Ezekieli 36 - Baibuli Ekibono kya Katonda 2014

Katonda agha Isiraeli enkabi

¹ Agho Musengwa Katonda yaayogera ninze, yankoba ati: “Iwe omuntu, langa eri ensozi edh'omu Isiraeli, odhikobe dhiwulirise bino

² nze Musengwa Katonda bye ndi kudhikoba nti: Iwe Isiraeli, abazigu bo bakwesuutiraku baakoba bati, ‘Otyo, buti ensozi edho edh'eira dhifuuse dhaife ku bwaife.’

³ “Kale ni langa era olangirire bino, nze Musengwa Katonda bye ndi kukoba nti: Imwe ensozi edh'omu Isiraeli, amaghanga agabaliinaine bwe gaabalumba okuva ku ndhuyi dhoonadhoona, gaabanhagulula era gaabaleka agho mutyo nga muli bifulukwa byereere. Olwo amaghanga ago gaabafuula nsozi dhaago, abantu baaboogerangaku era baabayeeyerezanga.

⁴ Agho ni, imwe ensozi edh'omu Isiraeli, muwulirise bino nze Musengwa Katonda bye ndi kukoba ensozi, n'obusozi, n'obwinhamo, n'ebiiko, n'ebifo bye baazikiriza ni bisigala agho bityo nga biri bifulukwa byereere, n'ebibuga bye baanhagulula ni babireka agho nga muzira bantu, buti ebyafuuka enseko eri amaghanga goonagoona agabaliinaine.

⁵ “Nze Musengwa Katonda kyenva ni nkoba nti ndi kwogeza busungu bwereere eri amaghanga goonagoona, n'okusingira irala Edomu, olw'enkikidi ye ndi nayo ku lw'abantu bange. Amaghanga ago gaanhaga ensi yange gaagifuula eyaago ku bwago, era gaaginhagulula mu masanhu amangi n'obunhoomi obubitirivu.

⁶ “Agho ni langa ebigema ku nsi Isiraeli, era okobere ensozi, n'obusozi, n'obwinhamo, n'ebiiko, oti nze Musengwa Katonda ndi kwogeza obusungu bubitirivu olw'enkikidi ye ndi nayo ku lwabyo, kuba byavumibwa amaghanga.

⁷ Era nze Musengwa Katonda neerayiriire nti amaghanga geene agaliinainegho, n'agalivumibwa.

⁸ Aye imwe ensozi edh'omu Isiraeli, mulimeraku emiti, gyataaku n'ebibala, ku lw'abantu bange Abaisiraeli abali kumpi okwira eka.

⁹ Nze ndi ku luuyi lwaimwe, era nja kubona nti mulimwaku enimiro, era dhaasigibwamu ensigo.

¹⁰ Ndireetera abantu okwala mu ighanga Isiraeli, baidhula mu nsozi imwe. Ebibuga biriidhula abantu, n'ebifo byonabyona ebyayonoonebwa byairamu okuzimbibwa obuyaaka.

¹¹ Ndireetera abantu n'ensolo okuzaalagana n'okweyongera obungi mu imwe, okusinga ni bwe kyalinga eira. Naaleetera n'ebintu okujanga obukalamu mu imwe, okusinga ni ghale ghe mwasookera okusengebwamu. Olwo mulimanha nga ninze Musengwa Katonda.

¹² Bwenebwene ndireka abantu bange Abaisiraeli baabanga mu imwe, olwo imwe mwaba ensi ey'obutaka bwaibwe. Era timuliirayo kabiri kubaitaku baana baibwe.

¹³ “Nze Musengwa Katonda era nkoba nti: Abantu bakoba bati, ‘Iwe ensi Isiraeli oita abantu, waafiiriza eighanga lyo.’

¹⁴ Aye okuva ni mpegaano tokairamu kwita bantu, waire okufiiriza eighanga lyo. Nze Musengwa Katonda ninze nkobye.

¹⁵ Tiriganha maghanga gandi kukuvumanga, waire okuleka abantu okukuswazanga, oba iwe ensi Isiraeli yeene okwirayo okufiirizanga eighanga lyo. Nze Musengwa Katonda ninze nkobye.”

Obulamu bwa Isiraeli obuyaaka

¹⁶ Agho kabiri Musengwa Katonda yaayogera ninze, yankoba ati:

¹⁷ “Iwe omuntu, abantu ab'eighanga Isiraeli bwe baali mu nsi yaibwe, baagyonoona olw'emize gyaibwe n'ebibi bye baakola. Ensambo ye beebisangamu, nga ti nongoofu ng'oti n'omukazi bw'aba ng'ali mu biseera bye eby'okulwala.

¹⁸ Kale, nze kyenava ni mbamaliraku obusungu bwange, olw'obutemo bwe baakola mu nsi eyo, n'olw'okwonoona ensi eyo nga basinza ebitali nze Katonda.

