Ezera 10 - Baibuli Ekibono kya Katonda 2014

Entegeka ey'okulekeza Abaisiraeli okufumbiraganwa n'abamaghanga agandi

¹ Ezera bweyali ng'ali kusaba bw'ayatula ebibi, eno nga bw'alira amaziga ng'akubye amakiryaivu gha mberi gh'eisinzizo lya Katonda, eikuukuubira ery'Abaisiraeli abasaadha n'abakazi n'abaana abato, lyesololeza gh'ali. Boonaboona nga bali kulira inho amaziga.

² Agho Shekania mutabane wa Yehieli owundi ku batabane ba Elamu yaakoba Ezera ati: “Tusungughaiza inho Katonda waife, olw'okubayiza abakazi abamaghanga agandi agali mu nsi eno. Aye waire ebyo biri bityo, Isiraeli ekaaliyo n'eisuubi.

³ Kale ni tukole endagaano ni Katonda waife, tutoolegho abakazi abo n'abaana baibwe, nga tujiira ku magezi ge tunaafuna okuva ye iwe musengwa wange, ni y'abo boonaboona abagondera ebiragiro bya Katonda waife oyo. Ekyo twidha kukikola nga tujiira ku mateeka.

⁴ Situkiramu, kuba ogwo mulimo gwo era ife tuli ghalala n'iwe. Iwe guma okikole.”

⁵ Ezera yaasituka, yaakoba abakulembeze ba bakabona, n'aba Abalevi, n'aba Abaisiraeli boonaboona, balayire bati baidha kwawukana n'abakazi abamaghanga agandi. Kale baakola omukolo ogw'okulayira.

⁶ Agho Ezera yaava mu luya emberi gh'eisinzizo lya Katonda, yaaja mu kisenge kya Yehohanani mutabane wa Eliashibu, yaaba eyo okutuusa obwire okukya nga tali kulya waire okunhwa ekintu kyonakyona ng'enaku emugemye olw'Abaisiraeli abaava mu bunhage obutaba beesigwa.

⁷ Agho baalangirira mu Buyudaaya mwonamwona ni mu Yerusalemu, bati abo boonaboona abaira okuva mu bunhage beesololeze e Yerusalemu.

⁸ Era bati anaamala enaku eisatu ng'akaali kwidha, ng'abakungu n'abakulembeze bwe balagiire, ebintu bye byonabyona baja kubimutoolaku, ni mwene yeena bamubinge mu kikunsu eky'abaava mu bunhage.

⁹ Agho abasaadha boonaboona ab'omu kika kya Yuda n'ekya Benjamini, beesololeza e Yerusalemu mu nnaku eisatu edho. Olwo n'olwali olunaku olwamakumi abiri (20) olw'omwezi ogwomwenda. Abantu boonaboona baatyama mu luya emberi gh'eisinzizo lya Katonda nga bali kudhugumira, olw'ensonga eyabeesa n'olw'amaadhi amangi einho agaali gali kugwa.

¹⁰ Ezera kabona yaasituka yaakoba abantu ati: “Mwayonoona okubayiza abakazi abamaghanga agandi, kuba mwayongera bwongere ku musango ensi Isiraeli gw'eri nagwo.

¹¹ Kale ni mpegaano mwatule ebibi byaimwe eri Musengwa Katonda, oyo Katonda wa badhaadha baife, mukolenga ebyo by'ayenda. Mweyawule ku bantu abamaghanga agandi abali mu nsi eno, ni ku bakazi baimwe abamaghanga agandi.”

¹² Agho abantu boonaboona abaali beesoloiza bamwiramu nga baleekaana bati: “N'ekyo kyene. Tuteekwa kukola nga bw'okobye.

¹³ Aye tuli abantu kamaala ate amaadhi gali kugwa mangi, titukaaghanga kugabaamu tuti. Ate era, ekintu ekyo titusobola kukikola mu lunaku lulala oba ibiri, kuba bwenebwene abaayonoona bangi inho mu ife.

¹⁴ Leka abakulembeze baife babeegho mu liina lyaife twenatwena abeesoloiza. Olwo ab'omu bibuga byaife boonaboona abaabayiza abakazi abamaghanga agandi, baidhe mu kiseera ekiragaane nga bali ghalala n'abakulembeze n'abalamuzi okuva mu buli kibuga. Mu nsambo eyo ekiruyi ekitaloodheka Katonda waife ky'ali nakyo ku ife ku nsonga eyo, kiidha kutuvaaku.”

