Ezekieli 39 - Baibuli Ekibono kya Katonda 2014

Okughangulwa kwa Gogi

¹ Agho Musengwa Katonda yankoba ati: “Iwe omuntu, langa akabi akali kwidhira Gogi omufuzi ow'ab'e Mesheki n'ab'e Tubali. Mukobere bino, nze Musengwa Katonda, bye ndi kukoba nti: Bona eno, nze buti nfuuse muzigu y'oli iwe Gogi.

² Ndikukyusa naakulingiriza eruuyi, naakutoolayo eyo eghala einho ku luuyi olw'omukono omugooda olw'e buvandhuba, naakutwala okulwanisa ensozi edh'omu Isiraeli.

³ Agho ndikuba akalaso ko, kaakuva mu mukono omugooda, era naaleetera obusaale bwo bw'ogemye mu mukono omusaadha okugwa.

⁴ Era iwe mwene, n'eigye lyo lyonalyona, n'abalwani abava mu maghanga agandi abaliba aghalala n'iwe, muligwa ku nsozi edh'omu Isiraeli. Olwo naaghaayo emirambo gyaimwe eri enhonhi edh'oku nsozi n'ensolo edh'omu nsiko, dhaagikankamira.

⁵ Mulifiira eyo mu nsiko. Nze Musengwa Katonda ninze nkobye.

⁶ Ndikunaania ku nsi Magogi omuliro gwagyokya, era gwayokya n'abantu ab'omu biketezo eby'oku nhandha ababa mu miraala. Olwo balimanha nga ninze Musengwa Katonda.

⁷ Ndimanhisa abantu bange Abaisiraeli eriina lyange eitukuvu, era tiriganha bantu kabiri kwiramu kulyonoona. Olwo amaghanga galimanha nga ninze Musengwa Katonda, Omutukuvu wa Isiraeli.”

⁸ Musengwa Katonda akoba ati: “Bona, olunaku lwe ndhogeireku luli kwidha, era luja kutuukirizibwa.

⁹ Olwo abantu abaliba mu bibuga bya Isiraeli, balija baasoloza eby'okulwanisa abazigu bye balekuliire agho, baabifuula nku: nga n'omuli engabo enene n'entono, obulaso n'obusaale, amafumo n'emiigo. Ebyo biribamala okukumisa omuliro okumala emyaka musanvu.

¹⁰ Kale kiriba tikikaabeetaagisa kuja mu nsiko kugherera nku, waire okuja mu kibira okutemerera emiti kuba eby'okulwanisa ebyo n'ebiriba enku. Balinhagulula ebintu by'abazigu baibwe abo beene abaabanhagaku ebyaibwe, baabibatoolaku baabitwala ng'omunhago.” Musengwa Katonda n'akobye.

Okuziikibwa kwa Gogi

¹¹ Musengwa Katonda era akoba ati: “Ebyo byonabyona bwe birimala okubaagho, ndigha Gogi ekifo eky'okumuziikamu mu Isiraeli, nga bakyeta Ekiiko eky'Abatambuze. Kiriba ku luuyi olw'e buvandhuba olw'enhandha, era kirireetera ekifo ekyo obutabitangamu batambuze. Omwo mwe baliziika Gogi n'eigye lye lyonalyona, era kye baliva ni bakyeta Ekiiko eky'Eigye lya Gogi.

¹² Ab'eighanga Isiraeli balimala emyezi musanvu nga baziika mirambo, basobole okulongoosa ensi eyo.

¹³ Abantu b'omu Isiraeli boonaboona balibeeraganwa baaziika emirambo egyo, era ekyo kiribaleetera okuteebwamu ekinhagansi, ku lunaku lwe ndyoleka ekitiisa kyange. Nze Musengwa Katonda ninze nkobye.

¹⁴ Emyezi omusanvu nga giwoireku, balironda abantu baabataagho baaja nga babitabita mu nsi eyo okunoonia n'okuziika emirambo egiriba gikaasigaire ku ngulu, basobole okulongoosa ensi eyo.

