Ezekieli 40 - Baibuli Ekibono kya Katonda 2014

Okubonekerwa eisinzizo erija okubaagho ye bwidha 40:1—48:35 Ezekieli bamutwala e Yerusalemu

¹ Lwali lunaku lwa ikumi mu mwaka nga gwakatoolera, omwaka ogwamakumi abiri n'etaanu (25) nga tuli mu bunhage, era nga n'ogwali omwaka ogweikumi n'ena (14) kasookanga abazigu bagema Yerusalemu. Ku lunaku olwo naawulira mule ng'amaani ga Musengwa Katonda gandidhieku.

² Era nga ndi mu kubonekerwa, Katonda yambeeda yantwala mu nsi Isiraeli, yandhisa ku lusozi oluleeyi, olwaliku ekyaboneka ng'oti kibuga, nga kiri agho emberi wange.

³ Bwe yamala okundhisa eyo, naja okulinga nti nga mbona omusaadha eyali ali kumirimiinha ng'oti kyuma kya kikomo. Yali agemye oluwuuzi olw'olugoye olughegheevu n'omwigo ogupima, era ng'ayemereire mu mulyango.

⁴ Omusaadha oyo yankoba ati: “Iwe omuntu, lingirira weekalirise bye nja okukwoleka, obitegere amatu, era obiteeku omwoyo kuba ekyo n'ekikuleeteisa ghano mbikwoleke. Bw'onaamala, byonabyona oidha kubikobera ab'eighanga Isiraeli.”

Omulyango ogw'oku luuyi olw'e buvandhuba

⁵ Agho naabona eisinzizo nga baalizimbaku ekimante okulyezunguluza. Omusaadha oyo yaagema omwigo ogupima ogwali gugheza mita eisatu obuleeyi. Yaapima omubiri ogw'ekimante nga gugheza mita isatu, n'obugungumavu bwakyo nga bwona bugheza mita isatu.

⁶ Agho yaaja mu mulyango gwe baalingiriza e buvandhuba, yaaja ng'aniina amadaala gaagwo. Yaapima omulyango ogwo ghe gwingirirwa, nga ghaligho obugazi bwa mita isatu.

⁷ Okweyongerayooku ghaaligho ekikuubo nga kiriku obusenge obw'abakuumi, busatu busatu ku mbali ni ku mbali, nga buli kalala kagheza mita isatu obuleeyi era n'obugazi kaagheza mita isatu. Okuva ku kasenge akandi okutuuka ku kandi nga ghaaligho ekimante ekiri n'omubiri ogugheza emita ibiri n'ekitundu. Okubita ku busenge obwo ghaaligho obuleeyi bwa mita isatu okutuuka ku kisasi ky'ongiriramu mu luya olw'omunda.

⁸ Omusaadha yaapima ekisasi ekyo nga kigheza mita ina obugazi,

⁹ ate ekimante kyakyo nga kiri n'omubiri gugheza mita ndala.

¹⁰ Obusenge obwo obw'abakuumi obwali ku mbali ni ku mbali okw'ekikuubo ekingira mu isinzizo, bwali bwagayaga bwonabwona. Era n'emibiri ogy'ebimante ebyali ghagati ghaabwo ebyabwawulanga, nga gyona gyagayaga.

¹¹ Agho omusaadha yaapima obugazi obw'ekikuubo ekiva gha mulyango okungira mu isinzizo, nga bugheza mita mukaaga n'ekitundu. Ate obugazi obw'omulyango gwene bwali mita itaanu.

¹² Emberi gh'obusenge obw'abakuumi obwali ku mbali ni ku mbali okw'ekikuubo, ghaaligho ebigulumo buli kirala nga kigheza kitundu kya mita obugungumavu, era nga n'omubiri gwakyo gwona gugheza kitundu kya mita. Ate buli kalala ku busenge obwo obw'abakuumi kaali kaagayaga mu buleeyi ni mu bugazi, mita isatu ku isatu.

¹³ Era yaapima obugazi obw'ekikuubo, okuva ku kimante eky'einhuma eky'akasenge akandi okutuuka ku kimante eky'einhuma eky'akasenge akandi, nga bwe bwali bulingagaine. Obugazi obwo bwali bwa mita ikumi na ibiri n'ekitundu.

