Ezekieli 41 - Baibuli Ekibono kya Katonda 2014

¹ Agho omusaadha yantwala mu kisenge eky'eisinzizo era nga kyetebwa Ekifo Ekitukuvu. Yaapima emyango egy'oku mulyango ogwingirayo, nga gigheza mita isatu isatu ku luuyi ni ku luuyi.

² Obugazi obw'omulyango gwene bwali mita itaanu, ate ebimante byaku byaba mita ibiri n'ekitundu ku luuyi ni ku luuyi. Ekisenge kyene eky'eisinzizo kyali kigheza mita amakumi abiri mu buleeyi, ate mu bugazi kyagheza mita ikumi.

³ Agho yaaja mu kisenge eky'omunda einho, yaapima emyango egy'oku mulyango gwakyo nga gigheza mita ndala obugazi. Ate obugazi obw'omulyango gwene bwali mita isatu, n'ebimante byaku byaba mita isatu n'ekitundu ku luuyi ni ku luuyi.

⁴ Yaapima n'ekisenge ekyo kyene eky'omunda einho, nga kyagayaga mu buleeyi ni mu bugazi, mita ikumi ku ikumi. Ekisenge ekyo n'ekyali kisinga okuba munda einho. Omusaadha yankoba ati: “Kino n'Ekifo Ekitukuvu Einho.”

Ebisenge bye baazimbira ku kimante eky'eisinzizo

⁵ Agho omusaadha yaapima ekimante eky'eisinzizo, nga kiri n'omubiri gugheza mita isatu. Ku mbali okw'ekimante ekyo baazimbiraku ebisenge okukyezunguluza, nga buli kirala kigheza mita ibiri obugazi.

⁶ Ebisenge ebyo byali bya kalina isatu, era nga buli kalina eriku ebisenge amakumi asatu. Ekimante ky'eisinzizo ku buli kalina gh'etandiikira kyajanga nga kitonigha mu bunene bwakyo, okusinga ku kalina eri ghansi, olwo ebisenge ebyo byasobola okwesigama ku kimante ekyo, nga tibabizimbiireeku.

⁷ Ebisenge ebyabanga mu kalina eri ghaigulu byabanga bigazi okusingaku biinaabyo eby'omu kalina eri ghansi, kuba ekimante ky'eisinzizo kyajanga nga kifundaghala okuja ghaigulu. Obugazi obw'ebisenge kye bwavanga ni bweyongera mu kuja ghaigulu. Era ku mbali kw'ekimante ky'eisinzizo kwaliku amadaala ge baabitangaku okuva ghansi okutuuka ku kalina eya ghaigulu, nga babitira mu kalina eya ghagati.

⁸ Era naabona ng'eisinzizo lyonalyona baalizimba ku ngulu ku kigulumo. Era ng'emisingi gy'ebisenge bya kalina bye baazimbira ku kimante gyali ghaigulu okuva ku itaka mwigo mulamba ogw'emita eisatu.

⁹ Obugazi obw'ebimante eby'okuliya eby'oku bisenge bya kalina ebyo, bwali mita ibiri n'ekitundu. Era okuva ku bimante eby'oku bisenge ebyo

¹⁰ okutuuka ku bisenge bakabona bye baakozesanga, ghaaligho eibanga okwezungulula eisinzizo nga lya bugazi bwa mita ikumi.

¹¹ Ebisenge ebyo bye baazimbira ku kimante eky'eisinzizo, byaliku emiryango nga giigulira mu ibbanga eryo omulyango ogundi nga gulingiriire ku luuyi olw'omukono omusaadha olw'e buvandhuba, ate ogundi gwalingirira ku luuyi olw'omukono omugooda olw'e buvandhuba.

Ekizimbe ekyali e bugwandhuba

¹² Ghaaligho ekizimbe ekyali kiringiriire mu luya olw'eisinzizo, nga kiri mu bugwandhuba bwalyo. Kyali kigheza mita amakumi ana na itaanu (45) obuleeyi, ate obugazi kyagheza mita amakumi asatu na itaanu (35). Ebimante byakyo okukyezunguluza nga biri n'omubiri gugheza mita ibiri n'ekitundu.

