Ezekieli 47 - Baibuli Ekibono kya Katonda 2014

Omwiga ogukuuluula okuva mu isinzizo

¹ Agho omusaadha yandhizaayo ku mulyango ogw'eisinzizo. Okuja okulinga nti nga mbona amaadhi gali kuva ghansi gh'omulyango ogwo, gaakuuluula nga gaja e buvandhuba eisinzizo ye lyalingirira. Amaadhi ago gaali gali kuviira ghansi ku luuyi olw'omukono omusaadha olw'e buvandhuba w'eisinzizo, nga gali kujiira ku luuyi lwene olwo olw'omukono omusaadha olw'e buvandhuba olw'alutaari.

² Agho yanfulumya nga tubitira mu mulyango ogw'oku luuyi olw'omukono omugooda olw'e buvandhuba, yantwala yaneetolooza eyo kuliya, yantuusa ku mulyango ogw'okuliya ogulingiriire e buvandhuba. Naabona amaadhi nga gali kukuuluula nga gava ku luuyi olw'omukono omusaadha olw'e buvandhuba olw'omulyango ogwo.

³ Agho omusaadha yaakozesa olupimo, yaapima obuleeyi bwa mita ebikumi bitaanu (500), ng'ali kujiira ku luuyi olw'e buvandhuba amaadhi ye gaali gali kuja. Yaamala yambisa mu maadhi ago, nga gatuuka mu bukongoivule.

⁴ Yaapima obuleeyi obundi nga bwona bwa mita ebikumi bitaanu (500). Era yaamala yambisa mu maadhi ago, nga gatuuka mu bivu. Kabiri yaapima obuleeyi obundi nga bwona bwa mita ebikumi bitaanu (500). Era yaagambisaamu nga gatuuka mu nkende.

⁵ Kabiri era yaapima obuleeyi obundi nga bwona bwa mita ebikumi bitaanu (500). Agho gwali gufuuse mwiga gwene nga tisobola kugutambulamu, kuba amaadhi gaali maleeyi inho. Omuntu nga tasobola kugatambulamu okutoolaku nga yeewuze bwewuge.

⁶ Yankoba ati: “Iwe omuntu ebyo obiboine?” Agho yandhizaayo nga tubitira ku mbali okw'omwiga ogwo.

⁷ Naabona nga ku mbali ni ku mbali okw'omwiga ogwo kuliku emiti kamaala.

⁸ Agho yankoba ati: “Amaadhi ago gakuuluula nga gaja mu biketezo eby'e buvandhuba ebiri mu kiiko ekirimu omwiga Yorudani. Bwe gatuuka mu maadhi ag'omu nhandha, galongoosa amaadhi ago ag'omu nhandha gaafuuka malungi.

⁹ Amaadhi ago ag'omu mwiga ogwo, buli ye galikuuluulira eribaayo ebitonde ebiramu kamaala, yaabaayo ebyenhandha kamaala, era buli kintu ekiriba eyo kirifuna obulamu kuba galirongoosa amaadhi ag'omu nhandha gaafuuka malungi.

¹⁰ Abavubi baliba ku mbali okw'omwiga ogwo, okuva mu kiketezo ekyetebwa Engedi okutuukira irala ku kyetebwa Enegulaimu. Balyanikanga okwo obutimba bwaibwe bwakala. Era ebyenhandha biriba eyo bya bika kamaala ng'oti n'ebiri mu Nhandha Eyaghagati.

¹¹ Aye amaadhi ag'omu bibali ni mu bidiba ebiriba ku mbali okw'enhandha, tigalirongoosebwa kufuuka malungi. Galisigala nga ga muunhu.

¹² Ku mbali ni ku mbali okw'omwiga ogwo kulimeraku emiti egya buli nsambo, nga gibalaku ebibala ebiriibwa. Amakaba g'emiti egyo tigalinialanga, era emiti egyo tigirirekeranga kutaaku bibala. Giidha kutangaku ebibala ebiyaaka buli mwezi, olw'okuba ginhwa amaadhi agava mu isinzizo. Ebibala byagyo binaabanga mere, n'amakaba gaagyo gaabanga bulezi obuwonia.”

Ensalosalo edh'ensi Isiraeli

¹³ Agho Musengwa Katonda yaakoba ati: “Dhino n'ensalosalo edh'ensi ey'ensikirano ye muligabania mu bika eikumi n'ebibiri eby'Abaisiraeli aye ekika kya Yosefu nga kifuna emigabo ebiri.

¹⁴ Nalayirira badhaadha baimwe okubagha ensi eno. Kale mugigabananga nga mwazayaza, yaafuuka eyaimwe ey'ensikirano.

¹⁵ “Ensalosalo dhaayo dhiriba dhiti: Ku luuyi olw'omukono omugooda olw'e buvandhuba, ensalosalo eriva ku Nhandha Eyaghagati yaabitira e Hethiloni, yaatuuka gh'oingirira e Hamathi, yaatuuka e Zedadi,

¹⁶ n'e Berotha, n'e Siburaimu ekiri ku nsalosalo eyawula ekiketezo eky'e Damasiko n'eky'e Hamathi, yaaja yaatuuka e Hazeri Hattikoni ekiri ku nsalosalo ni Haurani.

¹⁷ Kale ni ensalosalo eyo ey'oku luuyi olw'omukono omugooda olw'e buvandhuba etyo bw'eriba ng'eva ku Nhandha Eyaghagati, yaaja yaatuuka e Hazari Enoni ekiri ku nsalosalo y'ekiketezo ky'e Damasiko n'eky'e Hamathi, ku luuyi olw'omukono omugooda olw'e buvandhuba.

¹⁸ “Ku luuyi olw'e buvandhuba, ensalosalo eriva e Hazari Enoni, ekiri ghagati gh'e Haurani n'e Damasiko, yaaja ng'enonereza omwiga Yorudani ghagati gha Gileadi n'ensi Isiraeli. Agho yeeyongerayo ku Nhandha Eyomuunhu e buvandhuba, yaatuuka e Tamari.

¹⁹ “Ku luuyi olw'omukono omusaadha olw'e buvandhuba, ensalosalo eriva e Tamari yaaja yaatuuka ku maadhi ag'e Meriba mu Kadeshi. Era erija nga yeeyongerayo, ng'enonereza akaiga ak'e Misiri okutuuka ku Nhandha Eyaghagati.

²⁰ “Ku luuyi olw'e bugwandhuba, Enhandha Eyaghagati n'eriba ensalosalo okuva ku nsalosalo ey'oku luuyi olw'omukono omusaadha olw'e buvandhuba okutuuka aghangirirwa e Hamathi.

²¹ “Kale muligabana ensi eyo Isiraeli nga mujiira ku bika byaimwe,

²² yaaba yaimwe ey'ensikirano. N'abagwira abaasenga mu imwe era ni bazaalira mu imwe n'abaana, boona balifuna omugabo ng'Omuisiraeli owundi yeenayeena.

²³ Omuntu omugwira ekika ky'aliba asenzeemu, mw'alifuna omugabo gwe ogw'ensikirano. Nze Musengwa Katonda ninze nkobye.”