¹⁹ Nabasalira omusango nga njira ku neebisa yaibwe ni ku bikolwa byaibwe. Era naabasansaaniza eyo mu maghanga, naabaidhuza eyo mu nsi enhingi.

²⁰ Aye mu buli ighanga mwe baajanga, nga boonoona eriina lyange eitukuvu, abantu baatuuka n'okuboogeraku bati, ‘Bano n'abantu ba Musengwa Katonda, aye ate baava mu nsi ye!’

²¹ Agho naalumirwa eriina lyange eitukuvu, Abaisiraeli abo lye baayonoona mu maghanga ye baajanga.

²² “Kale ni kobera ab'eighanga Isiraeli oti nze Musengwa Katonda ndi kubakoba nti: Kino kye nja okukola tirikikola lwa kuba imwe ab'eighanga Isiraeli, aye ku lwa liina lyange eitukuvu lye mwayonoona mu maghanga ye mwajanga.

²³ Ndyoleka eri amaghanga eriina lyange eikologho bwe liri eitukuvu, eriina imwe lye mwayonoona mu maghanga ago. Olwo amaghanga ago galimanha nga ninze Musengwa Katonda. Nze Musengwa Katonda ninze nkobye. Bye ndikolera mu imwe, biryoleka amaghanga ago nga bwendi omutukuvu.

²⁴ Ndibatoolayo eyo mu maghanga, naabasolozaayo eyo mu nsi dhoonadhoona, naabaiza mu nsi eyaimwe.

²⁵ Ndi bamansiraku amaadhi amalungi, gaabanaazaaku obwonoonefu bwaimwe bwonabwona n'okusinza ebitali nze Katonda.

²⁶ Ndibagha omwoyo omuyaaka n'endowooza empyaka. Naabatoolamu omwoyo omukalangafu oguli ng'oti ibaale, naabataamu omwoyo omugonvu omuwulize.

²⁷ Ndibataamu omwoyo ogwange, naabaleetera okujiira ku mateeka gange, nga mukola bye mbalagira.

²⁸ Olwo mwabanga mu nsi ye nagha badhaadha baimwe, era mwabanga bantu bange, nze naaba Katonda waimwe.

²⁹ Ndibawonia byonabyona ebibaleetera obutaba balongoofu, era naaleetera engaano okubaalira einho, olwo endhala yaaloba kubalumaku naire.

³⁰ Ndireetera emiti egy'ebibala n'enimiro edh'emere okwama einho, endhala erobe kabiri kwirayo kubaluma na kubaswaza mu maghanga gandi.

³¹ Agho muliidhukira empisa dhaimwe edhaali embi n'ebikolwa byaimwe ebyali ebibi. Olwo mwekyagha olw'ebibi byaimwe n'olw'ebikolwa ebyenhinhalwa bye mwakola.

³² Imwe ab'eighanga Isiraeli, mukimanhe bukalamu nti ekyo tirikikola lwa kuba imwe. Nhenda ensoni dhibageme muswale olw'ebyo bye mwakola.”

³³ Agho Musengwa Katonda yaakoba ati: “Ku lunaku olwo lwe ndibanaazaaku ebibi byaimwe byonabyona, ndibaleetera okwiramu okubanga mu bibuga byaimwe, n'okuzimba obuyaaka ebifo ebyayonoonebwa.

³⁴ Kiisi eyabitanga ku nimiro dhaimwe, yabonanga bwe dhaali dhizise nga dhifuuse bwa nsiko. Aye ndibaleetera okwiramu okudhirimanga.

³⁵ Era balikoba bati, ‘Eno ensi eyali erekeibwa obwagho etyo ng'eri bifulukwa byereere, buti efuuse ng'oti n'enimiro ey'e Edeni! N'ebibuga ebyali byonooneibwa era nga byona birekeibwa bw'agho bityo nga biri bifulukwa byereere, buti birimu abantu era byezungulwirwa ebimante ebigumu!’

³⁶ Olwo amaghanga agabeezungulwire agaliba gasigairegho, galimanha nga nze Musengwa Katonda, ninze nazimba obuyaaka ebifo ebyali bisigaire ebyanhe n'ebifunfugu ebyereere. Era naasimba buyaaka emere mu bifo ebyali birekeibwa obwagho nga biwolongeire nga bitiisa. Nze Musengwa Katonda ninze nkobye, era ndikituukiriza.”

³⁷ Musengwa Katonda era akoba ati: “Ndiiramu okuganha ab'eighanga Isiraeli, bansaba okubakolera ekintu kyonakyona, era ndibaleetera okweyongera obungi ng'oti n'entaama bwe dheeyongera.

³⁸ Ebibuga ebyayonoonebwa biriidhula abantu, ng'oti ni Yerusalemu bwe kyaidhulanga entaama edh'okughaayo ng'emisengo ku mbaga edh'ebibinuko ebyalagirwa. Olwo balimanha nga ninze Musengwa Katonda.”