¹⁴ Bwe yamala yaapima ekisasi eky'oku mulyango ogwingira mu luya olw'omunda, ng'obugazi bwakyo buli mita ikumi.

¹⁵ Obuleeyi bw'ekikuubo okuva ku mulyango aghangirirwa okutuuka ku kisasi ekyo eky'oku mulyango ogwingira mu luya olw'omunda, bwali mita abiri na itaanu.

¹⁶ Obusenge obwo obwali ku mbali ni ku mbali okw'ekikuubo, bwaliku amadinisa bwonabwona. Amadinisa ago nga gaja bwe gafundaghala okwingira munda mu kimante. N'ekisasi kyona kyaliku amadinisa. Ebimante byonabyona ebyali biringiriire ekikuubo byaliku ebifaananie eby'emiti eminaazi.

Oluya olw'okuliya

¹⁷ Agho omusaadha yambisa mu mulyango yanfulumya mu luya olw'okuliya. Naabona obusenge amakumi asatu nga baabuzimbira ku kimante eky'okuliya okwezunguluza oluya. Nga n'emberi ghaabwo baayaliiragho amabaale

¹⁸ okwezunguluza oluya olwo. Oluya olwo olw'okuliya lwali ghansiku okusinga oluya olw'omunda.

¹⁹ Ghaaligho omulyango ogwingira mu luya olw'omunda, nga gwali ghaiguluku okusinga ogwo ogufuluma mu luya olw'okuliya. Era omusaadha yaapima obuleeyi obwali ghagati agh'emiryango gyombi, nga bwa mita amakumi ataanu (50).

Omulyango ogw'oku luuyi olw'omukono omugooda olw'e buvandhuba

²⁰ Agho omusaadha yaaja yaapima obuleeyi n'obugazi bw'omulyango ogufuluma mu luya olw'okuliya, ogwali ku luuyi olw'omukono omugooda olw'e buvandhuba.

²¹ Obusenge obusatu obusatu ku mbali ni ku mbali okw'ekikuubo, n'emibiri egy'ebimante ebyali ghagati ghaabwo ebyabwawulanga, n'ekisasi ky'ongiriramu mu luya, byonabyona byali byagayaga n'eby'omu kikuubo eky'omulyango ogwalingiriranga e buvandhuba. Obuleeyi obw'omulyango ogwo bwali mita amakumi abiri na itaanu, ate obugazi bwagwo bwaba mita ikumi na ibiri n'ekitundu.

²² Amadinisa, n'ekisasi ky'ongiriramu mu luya, n'ebifaananie eby'emiti eminaazi, byonabyona byali byagayaga n'eby'omulyango ogwalingiriranga ku luuyi olw'e buvandhuba. Okutuuka ku mulyango ogwo ogwalingiriranga ku luuyi olw'omukono omugooda olw'e buvandhuba, nga ghaligho amadaala musanvu. Era ekisasi kyagwo ky'ongiriramu mu luya, kyali ku nkomerero yaagwo okulingiriza mu luya.

²³ Omulyango guno gwali gulingiriire omulyango ogundi ogwingira mu luya, ng'oti ni gule ogwalingiriranga ku luuyi olw'e buvandhuba bwe gwali. Omusaadha yaapima obuleeyi ghagati gh'emiryango egyo gyombi nga bugheza mita amakumi ataanu.

Omulyango ogw'oku luuyi olw'omukono omusaadha olw'e buvandhuba

²⁴ Agho omusaadha yantwala ku luuyi olw'omukono omusaadha olw'e buvandhuba, naabona nga yoona eriyo omulyango. Yaapima ebimante byaku n'ekisasi ky'ongiriramu mu luya, byonabyona nga byagayaga n'eby'oku miryango gire ebiri.

²⁵ Obusenge obwali ku kikuubo kyagwo bwaliku amadinisa bwonabwona, n'ekisasi kyagwo kyona kyabaaku amadinisa ng'oti n'agaali ku busenge n'ebisasi ebyali ku miryango gire egindi. Era ng'obuleeyi bwagwo bwali mita amakumi abiri na itaanu, ate obugazi bwagwo bwaba mita ikumi na ibiri n'ekitundu.

²⁶ Okutuuka ku mulyango ogwo, nga ghaligho amadaala musanvu. N'ekisasi kyagwo ky'ongiriramu mu luya, kyali ku nkomerero yaagwo okulingiriza mu luya. Ebimante ebyali biringiriire ekikuubo kyagwo byaliku ebifaananie eby'emiti eminaazi.

