Ezekieli 7 - Baibuli Ekibono kya Katonda 2014

Enkomerero y'Abaisiraeli eri kumpi

¹ Musengwa Katonda yaayogera ninze, yankoba ati:

² “Iwe omuntu, nze Musengwa Katonda ndi kukoba ensi Isiraeli nti: Enkomerero etuuse! Enkomerero ey'ensi Isiraeli yoonayoona etuuse!

³ “Imwe Abaisiraeli, enkomerero ebatuuseeku. Nja kubamaliraku obusungu bwange, mbasalire omusango nga njiira ku ebyo bye mwakola, era mbabonereze olw'ebibi byonabyona ebyenhinhalwa bye mwakola.

⁴ Tija kusaasiraku naire omulala ati oba okumugemerwa ekivunika. Nja kubabonereza olw'ebibi byonabyona ebyenhinhalwa bye mwakola. Olwo mumanhe nga ninze Musengwa Katonda.”

⁵ Musengwa Katonda akoba ati: “Bona, akabi akomwidhirano kaidha kubaidhira nga kano kaba kaakamala okuvaagho, kabiri ng'akandi kaidha!

⁶ Bona, enkomerero etuuse. Bwenebwene ebaidhiire era yiiyo etuuse.

⁷ Imwe abatyamye b'omu nsi eno, akabi kabaidhiire. Ekiseera kituuse era olunaku luseese, olunaku olw'entiisa enene, se ti olw'okukubiraku emizira ghaigulu ku nsozi.

⁸ “Buti ndi kumpi okubamaliraku ekiruyi kyange, mboolekeze obusungu bwange. Olwo mbasalire omusango nga njiira ku neebisa yaimwe, era mbabonereze olw'ebibi bye mwakola ebyenhinhalwa.

⁹ Tija kusaasiraku naire omulala ati oba okumugemerwa ekivunika. Nja kubabonereza olw'ebibi byonabyona ebyenhinhalwa bye mwakola. Olwo mumanhe nga ninze Musengwa Katonda, era nga ninze abonereza.”

¹⁰ Bona, olunaku luuluno lutuuse, olunaku olw'akabi! Obutajiira ku mazima bweyongeire, n'okwekuluntaza kwabitirira.

¹¹ Ebikolwa eby'obukambwe byeyongeire, ekyo kyaleetera abantu okukola akabi ku bandi. Aye ku bye bali nabyo byonabyona ghazira kirisigalagho, ka bibe ebintu byaibwe ebingi, oba obukombe bwaibwe, oba ebitiibwa byaibwe.

¹² Ekiseera kituuse, olunaku lutuuse, omuguzi alekere okusagamba, n'omutunzi alekere okulira amaziga kuba boonaboona Katonda abasungughaliire.

¹³ Omutunzi talighangaala kusobola kwizaagho bintu by'afiiriirwa, kuba boonaboona Katonda abasungughaliire. Olw'ebibi byaibwe ghazira alisigalagho ng'akaali mulamu.

¹⁴ Eigwala livuze basobole okutegekebwa, aye ghazira ali kuseguka kuja mu lutalo kuba boonaboona Katonda abasungughaliire.

Katonda abonereza Abaisiraeli olw'ebibi byaibwe

¹⁵ Abantu abaliba kuliya baliitagana, n'abaliba mu ndhu baafa endwaire ya kawumpuli n'endhala. Abaliba mu byalo baliitagana, ate abaliba mu kibuga baafa kulambuka ndhala na ndwaire ya kawumpuli.

¹⁶ Aye abaliwonagho balirumukira mu nsozi, baaba ng'oti n'amayemba ag'omu biiko agatiire ni galumukayo. Boonaboona baliba mu kulira maziga, nga buli muntu alira olw'ebibi bye.

¹⁷ Amakono gaibwe galibalebera, n'ebikiryaivu byaibwe byabadhugumira.

¹⁸ Balivaala ekutiya baadhugumira olw'okutya, baamwa emitwe gyaibwe okugimaliriraku enviiri ng'oti mpaata, n'ensoni dhaabagema baaswala.

¹⁹ Balisuula ere feeza waibwe mu nguudo, baasuula n'ere zaabu waibwe ng'oti n'ekintu ekitagasa naire kuba feeza ni zaabu tibirisobola kubanunula ku lunaku Musengwa Katonda lw'aliragiraku obusungu bwe. Era tibirisobola kubaigusa mu kwegomba kwaibwe waire okubaigusa ni bibamalaku endhala okubaluma, kuba byene ebyo n'ebyabaleeteranga okwekontola ni bagwa mu kwonoona.

²⁰ Ebyamadholobera byaibwe ebyabonekanga obulungi era nga bibeeyagaza, baabigheesaamu bwa bifaananie ebyenhinhalwa ebiziramu muganhulo naire. Kale ni, Musengwa Katonda kyaviire n'abireetera okubafuukira ebitali birongoofu.

²¹ Musengwa Katonda akoba ati: “Ndireka abagwira n'abakozi b'ebibi, baanhagulula eby'obukombe ebyo era baabireetera okuba ebitali birongoofu.

²² Tiribakobaku naire, nga bali kwonoona eisinzizo lyange eitukuvu. N'abanhazi boona balingira mu isinzizo lyange eryo baalyonoona

²³ era baalireka nga liri bifulukwafulukwa. “Olw'okuba ensi yaimwe eidhwire ebikolwa eby'obutemo n'ekibuga kyaidhula ebikolwa eby'obukambwe,

²⁴ ndireeta amaghanga agasingayo okuba amabi einho gaatwala endhu dhaimwe, dhaafuuka dha bantu baago. Ndinafuya abalwani baimwe ab'amaani, naaleetera amaghanga ago okwonoona ebifo byaimwe ebitukuvu.

²⁵ Okuzikirira kuukwo kuli kwidha. Mulinoonia emiraala aye nga ghazira ghe giri.

²⁶ Akabi olulibanga okuvaagho kati ng'akandi kairagho, era mulibanga mwakamala okuwulira olubono olwogeirwa nga kabiri muwulira n'olundi. Mulisaba abalanzi babakobere bye bafunie mu kubonekerwa. Bakabona baliba tibakaali na mateeka ge basomesa bantu, n'abantu abakulu balibulwa amagezi ge bagha.

²⁷ Kyabazinga alirira amaziga, abakungu bawaamu eisuubi, n'abantu boonaboona baadhugumira olw'okutya. Ndibabonereza nga njiira ku bye mwakola, era ndibasalira omusango nga bwe mwagusalira abandi. Olwo mwenamwena mulimanha nga ninze Musengwa Katonda.”