¹⁵ Abantu abo bwe balija nga babitabita mu nsi eyo, memale ni babona eigumba ery'omuntu lyonalyona, balitangagho akamanhiso, okutuusa abaziisi lwe baliziikanga eigumba eryo mu Kiiko eky'Eigye lya Gogi.

¹⁶ Era ghalibaagho n'ekibuga kye balyeta Eigye. Batyo bwe Balirongoosa ensi eyo.”

¹⁷ Musengwa Katonda yankoba ati: “Iwe omuntu, koba enhonhi edha buli nsambo n'ensolo dhoonadhoona edh'omu nsiko, dheesoloze okuva woonawoona dhiidhe ku kibinuko eky'omusengo kye nja okudhitegekera. Kiriba ekibinuko eky'omusengo ekikologho ku nsozi edh'omu Isiraeli. Dhirirya emamba, dhaanhwa n'omusaayi.

¹⁸ Dhirirya emamba ey'abalwani ab'amaani, dhaanhwa n'omusaayi ogw'abafuzi b'ensi, ng'oti gwa ntaama nume na ntaama nto, oba ng'oti gwa mbuzi na gwa nte nume nga dhoonadhoona baadhipiitira e Bashani.

¹⁹ Era enhonhi edho n'ensolo edho, nga dhiri ku kibinuko eky'omusengo kye nja okudhitegekera, dhirirya amasavu okutuusa nga dhiigwite, dhaanhwa n'omusaayi okutuusa nga dhigutamiire.

²⁰ Dhirityama okulya ekiiwulo kye nja okudhitegekera, dhaiguta embalaasi, n'abavuzi baadho, n'abalwani ab'amaani, era n'abaisirukale abandi boonaboona. Nze Musengwa Katonda ninze nkobye.”

Ensi Isiraeli bagiizaagho buyaaka

²¹ Agho Musengwa Katonda yaakoba ati: “Ndyoleka ekitiisa kyange mu maghanga, abantu baabona bwe nkozesa mu mazima obuyinza bwendi nabwo, okutuukiriza bye mba nsazeegho okukola.

²² Okuva ku olwo n'okweyongerayo, ab'eighanga Isiraeli balimanha nga ninze Musengwa Katonda waibwe.

²³ Era amaghanga galimanha ng'ab'eighanga Isiraeli baatwalibwa mu bunhage lwa bibi byaibwe, kuba baaneefuulaku bandeetera okubalekulira agho, naabaghaayo mu ngalo edh'abazigu baibwe baabaita boonaboona.

²⁴ Nababisa nga bwe baali bagwaniire, naabalekulira agho, olw'obutaba balongoofu n'olw'ebibi byaibwe.”

²⁵ Agho ni, Musengwa Katonda kyava ali kukoba ati: “Aye mpegaano nja kuleetera baidhukulu ba Yakobo ebintu okwiramu okubajiiranga obukalamu, ngemerwe ekivunika eighanga lyonalyona Isiraeli, era nkuume n'ekitiisa ky'eriina lyange eitukuvu.

²⁶ Bwe baliiramu kabiri okuba mu nsi yaibwe mu miraala nga ghazira abatiisa naire, balyerabira bwe baaswazibwa olw'obutaba beesigwa ye ndi.

²⁷ Bwe ndimala okubasoloza okuva mu nsi edh'abazigu baibwe, ni mbaiza okuva mu maghanga, ndyoleka amaghanga kamaala nga bwendi omutukuvu.

²⁸ Olwo abantu bange balimanha nga ninze Musengwa Katonda waibwe kuba ninze nabasindika mu bunhage mu maghanga, kabiri naamala naabasoloza, naabaiza mu nsi eyaibwe nga ghazira waire omulala ati ye ndeseeyo mu maghanga.

²⁹ Ndiyugha omwoyo gwange ku b'eighanga Isiraeli, era tiriiramu kabiri kubalekulira agho. Nze Musengwa Katonda ninze nkobye.”