, era yeeghandiisa n'abantu nsanvu (70).

⁸ Zebadia mutabane wa Mikaeli yaakulira ab'oku nda ya Shefatia, era yeeghandiisa n'abantu kinaana (80).

⁹ Obadia mutabane wa Yehieli yaakulira ab'oku nda ya Yoabu, era yeeghandiisa n'abantu ebikumi bibiri na ikumi na munaana (218).

¹⁰ Shelomithi mutabane wa Yosifia yaakulira ab'oku nda ya Bani, era yeeghandiisa n'abantu kikumi na nkaaga (160).

¹¹ Zekaria mutabane wa Bebai yaakulira ab'oku nda ya Bebai, era yeeghandiisa n'abantu amakumi abiri na munaana (28).

¹² Yohanani mutabane wa Hakkatani yaakulira ab'oku nda ya Azigadi, era yeeghandiisa n'abantu kikumi na ikumi (110).

¹³ Elifeleti, Yeueli, ni Shemaia, abaira nga ghabiseeghooku ekiseera, baakulira ab'oku nda ya Adonikamu, era beeghandiisa n'abantu nkaaga (60).

¹⁴ ate Uthai ni Zakkuri baakulira ab'oku nda ya Bigivai, era beeghandiisa n'abantu nsanvu (70).

Ezera anoonia Abalevi ab'okukola mu isinzizo

¹⁵ Agho naayeta abantu abo boonaboona, twesololeza ku mwiga ogukulukuta mu Ahava, twamalagho enaku isatu. Bwe nalingalinga mu bantu ni mu bakabona, naakizuula nga mu boonaboona muziramu Balevi.

¹⁶ Kale naayetesa abakulembeze bano: Eliezeri, ni Arieli, ni Shemaia, ni Elinathani, ni Yaribu, ni Elinathani owundi, ni Nathani, ni Zekaria, ni Meshullamu. Era naayetesa Yoiaribu ni Elinathani, abaali abantu abategeera einho.

¹⁷ Naabatuma ye Iddo omukulembeze w'e Kasifia, bamusabe ye mwene ni baine bwe bagheereza mu isinzizo eyo e Kasifia, batugheereze abantu ab'okugheerezanga Katonda waife mu isinzizo.

¹⁸ Era nga bayambibwaku Katonda waife baatugheereza Sherebia, omusaadha Omuisiraeli omugezi, owundi ku batabane ba Mahili eyali mutabane wa Levi. Yaidha ni batabane be ni baganda be, baaghera abantu ikumi na munaana.

¹⁹ Baatugheereza ni Hashabia ni Yeshaia eyali owundi ku batabane ba Merari, baidha ni baganda baibwe era ni batabane baibwe boonaboona aghalala baaghera abantu amakumi abiri.

²⁰ Okwo kweyongeraku abagheereza ab'omu isinzizo ebikumi ebibiri n'abiri (220), Daudi be yataagho ng'ali n'abakungu be, bagheerezenga Abalevi. Abo boonaboona baabaghandiika amaina gaibwe.

Ezera akulembera abantu mu kusiiba ni mu kusaba

²¹ Agho naalangirira okusiiba nga tuli eyo ku mwiga Ahava. Naakoba twewombeeke mu maiso ga Katonda waife nga tumusaba atukulembere mu lugendo lwaife, era atukuume n'abaana baife ni byonabyona bye twali nabyo.

²² Ensoni dhangema okusaba kyabazinga atughe ekikunsu eky'abaisirukale ab'oku bigere n'ab'oku mbalaasi okutugherekera nga batukuuma tuwone abazigu mu ngira, kuba nali mmaze okumukoba nti: “Katonda waife agha enkabi kiisi amwesiga, aye yaasungughalira era yaabonereza kiisi amuvaaku.”

²³ Kale twasiiba era twasaba Katonda waife oyo okutukuuma, era yaawulira okusaba kwaife.

Ebirabo ebyagheebwayo olw'eisinzizo

²⁴ Agho ku bakabona abaali nga n'abakulira banaibwe naalondaku bano: Sherebia, ni Hashabia, ni banaibwe abandi ikumi.

²⁵ Naapima feeza ni zaabu, n'ebintu kyabazinga n'abawi ab'amagezi be, n'abakungu be, era n'Abaisiraeli boonaboona, bye baaghaayo okukozesebwanga mu isinzizo lya Katonda waife. Byonabyona naabigemya bakabona abo, era nga biri mu buzito buno:

²⁶ feeza ng'azitogha kilo emitwalo ebiri n'enkumi ibiri (22,000); ebintu ebikozesebwa ebya feeza nga bizitogha kilo enkumi isatu na bina (3,400); zaabu ng'azitogha kilo enkumi isatu na bina (3,400);

²⁷ ebibya amakumi abiri ebya zaabu, nga bizitogha kilo nga munaana n'ekitundu; n'ebibya ebindi bibiri ebyazigulwa obukalamu mu kyuma eky'ekikomo era eby'omughendo ogwaga n'ogwa zaabu.

²⁸ Naabakoba nti: “Muli batukuvu eri Musengwa Katonda, n'ebikozesebwa bino byona bitukuvu. Era feeza ni zaabu ebyo, bigheereibwayo kyeyendere eri Musengwa Katonda wa badhaadha baife.

²⁹ Mu bikuume bukalamu okutuusa lwe mulituuka e Yerusalemu mu isinzizo lya Musengwa, ni mubipimira mu kisenge kya bakabona abakulu, memale ni mubibagemya ghalala, n'Abalevi, n'abakulu ab'enda dha baiseibwe mu Isiraeli.”

³⁰ Kale bakabona n'Abalevi baatoola feeza, ni zaabu, n'ebikozesebwa nga bwe byapimibwa, babitwale e Yerusalemu mu isinzizo lya Katonda waife.

Okwira e Yerusalemu

³¹ Agho twava ku mwiga Ahava ku lunaku olweikumi n'eibiri olw'omwezi ogusooka, twaja e Yerusalemu. Katonda waife yaaba ghalala n'ife, yaatuwonia okugwa mu ngalo edh'abazigu baife abaatweteeganga nga tuli mu ngira.

³² Bwe twatuuka e Yerusalemu, twawuumulaku okumala enaku isatu.

³³ Ku lunaku olwokuna twaja mu isinzizo lya Katonda waife, twapima feeza, ni zaabu, n'ebintu ebikozesebwa. Byonabyona twabigemya kabona Meremothi mutabane wa Uria, ng'ali ni Eleazari mutabane wa Finehasi, n'Abalevi babiri Yozabadi mutabane wa Yeshua, ni Noadia mutabane wa Binnui.

³⁴ Buli kintu twakibala, twakipima obuzito bwakyo, era twakighandiika mu kiseera kyene ekyo.

³⁵ Mu kiseera ekyo, abo boonaboona abaira okuva mu bunhage, baaghaayo ebigheebwayo ebyokebwa eri Katonda wa Isiraeli. Baaghaayo ente enume ikumi na ibiri ku lwa Isiraeli yoonayoona, baaghaayo entaama enume kyenda na mukaaga, n'entaama ento nsanvu na musanvu. Era baaghaayo n'embuzi enume ikumi na ibiri, ng'ekigheebwayo olw'ebibi. Ebyo byonabyona baabighaayo eri Musengwa Katonda ng'ekigheebwayo ekyokebwa.

³⁶ Era baatwala ekighandiiko ekyalimu ebiragiro bya kyabazinga, baakigha abafuzi n'abakungu ab'ekiketezo ekiri ere ng'osomoike omwiga Eufurate. Abo baabayamba inho era bairuukirira n'eisinzizo.