²⁷ Ku luuyi olw'omukono omusaadha olw'e buvandhuba ghaaligho omulyango ogundi ogwingira mu luya. Omusaadha yaapima obuleeyi ghagati gh'emiryango egyo gyombi nga bugheza mita amakumi ataanu.

Omulyango ogw'oku luuyi olw'omukono omusaadha olw'e buvandhuba ogwingira mu luya olw'omunda

²⁸ Agho omusaadha yantwala mu luya olw'omunda nga tubitira mu mulyango ogw'oku luuyi olw'omukono omusaadha olw'e buvandhuba. Yaapima omulyango ogwo nga gwagayaga ni gire egindi.

²⁹ Obusenge obusatu obusatu ku mbali ni ku mbali okw'ekikuubo kyagwo, n'emibiri ogy'ebimante ebyali ghagati ghaabwo ebyabwawulanga, n'ekisasi ky'ongiriramu mu luya, byonabyona byali byagayaga n'eby'omu bikuubo eby'emiryango gire egindi. Era ng'obusenge obwo buliku amadinisa bwonabwona, n'ekisasi ekyo kyona kyabaaku amadinisa. Obuleeyi obw'omulyango ogwo bwali mita amakumi abiri na itaanu, ate obugazi bwagwo bwaba mita ikumi na ibiri n'ekitundu.

³⁰ Omulyango ogwo era ni gire egindi gyonagyona, gyaliku ebisasi nga bigheza mita abiri na itaanu obuleeyi, ate obugazi byagheza mita itaanu.

³¹ Ekisasi eky'oku mulyango ogwo ky'ongiriramu mu luya, kyali kiringiriire oluya olw'okuliya. Era ng'ebimante ebyali biringiriire ekikuubo kyagwo byaliku ebifaananie eby'emiti eminaazi. Okutuuka ku mulyango ogwo, nga ghaligho amadaala munaana.

Omulyango ogw'oku luuyi olw'e buvandhuba ogwingira mu luya olw'omunda

³² Omusaadha yambisa mu mulyango ogw'oku luuyi olw'e buvandhuba, yantwala mu luya olw'omunda. Yaagupima nga gwagayaga ni gire egindi.

³³ Obusenge obusatu obusatu ku mbali ni ku mbali okw'ekikuubo kyagwo, n'emibiri ogy'ebimante ebyali ghagati ghaabwo ebyabwawulanga, n'ekisasi ky'ongiriramu mu luya, byonabyona byali byagayaga n'eby'omu bikuubo eby'emiryango gire egindi. Era ng'obusenge obwo buliku amadinisa bwonabwona, n'ekisasi ekyo kyona kyabaaku amadinisa. Obuleeyi obw'omulyango ogwo bwali mita amakumi abiri na itaanu, ate obugazi bwagwo bwaba mita ikumi na ibiri n'ekitundu.

³⁴ Ekisasi eky'oku mulyango ogwo ky'ongiriramu mu luya, kyali kiringiriire oluya olw'okuliya. Ebimante ebyali biringiriire ekikuubo kyagwo byaliku ebifaananie eby'emiti eminaazi, era nga ghaligho amadaala munaana okugutuukaku.

Omulyango ogw'oku luuyi olw'omukono omugooda olw'e buvandhuba ogwingira mu luya olw'omunda

³⁵ Omusaadha yantwala ku mulyango ogw'oku luuyi olw'omugooda olw'e buvandhuba, era yaagupima nga gwagayaga ni gire egindi.

³⁶ Obusenge obusatu obusatu ku mbali ni ku mbali okw'ekikuubo kyagwo, n'emibiri ogy'ebimante ebyali ghagati ghaabwo ebyabwawulanga, n'ekisasi ky'ongiriramu mu luya, byonabyona byali byagayaga n'eby'omu bikuubo eby'emiryango gire egindi. Era ng'obusenge obwo buliku amadinisa bwonabwona. Obuleeyi obw'omulyango ogwo bwali mita amakumi abiri na itaanu, ate obugazi bwagwo bwaba mita ikumi na ibiri n'ekitundu.