¹⁵ Ghazira muntu yatakania ntegeka eyo, okutoolaku Yonathani mutabane wa Asaheli ni Yahazeia mutabane wa Tikuva, nga bayambibwaku Meshullamu ni Shabbethai Omulevi, boona abaali nga baisania nabo.

¹⁶ Kale abaava mu bunhage baikiriza entegeka eyo. Ezera yaalonda abandi ku baakuliranga enda dha baiseibwe, ng'ajiira ku nda dhe basimukamu era amaina gaibwe gaaghandiikibwa. Ku lunaku olusooka mu mwezi ogweikumi, baatyama baatoolera okunoonereza ku nsonga eyo.

¹⁷ Era olunaku olusooka, mu mwezi ogusooka mu mwaka, lwaja okutuuka nga bamaze okuzuula abasaadha abaali babayiiza abakazi abamaghanga agandi.

Abasaadha abaali babayiiza abakazi abamaghanga agandi

¹⁸ Luno n'olukalala olw'abasaadha abaali babayiiza abakazi abamaghanga agandi: Mu bakabona mwalimu, Maaseia, Eliezeri, Yaribu, ni Gedalia nga ba ku nda ya Yeshua mutabane wa Yozadaki ni baganda be.

¹⁹ Abo baasuubiza okwawukana ni bakazi baibwe abo abamaghanga agandi era baaghaayo entaama enume ng'ekigheebwayo olw'ebibi byaibwe.

²⁰ Mu b'oku nda ya Immeri mwalimu, Hanani, ni Zebadia.

²¹ Mu b'oku nda ya Harimu mwalimu, Maaseia, Eliya, Shemaia, Yehieli, ni Uzzia.

²² Mu b'oku nda ya Pashuhuri mwalimu, Elioenai, Maaseia, Ishimaeli, Nethaneli, Yozabadi ni Elasa.

²³ Mu Balevi mwalimu, Yozabadi, Shimei, Kelaia era eyayetebwanga Kelita, Pethahia, Yuda, ni Eliezeri.

²⁴ Mu bembi ab'omu isinzizo mwalimu, Eliashibu. Mu bakuumi b'emiryango gy'eisinzizo mwalimu: Shallumu, Telemu, ni Uri.

²⁵ Mu Baisiraeli abandi, mu b'oku nda ya Paroshi mwalimu: Ramia, Izzia, Malikiya, Miyamini, Eleazari, Hashabia, ni Benaia.

²⁶ Mu b'oku nda ya Elamu mwalimu: Mattania, Zekaria, Yehieli, Abudi, Yeremothi, ni Eliya.

²⁷ Mu b'oku nda ya Zattu mwalimu: Elioenai, Eliashibu, Mattania, Yeremothi, Zabadi, ni Aziza.

²⁸ Mu b'oku nda ya Bebai mwalimu: Yehohanani, Hanania, Zabbai, ni Athalai.

²⁹ Mu b'oku nda ya Bani mwalimu: Meshullamu, Malluki, Adaia, Yashubu, Sheali, ni Yeremothi.

³⁰ Mu b'oku nda ya Pahathi Moabu mwalimu: Adana, Kelali, Benaia, Maaseia, Mattania, Bezaleli, Binnui, ni Manasse.

³¹ Mu b'oku nda ya Harimu mwalimu: Eliezeri, Issihiya, Malikiya, Shemaia, Shimeoni,

³² Benjamini, Malluki, ni Shemaria.

³³ Mu b'oku nda ya Hashumu mwalimu: Mattenai, Mattatta, Zabadi, Elifeleti, Yeremai, Manasse, ni Shimei.

³⁴ Mu b'oku nda ya Bani mwalimu: Maadai, Amuramu, Ueli,

³⁵ Benaia Bedeia, Keluhi,

³⁶ Vania, Meremothi, Eliashibu,

³⁷ Mattania, Mattenai, ni Yaasu.

³⁸ Mu b'oku nda ya Binnui mwalimu: Shimei,

³⁹ Shelemia, Nathani, Adaia,

⁴⁰ Makinadebai, Shashai, Sharai,

⁴¹ Azareli, Shelemia, ni Shemaria,

⁴² Shallumu, Amaria ni Yosefu.

⁴³ Mu b'oku nda ya Nebo mwalimu: Yeiyeli, Mattithia, Zabadi, Zebina, Yaddai, Yoeli, ni Benaia.

⁴⁴ Abasaadha abo boonaboona baali n'abakazi abamaghanga agandi, baamala baabasiibula. Era abakazi abo baaja n'abaana baibwe.