Ezekieli 9 - Baibuli Ekibono kya Katonda 2014

Ekibuga Yerusalemu kibonerezebwa

¹ Agho naawulira Katonda ng'akaabuka, ng'akoba ati: “Museete, imwe abaja okubonereza ekibuga. Buli muntu aidhe ng'agemye mu ngalo eky'okulwanisa ky'aja okukozesa okuzikiriza.”

² Naja okulinga nti, nga mbona abasaadha mukaaga nga bali kuviira mu mulyango ogw'eisinzizo ogw'eitale, ogulingiriire ku luuyi olw'omukono omugooda olw'e buvandhuba. Buli muntu yali agemye mu ngalo ky'aja okwitisa. Baali n'omuntu owundi eyali avaire engoye empegheevu, era ng'ali n'ebintu eby'okughandiikisa. Abantu abo boonaboona bangira, baayemerera gha mbali gh'alutaari ey'ekyuma eky'ekikomo.

³ Agho okumesunkana okw'ekitiisa kya Katonda wa Isiraeli kwasituka, kwava ku bitonde eby'amaghagha ebyetebwa kerubi kwe kwali kuli, kwaja ku mulyango ogw'eisinzizo. Musengwa Katonda yaayeta ole eyali avaire engoye empegheevu era ng'ali n'ebintu eby'okughandiikisa.

⁴ Musengwa Katonda yaamukoba ati: “Ja ng'obita mu kibuga Yerusalemu, ote obumanhiso ku byeni by'abo abawulira enaku n'obulumi olw'ebyenhinhalwa byonabyona ebikolerwa mu kibuga ekyo.”

⁵ Ni bale abandi yaabakoba, era nga mpulira, ati: “Muje nga mubita mu kibuga nga munonereza oyo, muje nga mwita. Mutasaasiraku naire omulala ati oba okumugemerwa ekivunika.

⁶ Muje nga mwita abakaire, abaisuka, abaghala abaguna, abaana abato, n'abakazi. Aye mutagema ku muntu yeenayeena aliku kamanhiso. Era mutandiikire ghano ku isinzizo lyange.” Kale baatandiikira ku bakulembeze abaali agho gha isinzizo.

⁷ Era yaabakoba ati: “Mwonoone eisinzizo, era mwidhuze empya dhaalyo emirambo egy'abo be mwise. Muje mangu.” Kale baaja mangu, baita abantu mu kibuga.

⁸ Bwe baali nga bali kwita, nze nali nsigaire agho zenka. Agho naakuba amakiryaivu era naakutama n'ekyeni kyatuuka ku itaka. Naakuba empungu, naakoba nti: “Wo Musengwa Katonda, obwo bwenebwene oja kwita buli muntu asigairegho mu Isiraeli olw'ekiruyi ekikuliku olwa Yerusalemu?”

⁹ Katonda oyo yandhiramu ati: “Ebibi eby'eighanga Isiraeli ni Buyudaaya bibitiriire obungi. Ensi yaibwe eidhwire ebikolwa eby'obutemo, n'ekibuga kyaidhula obutajiira ku mazima. Bakoba bati, ‘Musengwa Katonda yalekulira agho ensi yaife, era tatubona.’

¹⁰ Aye tirisaasiraku naire omulala ati, oba okumugemerwa ekivunika. Ndibeesasuulizaaku olw'ebyo bye baakola.”

¹¹ Agho omuntu ole eyali avaire engoye empegheevu era ng'ali n'ebintu eby'okughandiikisa, yaiza obukwenda bwe ati: “Nkoze nga bw'ondagiire.”