³⁷ Ekisasi eky'oku mulyango ogwo ky'ongiriramu mu luya, kyali kiringiriire oluya olw'okuliya. Ebimante ebyali biringiriire ekikuubo kyagwo byaliku ebifaananie eby'emiti eminaazi, era nga ghaligho amadaala munaana okugutuukaku.

Ebizimbe ebyali okumpi n'omulyango ogw'oku luuyi olw'omukono omugooda olw'e buvandhuba

³⁸ Mu luya olw'okuliya ghaaligho ekisenge kye baakookera ku kisasi ky'ongiriramu mu luya, nga kiriku olwigi olwigulira mu kisasi ekyo ekyali ku mulyango ogw'oku luuyi olw'omukono omugooda olw'e buvandhuba. Mu kisenge ekyo mwe baanaalizanga ebigheebwayo ebyokebwa byonabyona okuwaagho.

³⁹ Era mu kisenge ekyo mwalimu emeeza ibiri ibiri ku luuyi ni ku luuyi. Ku meeza edho kwe baitiranga ebigheebwayo ebyokebwa byonabyona okuwaagho, n'ebigheebwayo olw'ebibi, n'ebigheebwayo ng'omutango.

⁴⁰ Era ni kuliya okw'ekisenge ekyo, woona ghaaligho emeeza ibiri ibiri ku luuyi ni ku luuyi.

⁴¹ Ekitegeeza nti munda mu kisenge ekyo kye baakookera ku kisasi ky'ongiriramu mu luya, mwalimu emeeza ina. Ni kuliya ku luuyi olw'omulyango yaabaayo emeeza ina. Woonawoona dhaaba nga dhiri meeza munaana, kwe baitiranga ebigheebwayo ng'omusengo.

⁴² Ghaaligho n'emeeza edhindi ina, dhe baategekerangaku ebigheebwayo ebyokebwa byonabyona okuwaagho, nga baadhikola mu mabaale amabaadhe. Mu bugungumavu nga buli ndala egheza sentimita amakumi ataanu, ate mu bugazi yaagheza sentimita nsanvu na itaanu ku ndhuyi dhaayo dhoonadhoona. Ku meeza edho kwe baatanga ebintu bye baakozesanga mu kwita ebigheebwayo ng'omusengo.

⁴³ Mu kisenge ekyo mwalimu amalobo ge baakomereramu okukyezunguluza, nga mu buleeyi gaagayaga n'ekyala eky'omuntu. Ate ku meeza nga kwe bata emamba ey'ebigheebwayo.

⁴⁴ Agho yaanhingiza mu luya olw'omunda, naabona nga ghaligho ebisenge bibiri. Ekisenge ekindi kyali ku mbali kw'omulyango ogw'oku luuyi olw'omukono omugooda olw'e buvandhuba, nga kiringiriire ku luuyi olw'omukono omusaadha olw'e buvandhuba. Ate ekindi kyaba ku mbali kw'omulyango ogw'oku luuyi olw'omukono omusaadha olw'e buvandhuba, nga kiringiriire ku luuyi olw'omukono omugooda olw'e buvandhuba.

⁴⁵ Omusaadha ole yankobera ati ekisenge ekiringiriire ku luuyi olw'omukono omusaadha olw'e buvandhuba kya bakabona abalabirira eisinzizo.

⁴⁶ Era ati ekisenge ekiringiriire ku luuyi olw'omukono omugooda olw'e buvandhuba kya bakabona abalabirira alutaari. Abo nga n'abasimuka mu Zadoki, era nga ni bonka ku b'omu kika kya Levi abaikirizibwa okuseeta ye Musengwa Katonda okumugheereza.

Oluya olw'omunda n'ekizimbe eky'eisinzizo

⁴⁷ Agho omusaadha yaapima oluya olw'omunda nga lwagayaga mu buleeyi ni mu bugazi, mita amakumi ataanu (50) ku makumi ataanu (50). Alutaari yali ng'eba mberi wa isinzizo.

⁴⁸ Yamala yantwala mu kisasi ky'ongiriramu eky'eisinzizo. Yaapima ekimante kyakyo ng'obugazi kigheza mita ibiri n'ekitundu ku luuyi ni ku luuyi, era nga kiri n'omubiri gugheza mita ndala ndala ku luuyi ni ku luuyi.

⁴⁹ Kyaliku amadaala ge baaniinanga okukituukaku. Era nga obuleeyi bwa kyo buli mita ikumi, ate obugazi bwaba mita mukaaga.