Ezekieli 35 - Baibuli Ekibono kya Katonda 2014

Katonda agha Edomu ekibonerezo

¹ Kabiri Musengwa Katonda yaayogera ninze, yankoba ati:

² “Iwe omuntu, amaiso go galingirize ku lusozi Seiri, olange akabi akali kulwidhira.

³ Lukobe oti nze Musengwa Katonda, ndi kulukoba nti: Bona eno iwe olusozi Seiri, nze buti nfuuse muzigu y'oli. Era ndigolola omukono gwange naakubonereza, naakuleetera okusigala agho otyo ng'oli bifulukwa byereere omutaba bantu.

⁴ Ndizikiriza ebibuga byo, n'iwe mwene naakuleetera okusigala agho otyo ng'oli bifulukwa byereere. Olwo olimanha nga ninze Musengwa Katonda.

⁵ Wali n'enzigu ku Baisiraeli ey'olubeerera, wabaghaayo okwitibwa mu lutalo mu kiseera kye baabeera mu kabi, ekiseera eky'okubonerezebwa kwaibwe okusembayo.

⁶ Agho ni, nze Musengwa Katonda ndayira nti nga bwendi omulamu, nkutegekeire kwitibwa era tolikuwona naire, kuba oli n'omusango ogw'obutemo.

⁷ Ndireetera ensi ey'ensozi Edomu okusigala agho etyo ng'eri bifulukwa byereere omutaba bantu, era naita n'abantu boonaboona abagibitamu.

⁸ Ndiidhuza ensozi emirambo gy'abantu abaitiibwa mu lutalo, gyaidhula ni ku busozi, ni mu biiko, era ni mu bwinhamo.

⁹ Ndikuleetera okusigala agho otyo ng'oli bifulukwa byereere ebyanda n'ebyanda, n'ebibuga byo byaloba kwirayo kubangamu bantu. Olwo mulimanha nga ninze Musengwa Katonda.

¹⁰ “Wakoba oti eighanga Buyudaaya ni Isiraeli, gombi gago ghalala n'ebiketezo byago, waire nga nze Musengwa Katonda waibwe nali nga ndigho.

¹¹ Agho ni, nze Musengwa Katonda ndayira nti nga bwendi omulamu, nja kukukolaku nga njiira ku busungu, n'ensaalwa, n'obukyayi bye wali nabyo ku bantu bange abo. Era bwe ndikusalira omusango ni nkubonereza, ndikuleetera okuumanha.

¹² Olimanha nga nze Musengwa Katonda nawulira byonabyona bye wayogera ng'onhooma ensozi dh'omu Isiraeli, oti dhaalekebwa agho dhityo nga dhiri bifulukwa byereere, era oti dhaakugheebwa iwe odhinhage.

¹³ Era naawulira ebibono byaimwe ebibi kamaala bye mwandhogeraku n'eminwa gyaimwe nga muli kuneekudumbalizaaku.”

¹⁴ Kale Musengwa Katonda oyo kyava akoba ati: “Ndikuleetera okusigala agho otyo ng'oli bifulukwa byereere. Olwo ensi yoonayoona yaasagamba,

¹⁵ ng'oti niiwe bwe wasagamba nga Isiraeli, ensi yange, erekeibwa agho etyo ng'eri bifulukwa byereere. Olusozi Seiri ndidha kulukolaku n'ensi Edomu yoonayoona ngikoleku, birekebwe agho bityo nga biri bifulukwa byereere. Olwo balimanha nga ninze Musengwa Katonda.”