Ezekieli 4 - Baibuli Ekibono kya Katonda 2014

Ezekieli ageegeenhia nga Yerusalemu bwe balikizingiza okukyezunguluza

¹ Agho Katonda yaakoba ati: “Iwe omuntu, funayo eitoofaali olite agho mu maiso go, olikubeku ekifaananie eky'ekibuga Yerusalemu.

² Bw'omala, zimba ku kibuga ekyo ekimante eky'okukizingiza, obunge n'emungo dh'eitaka ku kimante ekyo edh'okuniiniraku okukirwanisa. Bw'omala, okisimbeku weema okukyezunguluza edh'abazigu ab'okukirumba, era okisimbeku n'ebintu eby'okukozesa okuwomola ekimante kyakyo.

³ Olwo otoole olubaati, olusimbe lukole ng'ekisenge eky'ekyuma ghagati gh'ekibuga ekyo n'iwe. Omale amaiso go ogalingirize ekibuga ekyo, obe ng'oti bazigu bakizingiiza. Ako n'akanaaba akamanhiso eri eighanga lya Isiraeli.

⁴ “Ng'omaze ekyo, oidha kulambaala kya mbavu ku luuyi olw'omukono gwo omugooda, nze nkuteeku ebibi eby'abeighanga lya Isiraeli. Enaku dh'onaamala ng'olambaaliire ku luuyi olwo, oidha kudhisasuliramu ebibi eby'eighanga Isiraeli.

⁵ Nkusaliire enaku ebikumi bisatu na kyenda (390), odhimale agho ng'oli kukola ekibonerezo ekyo olw'ebibi eby'eighanga Isiraeli. Enaku edho dhitegeeza emyaka gye balimala nga bali kubonerezebwa.

⁶ Edho bw'olidhimalaku, kabiri olirambaala omukuzi ogwokubiri eky'embavu, aye ku luuyi lule olundi olw'omukono gwo omusaadha. Naakusalira enaku amakumi ana (40), odhimale ng'oli kukola ekibonerezo olw'ebibi eby'eighanga Buyudaaya. Enaku edho dhitegeeza emyaka gye balimala nga bali kubonerezebwa.

⁷ “Amaiso go galingirize ku Yerusalemu kye bazingiiza, osonkerere olwala lwo ku kibuga ekyo, era olange akabi akali kukiidhira.

⁸ Era bona eno, nja kukusiba n'emigugha obe nga tosobola kuva ku luuyi lw'olambaaliireku kwekyukiza ku lundi, okutuusa ng'enaku edh'okuzingizibwa okwo dhiwoireku.

⁹ “Oidha kutoola engaano, ni sayiri, n'ebidhandhaali, n'empindi, n'obwita, n'omutaamataama, obitabulire ghalala era obifumbemu emere ey'omugoyo. Eyo n'emere y'onaalyangaku mu nnaku ebikumi ebisatu n'ekyenda (390), dh'onaamala ng'olambaire eky'embavu ku luuyi olw'omukono gwo omugooda.

¹⁰ Emere oidha kulyanga ya kibu kirala olunaku, era nga mpime bupime eidha kughezanga guraamu ebikumi bibiri n'asatu (230) dhonka.

¹¹ N'amaadhi goona oidha kuganhwanga mukuzi mulala olunaku, era nga goona mapime bupime nga gasingaku katono ku kitundu kya lita.

¹² Oidha kukozesanga obubi bw'abantu obukalu ng'enku, obukumisenga omuliro gw'onaafumbisanga emere, ng'eri mu nsambo ya mugaati gwa sayiri. Ekyo oidha kukikolanga ng'abantu babona.”

¹³ Agho Musengwa Katonda yaakoba ati: “Batyo Abaisiraeli bwe banaalyanga emere etali nongoofu, bwe baliba nga bali eyo mu maghanga ye ndibasansaaniza.”

¹⁴ Aye nze naamwiramu nti: “Aa, Musengwa Katonda wange, bona eno, nze tyeyonoonangaku naire. Okuva mu buto bwange okutuuka ni ye buli eno, tiryangaku kifiire bufe kyene, oba ekiitiibwa ensolo edh'omu nsiko. Era tiryangaku kintu kyonakyona ekitali kirongoofu.”

¹⁵ Agho Katonda yankoba ati: “Kale ndidha kukuleka okozese busa bwa nte, bw'obe okumise omuliro gw'onaafumbisa emere yo.”

¹⁶ Era yaayongera okunkoba ati: “Iwe omuntu, bona eno, nja kulekeza emere okwidha mu Yerusalemu. Abantu baidha kulyanga mere mpime bupime nga bali mu kutya kwereere, n'amaadhi goona banhwenga mapime bupime nga beeraliikirivu.

¹⁷ Emere n'amaadhi bija kubawaaku, olwo balingaganeku nga bawoiremu eisuubi, batuuke n'okugoogomba baweere mu luwu, olw'ebibi byaibwe.”