Ezekieli 42 - Baibuli Ekibono kya Katonda 2014

Ebizimbe ebibiri ebyali okumpi n'eisinzizo

¹ Agho omusaadha yantwala mu luya olw'omunda, ku luuyi olw'omukono omugooda olw'e buvandhuba. Yanhingiza mu kizimbe ekyali kiringiriire oluya olw'eisinzizo, era nga kirinzagainia n'ekizimbe ekindi ekyali ku luuyi olw'omukono omugooda olw'e buvandhuba.

² Obuleeyi bw'ekizimbe ekyo bwali mita amakumi ataanu, ate obugazi bwaba mita amakumi abiri na itaanu.

³ Ku luuyi olundi ekizimbe ekyo kyali kiringiriire mu luya lw'eisinzizo olw'omunda, olwali n'obugazi nga bwa mita ikumi. Ate ku luuyi olundi nga kyali kiringiriire amabaale ge baayaliira ku luya olw'eisinzizo olw'okuliya. Baakizimba nga kya kalina isatu nga kalina eya ghansi esingaku yiinaayo egiri ghaigulu obugazi.

⁴ Ku kizimbe ekyo kwaliku ekikuubo nga kiri n'obugazi bwa mita itaanu n'obuleeyi bwa mita amakumi ataanu. Era nga n'emiryango gyakyo giringiriire ku luuyi olw'omukono omugooda olw'e buvandhuba.

⁵ Ebisenge ebyali mu kalina eya ghaigulu byali bifunda okusingaku biinaabyo ebyali mu kalina eya ghansi, kuba embalaza dhe baabitaaku dhaajanga nga dheeyongera okugazigha okuva ghansi okuja ghaigulu mu nsambo eyo dhaaja nga dhikendeeza ku bugazi bw'ebisenge ebyali ku buli kalina.

⁶ Ebisenge ebyali ku kalina edho eisatu tibaabizimbira ku mpango ni dhibigemerera, ng'ebizimbe ebindi ebyali mu luya olwo. Kale ekisenge eky'oku ngulu nga bali n'okukizimbiraku munda, kyaba kifunda okusingaku kiinaakyo kwe baakizimbira eky'oku kalina eya ghansi.

⁷ Emberi w'ebisenge ebyo ghaaligho ekimante nga kirinzagainia n'ebisenge ebyo, era nga kija ng'ebisenge ebyo bwe byajanga, okwolekera oluya olw'okuliya. Obuleeyi obw'ekimante ekyo bwali mita amakumi ataanu.

⁸ Obuleeyi bw'ebisenge ebyali birinzagainia n'ekimante ekyo bwali mita amakumi abiri na itaanu, ate obw'ebisenge ebyali birinzagainia n'eisinzizo bwaba mita amakumi ataanu.

⁹ Ghansi w'ebisenge ebyo ghaaligho omulyango ku luuyi olw'e buvandhuba, nga gwigukira mu luya olw'okuliya,

¹⁰ agho ekimante eky'okuliya ghe kitandiikira. Ku luuyi olw'e buvandhuba olw'eisinzizo yoona yaliyo ekizimbe ng'oti ni kire ekyali ku luuyi olw'e bugwandhuba olw'eisinzizo.

¹¹ Ku kizimbe ekyo kwona kwaliku ekikuubo ng'oti ni kire ekyali ku kizimbe eky'oku luuyi olw'omukono omugooda olw'e buvandhuba. Ebizimbe ebyo byombi byali byagayaga mu buleeyi ni mu bugazi, era n'enzimba yaabyo nga n'endala eyo, ghalala n'emiryango n'endhigi.

¹² Ghaaligho omulyango ogwali ghansi gh'ebisenge by'oku kizimbe ekyo eby'oku luuyi olw'omukono omusaadha olw'e buvandhuba, nga gulingiriire e buvandhuba. Gwali gwigukira mu kikuubo ekyo era nga gulinzagainia n'ekimante ekyali nga n'ekyawulamu.

¹³ Agho omusaadha yankoba ati: “Ebizimbe ebyo byombi ebirinzagainia n'oluya, ku luuyi olw'omukono omugooda olw'e buvandhuba ni ku luuyi olw'omukono omusaadha olw'e buvandhuba, bizimbe bitukuvu. Omwo bakabona abaseeta ye Musengwa Katonda, mwe banaaliiranga ebigheebwayo ebitukuvu einho. Era olw'okuba ebizimbe ebyo bitukuvu, omwo mwe banaaterekanga n'ebigheebwayo ebitukuvu einho: ebigheebwayo eby'emere ey'empeke, ebigheebwayo olw'ebibi, n'ebigheebwayo ng'omutango.

¹⁴ Bakabona bwe banaingiranga mu Kifo Ekitukuvu, tibaakivengamu kuja mu luya lwa kuliya nga tibatoiremu bivaalo byaibwe mwe bagheerereza, kuba ebivaalo ebyo bitukuvu. Banaavaalanga ebivaalo ebindi memale baaja mu kifo abantu abandi ghe beesololeza.”

Ebipimo eby'ekifo ekyalimu eisinzizo

¹⁵ Bwe yamala okupima munda mw'eisinzizo, yanfulumya nga tubitira mu mulyango ogwalingiriranga ku luuyi olw'e buvandhuba. Agho yaapima ekifo ekyalimu eisinzizo okukyezunguluza kyonakyona.

¹⁶ Yaapima oluuyi olw'e buvandhuba n'omwigo ogupima, nga luliku mita ebikumi bibiri n'ataanu (250).

¹⁷ Yaapima oluuyi olw'omukono omugooda olw'e buvandhuba, nga lwona luliku mita ebikumi bibiri n'ataanu (250).

¹⁸ Kabiri yaakyuka yaapima n'oluuyi olw'omukono omusaadha olw'e buvandhuba, era nga lwona luliku mita ebikumi bibiri n'ataanu (250).

¹⁹ Agho yaakyukira ku luuyi olw'e bugwandhuba yaalupima, era nga lwona luliku mita ebikumi bibiri n'ataanu (250).

²⁰ Yaapima endhuyi edh'eisinzizo eryo eina dhoonadhoona. Era eisinzizo eryo lyaliku ekimante nga kiryezungulwire lyonalyona, nga kyagayaga mu buleeyi ni mu bugazi, mita ebikumi bibiri n'ataanu (250), ku mita ebikumi bibiri n'ataanu (250). Ekimante ekyo n'ekyayawulanga ebitukuvu ku bitali bitukuvu.