Ezera 6 - Baibuli Ekibono kya Katonda 2014

Bazuula ekiragiro kya kyabazinga Kuro

¹ Agho kyabazinga Dario yaagha ekiragiro banoonereze mu bighandiiko eby'ebyafaayo eby'obwakyabazinga ebyali mu materekero g'ebitabo mu nsi Babilonia.

² Baayagaana mu kibuga Ekubatana ekyali mu kiketezo eky'e Media, enzingo y'ekitabo eyalimu ekighandiiko ekikoba kiti:

³ “Mu mwaka ogwasooka nga kyabazinga Kuro n'afuga, kyabazinga Kuro oyo yagha ekiragiro ati, eisinzizo lya Katonda eriri e Yerusalemu bairemu okulizimba, libenga ekifo mwe bagheerayo emisengo n'ebigheebwayo ebyokebwa. Obugungumavu bube mita amakumi abiri na musanvu, n'obugazi bwalyo bwona bube mita amakumi abiri na musanvu.

⁴ Ekisenge bakizimbe n'enhiriri isatu edh'amabaale amabaadhe amanene, ku ngulu kwago bateeku olunhiriri lw'embaawo lulala. Endyanga ey'obwakyabazinga n'ebe esasulire omulimo ogwo gwonagwona.

⁵ Era n'ebintu ebya zaabu n'ebya feeza eby'omu isinzizo lya Katonda eryo, Nebukadinezzari bye yatoola e Yerusalemu n'abireeta e Babilonia, babiizeeyo babite mu isinzizo eryo, buli kintu mu kifo kyakyo.”

Dario alagira omulimo ogw'okuzimba eisinzizo guje mu maiso

⁶ Agho Dario yairamu ng'agheereza obukwenda buno, ati: “Ya Tattenai omufuzi ow'ekiketezo ekiri ere ng'osomoike omwiga Eufurate, ni Shetharibozenai, ni bafuzi banaimwe abali mu kiketezo ekiri ere ng'osomoike omwiga Eufurate ogwo. “Ebigema ku mulimo ogw'okuzimba eisinzizo mubiveeku.

⁷ Muleke omulimo ogwo gwe bali kukola ku isinzizo lya Katonda eryo guje mu maiso. Muleke omufuzi wa Buyudaaya n'abakulembeze b'Abayudaaya bairemu okuzimba eisinzizo eryo mu kifo kyalyo ghe lyalinga.

⁸ Ate era ndi kubalagira kye munaakolera abakulembeze ab'Abayudaaya abali kuzimba eisinzizo lya Katonda eryo: Mwidha kubasasulanga mangu era mu bwidhuvu, nga mutoola mu ndyanga ey'obwakyabazinga ku misolo egiva mu kiketezo ekiri ere ng'osomoike omwiga Eufurate.

⁹ Era mughenga bakabona ab'e Yerusalemu, buli lunaku aghazira kukoosaamu, ebintu byonabyona ebineetaagisanga: ente enume entototo, n'entaama enume n'enkazi, bigheebwengayo eri Katonda ow'eigulu, ng'ebigheebwayo ebyokebwa. Era mubaghenga n'engaano, n'omuunhu, n'omwenge ogw'emizabbibu, n'omuzigo ogw'ebibala eby'emiti emyoliva.

¹⁰ Olwo baghengayo eri Katonda ow'eigulu emisengo gy'asiima, era bansabirenga nze kyabazinga n'eizaire lyange.

¹¹ Era ndi kulagira nti omuntu yeenayeena anaakyusaamu ku kiragiro kino, baidha kutoolanga omulabba ku ndhu ye yeene, bamale bamulengeedhezenga okwo afe. Era endhu ye baidha kugifuulanga kifo ghe babunga obusa.

¹² Nsaba Katonda eyalonda Yerusalemu okuba ekifo eky'okumusinzizangamu, azikirize kyabazinga yeenayeena oba omuntu owundi yeenayeena alikyusaamu ku kiragiro kino, oba okuzikiriza eisinzizo lya Katonda eryo eriri e Yerusalemu. Nze Dario, ninze mpaire ekiragiro kino. Byonabyona bye ndagiire bigwaine bikolebwe n'obwegendereza.”

Eisinzizo balitukuza

¹³ Kale Tattenai, omufuzi w'ekiketezo ekiri ere ng'osomoike omwiga Eufurate, ni Shetharibozenai, nga bali ghalala ni bakagwa baibwe, baakolera irala byonabyona nga kyabazinga Dario bwe yalagira.

¹⁴ Era abakulembeze b'Abayudaaya baazimba eisinzizo eryo bukalamu. Abalanzi Haggai ni Zekaria mutabane wa Iddo baabaizangamu amaani olw'ebyo bye baalanganga. Baamaliriza okuzimba nga bajiira ku biragiro bya Katonda wa Isiraeli, ni ku kwikirizibwa kwa bakyabazinga, Kuro ni Dario ni Arutazerizesi, ab'e Perusia.

¹⁵ Kale eisinzizo eryo lyawa okuzimba ku lunaku olwokusatu olw'omwezi ogwetebwa Adari, nga kyabazinga Dario ali kufuga omwaka gwe ogwomukaaga.

¹⁶ Agho Abaisiraeli, ni bakabona, n'Abalevi, n'abantu abandi abaira okuva mu bunhage, baasagamba inho nga batukuza eisinzizo lya Katonda eryo.

¹⁷ Era ku mukolo ogwo baaghaayo ente enume kikumi (100), entaama enume ebikumi bibiri (200), n'entaama ento ebikumi bina (400). Baaghaayo n'embuzi enume ikumi na ibiri (12), embuzi ndalandala olwa buli kika kya Isiraeli, kibe ng'ekigheebwayo olw'ebibi eby'Abaisiraeli boonaboona.

¹⁸ Agho baataagho bakabona mu bikunsu byaibwe, n'Abalevi mu ngobo dhaibwe, baagheerezanga Katonda mu isinzizo e Yerusalemu, nga bwe kyaghandiikibwa mu kitabo kya Musa.

Ekibinuko eky'Okwidhukiriraku Okubitizibwa

¹⁹ Ku lunaku olweikumi n'eina olw'omwezi ogusooka, abo abaira okuva mu bunhage baakola Ekibinuko eky'Okwidhukiriraku Okubitizibwa.

²⁰ Bakabona ghalala n'Abalevi baali bamaze okwetukuza, nga boonaboona balongoofu. Kale baita entaama ento edhigheebwayo ku Kibinuko eky'Okwidhukiriraku Okubitizibwa ku lw'abo boonaboona abaira okuva mu bunhage, ni ku lwa bakabona banaibwe, ni ku lwaibwe beene.

²¹ Omusengo ogw'ekibinuko ekyo bano n'abaagulyaku: Abaisiraeli boonaboona abaira okuva mu bunhage, n'abo boonaboona abaabeyimbaku ni baleka empisa enhonoonefu edh'abantu abaabanga mu nsi eyo, olw'okwenda okusinzanga Musengwa Katonda, Katonda wa Isiraeli.

²² Baakola embaga ey'Ekibinuko eky'Emigaati Egitazimbulukusiibwa okumala enaku musanvu nga basagamba kuba Musengwa Katonda yakyusa omwoyo gwa kyabazinga ow'e Assiria, yaamuleetera okuyamba Abaisiraeli abo ku mulimo ogw'okuzimba eisinzizo lya Katonda oyo owa Isiraeli.