Ezera 4 - Baibuli Ekibono kya Katonda 2014

Abantu bagezaaku okulobera eisinzizo okwiramu okuzimbibwa

¹ Agho abazigu ab'abantu b'ekika kya Yuda n'ekya Benjamini baawulira ng'abantu abaava mu bunhage bwe baali bali kuzimba obuyaaka eisinzizo lya Musengwa Katonda, Katonda wa Isiraeli.

² Kale baaja ye Zerubbabeli ni y'abakulu ab'enda dha baiseibwe, baabakoba bati: “Ka tubeeyimbeku tuzimbire ghalala endhu ya Katonda kuba twena tusinza Katonda waimwe nga imwe bwe mukola, era tubairenga tughaayo emisengo y'ali okuviira irala mu biseera bya kyabazinga Esarahaddoni ow'e Assiria, eyatuleeta ghano.”

³ Aye Zerubbabeli, ni Yeshua, n'abakulu ab'enda dha baiseibwe mu Isiraeli baabakoba bati: “Titwetaaga buyambi bwaimwe okusobola okuzimbira Musengwa Katonda waife isinzizo. Ife beene tuja kulizimba, nga kyabazinga Kuro ow'e Perusia bwe yatulagira.”

⁴ Agho abantu abaali baba mu kiketezo ekyo baagezaaku okumala mu Bayudaaya amaani nga babatiisatiisa, balekere okuzimba.

⁵ Baaguliriranga abafuzi babatabuletabule mu kigendererwa kyaibwe ekyo. Ekyo baakikola ekiseera kyonakyona Kuro kye yamala nga ni kyabazinga w'e Perusia, n'okutuusa mu biseera Daria mwe yabeera kyabazinga w'e Perusia.

Abantu bagezaaku okulobera Yerusalemu okuzimbibwa

⁶ Agho mu mainhama g'obufuzi bwa kyabazinga Ahasuero, abantu abo baaghandiika embaluwa embi ku batyamye b'omu Buyudaaya n'ab'omu Yerusalemu nga babavunaana.

⁷ Kabiri mu kiseera Arutazerizesi mwe yabeera nga ni kyabazinga w'e Perusia, Bishilamu, ni Mithuredathi, ni Tabeeli, ghalala ni bakagwa baibwe abandi boonaboona, baamughandiikira embaluwa. Embaluwa eyo yakyusibwa okuva mu lulimi Oluaramaika.

⁸ Rehumu eyali omufuzi ni Shimushai omughandiisi, baaghandiikira kyabazinga Arutazerizesi embaluwa evunaana abantu ab'e Yerusalemu, ng'esoma eti:

⁹ “Eviire wa Rehumu omufuzi, ni Shimushai omughandiisi, ni bakagwa baibwe abandi bano: abalamuzi, abafuzi, n'abantu ab'e Perusia, n'ab'e Ereki, n'ab'e Babilonia, n'ab'e Susa eky'omu nsi y'e Elamu,

¹⁰ ghalala n'abantu abamaghanga agandi goonagoona, Osinappari omukologho be yatoola mu maka gaibwe eby'entaka, okusenga mu bibuga eby'e Samaria ni mu kiketezo ekiri ere ng'osomoike omwiga Eufurate.”

¹¹ Bino n'ebibono ebyali mu mbaluwa eyo: “Ya kyabazinga Arutazerizesi. Ife abagheereza bo abali mu kiketezo ekiri ere ng'osomoike omwiga Eufurate, tukulamwisa inho.

¹² “Isebantu kyabazinga, tuli kukumanhisa tuti Abayudaaya abaidha eno nga baviire eyo iwe y'oli, baamala baaja Yerusalemu. Era bali kuzimba buyaaka ekibuga ekyo eky'abantu abadheemu era abakozi ab'ebibi bali kwizaagho omusingi n'ebimante byakyo. Bali kumpi na kumaliriza.

¹³ Isebantu kyabazinga, abantu abo bwe bairamu okuzimba ekibuga ekyo, n'ebimante byakyo ebikyezungulwire ni babimaliriza, baidha kulekera agho okukughanga omusolo, n'empooza, n'ebisale ebindi byonabyona, era ekyo kiidha kukendeeza enfuna ey'obwakyabazinga.

¹⁴ Kale ife nga bwe tufuna obuyambi obuva mu kisaagaati kyo eky'obwakyabazinga, titugwaine kusirika busirike, bwe tubona ng'ekitiibwa kyo iwe Isebantu kyabazinga, bali kukidhuuluusa. Kyetuviire ni tukugheereza amawulire gano okukumanhisa,

¹⁵ oghe ekiragiro banoonereze mu bighandiiko bya badhaadha bo eby'ebyafaayo. Oidha kukizuula mu bighandiiko ebyo nga buliidho ekibuga ekyo kibaire kya bantu badheemu, abakaluubiriza bakyabazinga n'abafuzi ab'ebiketezo. Abantu baamu buliidho babaire bakalangafu inho okubafuga era ekibuga ekyo kye baava ni bakizikiriza.

¹⁶ Isebantu kyabazinga, abantu abo bwe bairamu okuzimba ekibuga ekyo, n'ebimante byakyo ebikyezungulwire ni babimaliriza, onaaba nga tokaali na kiketezo ky'obala nga kikyo, ere ng'osomoike omwiga Eufurate.”

¹⁷ Kyabazinga yaabairamu mu bughandiike ati: “Ya Rehumu omufuzi, ni Shimushai omughandiisi, ni bakagwa baimwe abandi boonaboona ababa mu Samaria ni mu biketezo ebindi ebiri ere ng'osomoike omwiga Eufurate. Mbalamwisa inho.

¹⁸ “Embaluwa ye mwatugheereza baaginsomera bukalamu,

¹⁹ era naagha ekiragiro baanoonereza, baazuula ng'ab'omu kibuga ekyo kuva ira nga badheemera bakyabazinga, era nga n'okutuusa mpegaano bakeediima.

²⁰ Era bakyabazinga ab'amaani baafuganga Yerusalemu ekyo, era baafuganga n'ekiketezo ekyo kyonakyona ekiri ere ng'osomoike omwiga Eufurate, nga baasolozaamu empooza, n'omusolo, n'ebisale ebindi.

²¹ Kale ni mughe abantu abo ekiragiro ekibalekeza okuzimba ekibuga ekyo, okutuusa lwe ndigha ekiragiro ekindi.

²² Era mubone nti ekyo mukikola mangu, obwakyabazinga bulobe kwonoonekerwa na kufiirizibwa.”

²³ Embaluwa eyo eyava ye kyabazinga Arutazerizesi bwe baagisomera Rehumu, ni Shimushai omughandiisi, ni banaibwe abandi boonaboona, baasitukiramu baajiiragho y'Abayudaaya e Yerusalemu, baakaka bya ntaka Abayudaaya okulekera okuzimba.

²⁴ Kale omulimo ogwali guli kukolebwa e Yerusalemu ku isinzizo lya Katonda baagwemereza, okutuusa mu mwaka ogwokubiri ogw'obufuzi bwa kyabazinga Dario ow'e Perusia.