Ebipimo byonabyona eby'eisinzizo

¹³ Agho omusaadha yaapima eisinzizo, nga ligheza mita amakumi ataanu obuleeyi. Yaapima n'einhuma w'eisinzizo eryo, yaatwalizaamu n'eibanga eryali agho, okutuukira irala ekizimbe eky'omu bugwandhuba ghe kikanga. Obuleeyi bwagho bwona bwagheza mita amakumi ataanu.

¹⁴ N'obugazi obw'emberi waalyo ku luuyi olw'e buvandhuba ng'otwaliiremu n'oluya, bwona bwali mita amakumi ataanu.

¹⁵ Omusaadha yaapima n'obuleeyi bw'ekizimbe ekyali mu bugwandhuba nga kiringiriire mu luya olw'einhuma w'eisinzizo, yaatwalizaamu n'ebimante byaku eby'oku mbali ni ku mbali. Obuleeyi bwabyo bwona bwaba mita amakumi ataanu. Ekisasi ky'ongiriramu mu isinzizo, n'ekisenge eky'eisinzizo kyene, era n'Ekifo Ekitukuvu einho,

Okwinhonhola ebyali munda mu isinzizo

¹⁶ baali nga baabirimbyaku embaawo okuva ghansi okutuuka agho nga ku madinisa. Era amadinisa ago gaali maghembe gaaku.

¹⁷ Ebimante byonabyona eby'omu isinzizo munda, okuva ghansi okutuuka ghaigulu agh'emiryango, baali nga baabitonaku ebifaananie

¹⁸ eby'ebitonde ebiri n'amaghagha ebyetebwa kerubi, n'ebifaananie eby'emiti eminaazi. Nga bwe bamala okutonaku ekifaananie ekya kikerubi, baizaaku eky'omuti omunaazi, kabiri baizaaku ekya kikerubi, batyo batyo okutuusa ekimante lwe kiwaaku. Buli kikerubi kyali n'obweni bwa mikuzi ebiri.

¹⁹ Era nga bwe bamala okutona ku luuyi luno ekifaananie ekiri n'obweni ng'oti bwa muntu nga bakiringiriiza omuti omunaazi, ate ku luuyi lule batonaku ekiri n'obweni ng'oti bwa mpologoma nga bakiringiriiza omuti omunaazi ogundi ku luuyi lule olundi. Batyo bwe baabikuba okwezunguluza ebimante byonabyona eby'eisinzizo.

²⁰ Okuva ghansi okutuuka ghaigulu gh'emiryango, baatonaku ebifaananie eby'ebitonde ebiri n'amaghagha ebyetebwa kerubi, n'ebifaananie eby'emiti eminaazi.

²¹ Emyango egy'omulyango ogwingira mu isinzizo gyali nga gyonagyona gyagayaga mu buleeyi ni mu bugazi. Emberi gh'omulyango ogwingira mu Kifo Ekitukuvu einho, ghaaligho ekintu ekyafaanana ng'oti

Alutaari ey'embaawo

²² alutaari ya mbaawo. Kyali n'obugulumivu okuja ghaigulu nga bugheza mita isatu, era kyaba n'obuleeyi ghansi nga bwagayaga n'obugazi bwakyo, mita ndala ndala. Kyaliku ebikondo mu buli nsonda nga byonabyona bya muti, era nga mu mbali mwakyo mulimu mbaawo, ni ghansi waakyo woona ghaabaagho mbaawo. Omusaadha yankoba ati: “Eno n'emeeza eba mu maiso ga Musengwa Katonda.”

Endhigi

²³ Ghaaligho olwigi olwingira mu kisenge ky'eisinzizo, ghaabaagho n'olundi olwingira mu Ekifo Ekitukuvu Einho.

²⁴ Buli lwigi nga lulimu ebitundu bibiri ebiigulira ghagati, nga byewuubira ku luuyi ni ku luuyi.

²⁵ Ku lwigi olw'eisinzizo olwo baatonaku ebifaananie eby'ebitonde ebiri n'amaghagha ebyetebwa kerubi, n'ebifaananie eby'emiti eminaazi, ng'oti bwe baakola ku bimante. Era kuliya ghaigulu gh'ekisasi ky'ongiriramu oluya, baalimbyagho embaawo.

²⁶ Ku mbali ni ku mbali okw'ebimante eby'ekisasi ekyo kwaliku amadinisa, munda nga manene aye kuliya gaaja nga gafundaghala. Era kwaliku n'ebifaananie eby'emiti eminaazi.