Ezekieli 43 - Baibuli Ekibono kya Katonda 2014

Musengwa Katonda aira mu isinzizo

¹ Omusaadha yaamala yantwala ku mulyango ogwalingiriranga ku luuyi olw'e buvandhuba.

² Okuja okulinga nti nga mbona okumesunkana okw'ekitiisa kya Katonda wa Isiraeli, nga kuli kuva e buvandhuba. Yaidha n'omuvuuma nga guli ng'oti mpiriito ya maadhi, ensi yaayakaayakana olw'ekitiisa kye.

³ Okubonekerwa okwo kwali ng'oti ni kwe nabonekerwa Katonda oyo lwe yaidha okuzikiriza ekibuga Yerusalemu. Era ng'oti ni kwe nabonekerwa nga ndi ku mwiga Kebari. Agho naakuba amakiryaivu era naakutama n'ekyeni kyatuuka ku itaka.

⁴ Okumesunkana okw'ekitiisa kya Musengwa Katonda kwangira mu isinzizo nga kubitira mu mulyango ogwalingiriranga ku luuyi olw'e buvandhuba.

⁵ Era omwoyo gwa Musengwa Katonda oyo gwambeeda gwantwala mu luya olw'omunda. Okuja okulinga nti nga mbona okumesunkana okw'ekitiisa kya Musengwa Katonda kubunie eisinzizo.

⁶ Agho omusaadha ole ng'ayemereire ghe ndi, naawulira ankoba ng'ali mu isinzizo ati:

⁷ “Iwe omuntu, kino n'ekifo ekibaamu ekityamo kyange eky'obwakyabazinga, ekifo mwe nnaabanga nga ndi mu bantu bange Abaisiraeli okubafuganga ebyanda n'ebyanda. Ka babe abantu beene ab'eighanga Isiraeli oba bakyabazinga baibwe, ghazira aliirayo kabiri kwonoona liina lyange eitukuvu, n'anvaaku kusinza bintu ebitali nze Katonda, oba okuzimbira emirambo gya bakyabazinga ebiidhukizo

⁸ kuba bakyabazinga baazimba ebisaagaati byaibwe eby'obwakyabazinga nga baliinaania emiryango gyabyo n'endhigi dhaabyo kumpi n'emiryango n'endhigi eby'eisinzizo lyange. Olwo nga kimante bumante n'ekitwawula nze nabo. Baayonoona eriina lyange eitukuvu olw'ebyenhinhalwa bye baakola. Kyenava ni mbazikiriza n'obusungu.

⁹ Kale ni, bwe banaalekera okusinza ebitali nze Katonda, ni batoolagho n'ebiidhukizo by'emirambo gya bakyabazinga baibwe, olwo ndidha kubabangamu ebyanda n'ebyanda.”

¹⁰ Era yankoba ati: “Iwe omuntu, inhonhola abantu b'eighanga Isiraeli ebigema ku isinzizo, basobole okumanha bukalamu nga bwe liri n'enzimba yaalyo. Balumirize ebibi bye baakola, ensoni dhibageme baswale.

¹¹ Bwe banaamala okuswala olwa byonabyona bye baakola, oidha kubainhonhola enfaanana yaalyo, enzimba yaalyo, emiryango egifuluma n'egingira, entegeka yaalyo, ebiragiro n'amateeka gaamu. Ebyo bighandiike nga babona, babyetegereze era bakole ng'amateeka n'ebiragiro byamu bwe bikoba.

¹² Lino n'eiteeka ery'eisinzizo: Ekifo kyonakyona ekyezungulwire eisinzizo agho ku ngulu kw'olusozi, kifo kitukuvu inho. Eryo n'eiteeka ly'eisinzizo.”

Alutaari

¹³ Bino n'ebipimo eby'alutaari, era nga bye baakozesa ni mu kupima eisinzizo. Ekikolo kyayo kw'etyama kyaliku olukonko lwa sentimita amakumi ataanu mu buleeyi, era nga ni mu bugazi lwa sentimita amakumi ataanu. Ghaigulu olukonko olwo lwabaaku omugo okugyezunguluza nga gugheza sentimita amakumi abiri na itaanu obugulumivu.

