Ezekieli 44 - Baibuli Ekibono kya Katonda 2014

Enkozesa ey'omulyango ogw'e buvandhuba

¹ Agho omusaadha yandhizaayo ku mulyango ogw'okuliya ogwalingiriranga ku luuyi olw'e buvandhuba. Omulyango ogwo gwali mwigale.

² Musengwa Katonda yankoba ati: “Omulyango guno guja kusigala nga mwigale, tiguja kwigulwa era ezira muntu yeenayeena aligubitamu ngaingira, kuba nze Musengwa Katonda wa Isiraeli ngubiseemu nga nhingira. Olw'ekyo guja kusigala nga mwigale.

³ Omufuzi anaabangagho mu kiseera ekyo, yenka n'anaagubitangamu okuja okulya ku kiiwulo ekitukuvu mu maiso gange nze Musengwa Katonda. Aidha kwingiriranga mu kisasi eky'oku mulyango, era yeene eyo y'aidha okufulumiranga.”

Amateeka agagema ku kwingira mu isinzizo

⁴ Agho omusaadha yambisa mu mulyango ogw'oku luuyi olw'omukono omugooda, yantwala emberi w'eisinzizo. Okuja okulinga nti nga mbona okumesunkana okw'ekitiisa kya Musengwa Katonda kubunie eisinzizo. Agho naakuba amakiryaivu era naakutama n'ekyeni kyatuuka ku itaka.

⁵ Musengwa Katonda yankoba ati: “Iwe omuntu, weetegereze inho by'oli kubona n'amaiso go ni by'oli kuwulira n'amatu go, otegeere ebiragiro n'amateeka bye nja okukukobera, ebigema ku isinzizo. Weetegereze bantu ki abaikirizibwa okwingira mu isinzizo, n'abo abataikirizibwa kwingira mu Kifo Kitukuvu.

⁶ Kobera abantu b'eighanga Isiraeli, abadheemu abo, oti nze Musengwa Katonda ndi kubakoba balekere agho okukola ebyenhinhalwa.

⁷ Boonoona eisinzizo lyange eitukuvu nga baganha abagwira abatali bakekete okulingiramu. Abantu abo abatajiira ku mateeka gange naire, baja baingira mu isinzizo nga n'abantu bange bali kughaayo ye ndi amasavu n'omusaayi, ebiva mu misengo gye bampeereza. Olwo abantu bange abo baamenha endagaano yange olw'ebyenhinhalwa ebyo byonabyona abantu abo bye bakola.

⁸ Baaloba okukuuma ebintu byange ebitukuvu beene, aye baabitaaku bwa bantu bagwira babibakuumire.

⁹ “Kale ni, nze Musengwa Katonda nsazeegho nti ezira mugwira yeenayeena ataakeketebwa era atajiira ku mateeka gange, anaikirizibwanga kwingira mu isinzizo lyange, waire omugwira oyo aba aghalala n'abantu bange Abaisiraeli.”

Katonda atoola Abalevi ku bwakabona

¹⁰ Agho Musengwa Katonda yankoba ati: “Nze Musengwa Katonda ndidha kubonereza Abalevi abo abanvaaku ni badaaliima ghalala ni Baisiraeli banaibwe, ni baja okusinza ebitali nze Katonda.

¹¹ Banaabanga bakuumi ba miryango gya isinzizo lyange, nga bakola n'emirimo egindi ng'oti ni gino: okwitanga ebyo abantu bye baleeta ng'ebigheebwayo eby'emisengo egyokebwa, n'okugheerezanga abantu abo.

¹² Aye olw'okuba baayambanga abantu mu kusinza ebitali nze Katonda, baaleetera eighanga Isiraeli okwonoona, nze Musengwa Katonda kye nviire neerayirira okubabonereza.

¹³ Tibaidha kuseetanga ye ndi kumpeereza nga bakabona, waire okwingira mu Kifo Ekitukuvu, oba okuseeta obuseete kumpi n'ebintu byange ebitukuvu. Baliba bwa mu kuswala nga babonerezebwa olw'ebyenhinhalwa bye baakola.

¹⁴ Aye ate nja kubagha ogw'okulabirira eisinzizo n'okukola emirimo gyamu gyonagyona.”

