Ezekieli 6 - Baibuli Ekibono kya Katonda 2014

Musengwa Katonda avumirira okusinza ebitali Katonda

¹ Musengwa Katonda yaayogera ninze, yankoba ati:

² “Iwe omuntu, amaiso go galingirize ku nsozi edh'omu Isiraeli, olange akabi akali kudhiidhira.

³ Okobe ensozi edho edh'omu Isiraeli, dhiwulire nze Musengwa Katonda bye ndi kukoba ensozi n'obusozi, aghalala n'obwinhamo n'ebiiko: Bona eno, nze mwene, ninze ndisindika entalo okuzikiriza ebifo ebigulumivu abantu bye basinzizaamu ebitali Katonda.

⁴ Alutaari dhaibwe dhirisigala bw'agho bifulukwa, n'edho edhiniokezebwaku obubbaani dhoona dhaamenhebwamenhebwa. Emirambo egy'abantu abaliitibwa girisuulibwa agho mu maiso ag'ebisinzibwa byaibwe ebitali Katonda.

⁵ Ndibunga emirambo egy'Abaisiraeli mu maiso ag'ebisinzibwa byaibwe ebitali Katonda, era naasansaania amagumba gaibwe okwezunguluza alutaari dhaibwe.

⁶ Ebibuga eby'omu Isiraeli byonabyona birizikirira, n'ebifo ebigulumivu abantu mwe basinziza byasigala bw'agho nga bifuuse bifulukwa byereere. Alutaari dhaibwe dhiryonoonebwa okuweekereragho, n'ebifaananie byaibwe bye basinza ebitali Katonda byamenhebwamenhebwa okusaanizibwagho. Ni alutaari dhaibwe edhiniokezebwaku obubbaani, dhoona abazigu balidhikontakonta baadhimaniangula, era baayeyaagho ebintu byonabyona abantu b'omu Isiraeli abo bye baakola.

⁷ Buli ghantu ghalibaagho abantu abaitiibwa, olwo abantu baamanha nga ninze Musengwa Katonda.

⁸ “Aye ndirekaghooku abandi abaliwona okwitibwa, naabasansaaniza eyo mu maghanga,

⁹ baaba eyo mu bunhage. Abo balindidhukira nga bali eyo era baamanha nga bwe namenha emyoyo gyaibwe egitali myesigwa egyanvaaku, ni giira ku kusinza ebifaananie ebitali nze Katonda. Kale balituuka beene okwesinwa olw'ebibi byaibwe, n'olw'ebyenhinhalwa bye bakola.

¹⁰ Baliimanha nga ninze Musengwa Katonda, era nga bwe nabalabula nti nja kubabonereza nali tiri kudhondha budhondhe.”

¹¹ Musengwa Katonda yaakoba ati: “Kuba mu ngalo, era osaamire ebigere ghansi, olire n'enaku olw'ebibi byonabyona ebyenhinhalwa, Abaisiraeli bye baakola kuba baja kufiira mu lutalo, oba okufa endhala, oba okufa endwaire ya kawumpuli.

¹² Abo abali eghala baja kufa endwaire ya kawumpuli abo abali okumpi bafiire mu lutalo ate abo abaliwonagho balambuke endhala bafe. Ntyo bwe ndibamaliraku ekiruyi kyange.

¹³ Emirambo gy'abo abaitiibwa girigwa bw'agho gityo ghagati mu bisinzibwa ebitali Katonda, okwezunguluza alutaari dhaibwe. Era gityo bwe girigwa ku buli kasozi kagungumavu, na buli ku ngulu kwa lusozi lunene, na buli ghansi gha muti mukologho muzibirivu, na buli mu kifo abantu kye baajangamu okughaayo ebigheebwayo eby'obuwoowo obusangaaza. Olwo abantu boonaboona baamanha nga ninze Musengwa Katonda.

¹⁴ Ndigolola omukono gwange naababonereza, era naazikiriza ensi yaibwe yaafuuka bifulukwa, okuviira irala ku irungu okutuukira irala e Ribula. Olwo abantu boonaboona baamanha nga ninze Musengwa Katonda.”