¹⁴ Okuva ku kikolo kyayo kw'etyama okutuuka ku mugo ogwa ghansi, ghaaligho obugulumivu bwa mita ndala, n'obugazi bwa sentimita amakumi ataanu. Ate okuva ku mugo omutono okutuuka ku mugo omunene, ghaaligho obugulumivu bwa mita ibiri (2), n'obugazi bwa sentimita amakumi ataanu (50).

¹⁵ Ekitundu eky'alutaari eyo ekya ghaigulu ekyokerwaku emisengo, kyali n'obugungumavu bwa mita ibiri. Buli nsonda ng'eriku eiyiga ng'oti lya nsolo, erigheza obuleeyi bwa sentimita amakumi ana na ina (44).

¹⁶ Ekitundu ekya ghaigulu eky'alutaari ekyo, kyali n'endhuyi dhaakyo eina nga dhaagayaga, nga dhiriku mita mukaaga mukaaga mu buleeyi ni mu bugazi.

¹⁷ Omugo ogwali ghagati gh'alutaari eyo, gwona gwali gwagayaga ku ndhuyi dhaagwo eina, nga dhiriku mita musanvu musanvu mu buleeyi ni mu bugazi. Era ng'omugo ogwo guliku olukonko okugwezunguluza olugheza sentimita amakumi ataanu obugazi. Amadaala ge baniiniraku okuja okwokya emisengo ku alutaari eyo gaali ku luuyi olw'e buvandhuba.

Okutukuza alutaari

¹⁸ Agho omusaadha yankoba ati: “Iwe omuntu, Musengwa Katonda akoba ati bino n'ebiragiro ebijiira ku alutaari: Bwe balimala okutaagho alutaari ey'ebigheebwayo ebyokebwa era ey'okumansiraku omusaayi,

¹⁹ bakabona Abalevi ab'oku nda ya Zadoki, nga ni bonka abaseeta ye ndi okumpeereza, olibagha ente enume ng'ekigheebwayo olw'ebibi. Nze Musengwa Katonda ninze nkobye.

²⁰ Olitoola ku musaayi gwayo waagusiiga ku bintu bire ebiri ng'oti mayiga ga nsolo ebiri ku alutaari eyo, waagusiiga ni ku nsonda eina edh'omugo gwayo era ni ku mugo ogwo gwene okugwezunguluza. Mu nsambo eyo oliba ogitoireku okuba nga ti nongoofu, waagitukuza.

²¹ Era olitwala ente eyo enume ey'ekigheebwayo olw'ebibi, baagyokera mu kifo eky'eisinzizo ekyateebwagho okwokerwangamu, kuliya okw'eisinzizo.

²² Ku lunaku olwiririra, olighaayo embuzi enume eziraku kikyamu kyonakyona, yaaba ekigheebwayo olw'ebibi. Olwo alutaari baliba bagitukwiza n'omusaayi gw'embuzi eyo, nga bwe baagitukuza n'ogw'ente enume.

²³ Bw'olimala okutukuza alutaari olitoola mu byayo byo, ente enume eziraku kikyamu kyonakyona n'entaama enume nga yoona eziraku kikyamu kyonakyona,

²⁴ waadhireeta mu maiso gange, nze Musengwa Katonda. Bakabona baadhimansiraku omuunhu, era baamala baadhookya dhaaba ekigheebwayo eri nze Musengwa Katonda ekyokebwa.

²⁵ Olimala enaku musanvu nga buli lunaku otoola mu byayo byo, embuzi, n'ente enume, n'entaama enume, nga dhoonadhoona dhiziraku kikyamu kyonakyona, waadhitaagho dhibe ekigheebwayo olw'ebibi.

²⁶ Bakabona balimala enaku musanvu nga bali kulongoosa alutaari okugitukuza.

²⁷ Bwe balimala okukola batyo mu nnaku omusanvu edho, olwo okuviira irala ku lunaku olwomunaana n'okweyongerayo, bakabona baligheerangayo ku alutaari eyo ebigheebwayo byaimwe ebyokebwa, n'ebigheebwayo olw'okutabagana. Era nze ndibasiimanga imwe abantu bange. Nze Musengwa Katonda ninze nkobye.”