Bakabona

¹⁵ Musengwa Katonda era yaakoba ati: “Aye ghaligho bakabona Abalevi ab'oku nda ya Zadoki, abaasigala nga bakampeereza mu isinzizo lyange n'obwesigwa mu kiseera Abaisiraeli abandi boonaboona kye banviiraku ni badaaliima. Bakabona abo n'abaidha okumpeerezanga nga baseeta ye ndi okughaayo amasavu n'omusaayi eby'emisengo.

¹⁶ Abo bonka n'abaidha okwingiranga mu isinzizo lyange okumpeereza ku alutaari yange entukuvu, era baidha kutuukirizanga bye mbalagira.

¹⁷ Bwe banaabanga nga baja okwingira mu luya olw'omunda, baidha kuvaalanga engoye empegheevu. Tibaidha kuvaalanga kintu kyonakyona kyakolebwa mu buviiri bwa ntaama, nga bali kugheereza mu luya olw'omunda oba mu isinzizo mwene.

¹⁸ Baidha kwesibanga ku mitwe ebitambaala by'olugoye olughegheevu, bavaalenga n'empale nga dhoona dha lugoye lughegheevu. Tibaidha kuvaalanga kintu kyonakyona kibaleetera kugezimula.

¹⁹ Bwe banaabanga nga bafuluma okuja mu luya olw'okuliya eri abantu, baidha kutoolangamu ebivaalo bye bakozesa mu kugheereza babirekenga mu bisenge ebitukuvu, bamale baavaalenga ebivaalo ebindi. Olwo ebivaalo byaibwe ebitukuvu birobenga kukola kabi ku bantu.

²⁰ “Bakabona tibaidhanga kumwa nviiri ku mitwe gyaibwe kudhimaliriraku, waire okudhirekanga okuleegha inho, aye baidha kudhisalangaku busale dhibenga nhimpiyimpi.

²¹ Kabona taidha kwingiranga mu luya lwa munda ng'anhweire omwenge.

²² Kabona taafumbirwenga mukazi eyanoba, oba ye baabinga mu irya. Aidha kufumbirwanga mughala Muisiraeli omwegha, oba namwandu ow'eyali kabona eyafa.

²³ “Bakabona banaayegeresanga abantu bange okwawulagho ebintu ebitukuvu n'ebitali bitukuvu, n'okwawulagho ebirongoofu n'ebitali birongoofu.

²⁴ Bwe ghanaabangagho enkaayana mu bantu, bakabona n'abanaalamulanga nga bajiira ku mateeka gange. Baidha kukuumanga embaga edh'ebibinuko byange bye nalagira, n'enaku dhange edha Sabbato entukuvu, nga bajiira ku mateeka gange n'ebiragiro byange.

²⁵ “Kabona taidhanga kuseeta ku muntu afiire, olwo alobe kwereeteranga okuba atali mulongoofu. Okutoolaku ng'omuntu oyo abaire ise, oba inhina, oba omwana we, oba muganda we, oba mwanhina atali mufumbo.

²⁶ Bw'anaamalanga okwiramu okuba omulongoofu, anaabisangagho enaku musanvu,

²⁷ memale yaaghangayo ekigheebwayo olw'ebibi ekikye, ku lunaku lw'anaingirirangaku mu luya olw'omunda olw'eisinzizo okugheereza. Nze Musengwa Katonda ninze nkobye.

²⁸ “Bakabona tibaabenga na kintu kyonakyona kya nsikirano. Nze Musengwa Katonda ninze obusika bwaibwe. Era mutabaghanga mugabo gwonagwona mu Isiraeli. Nze ninze omugabo gwaibwe.

²⁹ Baidha kulyanga ebyo abantu bye banaaleetanga, ng'ebigheebwayo eby'emere ey'empeke, ebigheebwayo olw'ebibi, n'ebigheebwayo ng'omutango. Na buli kintu kyonakyona ekinaagheebwangayo mu Isiraeli okuba ekyange kinaabanga kyaibwe.

³⁰ Ku bintu bye musooka okukungula byonabyona, ni ku bintu bye mughaayo ye ndi, mwidha kutoolangaku ebisinga bulungi bibenga bya bakabona. Era mwidha kubaleeteranga n'engaano ye munaasookanga okukanda, olwo enkabi dhibenga mu maka gaimwe.

³¹ Kabona taalyenga ku mamba ya nsolo oba ya nhonhi efiire yeene, waire eyo eitiibwa ensolo eyindi.”