Ezekieli 8 - Baibuli Ekibono kya Katonda 2014

Ezekieli abonekerwa omukuzi ogwokubiri 8:1—10:22 Okusinza ebitali Katonda okwali mu Yerusalemu

¹ Ku lunaku olwokutaanu mu mwezi ogwomukaaga, mu mwaka ogwomukaaga nga tuli mu bunhage, nali nga ntyaime mu ndhu yange aghalala n'abakulembeze ab'abanhage abaava e Buyudaaya. Agho amaani ga Musengwa Katonda gandhikaku.

² Naja okulinga nti nga mbona ekiri ng'oti muntu, aye nga okuva aghaaboneka ng'oti n'enkende ye okwika ghansi, yali afaanana ng'oti muliro. Ate okuva aghaaboneka ng'oti n'enkende ye okuja ghaigulu, yali amesunkana ng'oti n'ekyuma eky'ekikomo ekizigule.

³ Agho yaagolola ekyaboneka okuba ng'oti n'omukono gwe, yaavuunhia enviiri edh'oku mutwe gwange, yambeedera ku nviiri edho naalengeedhera okwo. Era nga nkaali mu kubonekerwa kwa Katonda okwo, omwoyo gwa Katonda gwambeedera mu mpewo gwantwala e Yerusalemu. Gwantuusa ku mulyango ogwingira mu luya olw'eisinzizo olw'omunda olwali ku luuyi olw'omukono omugooda olw'e buvandhuba. Mu luya olwo n'omwali ekifaananie abantu kye baasinzanga ni basungughaza Katonda einho, ni bamuleetera okuba n'enkikidi.

⁴ Bwe nali ndi eyo, naja okulinga nti nga mbona okumesunkana okw'ekitiisa kya Katonda wa Isiraeli, ng'oti ni bwe nakubona nga ndi mu kiketezo eky'oku museetwe.

⁵ Katonda oyo yankoba ati: “Iwe omuntu, lingirira ku luuyi olw'omukono omugooda olw'e buvandhuba.” Agho naalingirira ku luuyi olw'omukono omugooda olw'e buvandhuba. Era okuja okulinga nti nga mbonayo ekifaananie abantu kye baasinzanga ni basungughaza Katonda einho, ni bamuleetera okuba n'enkikidi. Kyali agho gha mulyango ogw'oku luuyi olw'omukono omugooda olw'e buvandhuba, okumpi ni alutaari.

⁶ Era Katonda yankoba ati: “Iwe omuntu, oli kubona bye bali kukola? Oli kubona ebyenhinhalwa ebibitiriire, Abaisiraeli bye bali kukolera ghano, ebindeetera okwesamba eisinzizo lyange ni mba eghala einho nalyo? Aye ate oidha kubona ebyenhinhalwa ebibitiriire einho ebisinga n'agho.”

⁷ Agho yantwala ku mulyango ogw'oluya olw'okuliya. Naja okulinga nti nga mbona ekituli mu kisenge.

⁸ Yankoba ati: “Iwe omuntu, womola agho mu kisenge ekyo.” Naakiwomola era okuja okulinga nti nga mbona omulyango.

⁹ Agho yankoba ati: “Ingira obone ebyenhinhalwa ebitoogerekeka bye bakolera ghano.”

¹⁰ Kale naingira, naabona ng'ebimante byonabyona baabitonatona n'ebifaananie eby'ebitonde ebyeghaluliza ku itaka ebya buli nsambo, n'eby'ensolo edhitali nongoofu, n'eby'ebintu ebindi Abaisiraeli bye baasinzanga.

¹¹ Era naabona abandi ku bakulembeze ab'eighanga lya Isiraeli nsanvu nga beemereire omwo, nga n'omuli ni Yaazania mutabane wa Shafani. Buli mulala yali agemye ekiniokezebwamu obubbaani, era ng'ebiniokezebwamu obubbaani ebyo birikuvaaku omwosi gwaja ghaigulu.

¹² Katonda yankoba ati: “Iwe omuntu, oboine abakulembeze ab'eighanga lya Isiraeli bye bali kukola mu nzikiiza? Buli muntu ali kusinziza mu kisenge omuli ebifaananie. Bakoba bati, ‘Musengwa Katonda tatubona, era yalekulira agho ensi yaife.’ ”

¹³ Katonda era yankoba ati: “Oidha kubona ebyenhinhalwa ebibitiriire einho ebisinga n'agho, bye bakola.”

¹⁴ Agho yantwala gha mulyango ogw'eisinzizo lya Musengwa Katonda ogwali ku luuyi olw'omukono omugooda olw'e buvandhuba. Okuja okulinga nti nga mbonayo abakazi abatyaime nga bali kulira Omusambwa ogwetebwa Tammuza.

¹⁵ Yambuuza ati: “Iwe omuntu, oboine ebyo? Oidha kubona ebyenhinhalwa ebibitiriire einho ebisinga n'agho.”

¹⁶ Kabiri yantwala mu luya olw'omunda olw'eisinzizo lya Musengwa Katonda. Okuja okulinga nti nga mbona gha mulyango ogw'eisinzizo eryo erya Musengwa Katonda, ghagati gh'ekisasi ni alutaari, nga ghaligho abantu ng'oti amakumi abiri na bataanu (25). Baali nga bakubye eisinzizo lya Musengwa Katonda omugongo, nga balingiriire e buvandhuba, era nga bali kusinza endhuba eri kuvaayo.

¹⁷ Musengwa Katonda era yambuuza ati: “Iwe omuntu, oboine ebyo? Abantu b'omu Buyudaaya bakibona nga kintu kitono inho okukola ebyenhinhalwa ebyo bye bakola ghano. Bongera okwo n'okwidhuza ensi eno ebikolwa eby'obukambwe, era bansoononkereza nhongere okubasungughalira. Kale bona nga bwe bandhooga mu nsambo esingayo kuba ya bunhoomi.

¹⁸ Kale ni ndibakolaku n'ekiruyi ekindiku. Tirisaasiraku naire omulala ati oba okumugemerwa ekivunika. Era ni bwe balinsaba nga baleekaanira ghaigulu, tija kubawulira naire.”