Ezekieli 32 - Baibuli Ekibono kya Katonda 2014

Kyabazinga wa Misiri omugeza ku ngoina

¹ Ku lunaku olusooka mu mwezi ogweikumi n'ebiri, mu mwaka ogweikumi n'ebiri (12) nga tuli mu bunhage, Musengwa Katonda yayogera ninze, yankoba ati:

² “Iwe omuntu, lira amaziga kulwa kyabazinga wa Misiri, omukobe oti: Weebisa ng'oti mpologoma mu maghanga, aye nga bwene oli ng'oti ngoina mu maadhi. Otuumira mu maadhi waagataabuulataabuula n'ebigere byo, waasiikuulasiikuula emiiga.

³ Nze Musengwa Katonda kyenva nkoba nti ndikusuulaku olutuula lwange ng'amaghanga kamaala galigho, naakwinhulula mu maadhi n'olutuula lwange olwo.

⁴ Ndi kusuula eyo mu nsiko, naaleeta enhonhi dhoonadhoona dhaakwebungaku dhaakumoodhogola, n'ensolo dhoonadhoona edh'oku nsi dhaakukankamira.

⁵ Ndisuulasuula emamba ey'omulambo gwo ku nsozi, naagiidhuza ni mu biiko.

⁶ Ndiyugha omusaayi gwo mu nsi, gwaboza ensozi dhaatoonha butoonhe, era gwaidhula ni mu miiga.

⁷ Lwe ndikuzikiriza ndighemba ku igulu, nairugaza emuunienie dhaaloba kwaka, naaghemba ni ku ndhuba ekire, era n'omwezi gwaloba kuvaaku butangaavu naire.

⁸ Ndizikiza ebyaka byonabyona eby'oku igulu ebiri ghaigulu wo, ensi yo naagireka mu nzikiiza. Nze Musengwa Katonda ninze nkobye.

⁹ “Ndireetera amaghanga kamaala okweraliikirira, bwe ndituusa amawulire ag'okuzikirira kwo mu nsi dh'otawulirangaku naire.

¹⁰ Ndireetera amaghanga kamaala okutya einho, nga gaboine bye mbatuusiisaaku. Era bakyabazinga baago balidhugumira, bwe balibona nga ngalwire empiima yange. Ku lunaku olwo lw'oligwiraku n'oghangulwa, abantu boonaboona balitengera nga batya olw'obulamu bwaibwe.”

¹¹ Musengwa Katonda akoba kyabazinga w'e Misiri ati: “Empiima ya kyabazinga w'e Babilonia eri kukwidhira.

¹² Ndikusindikaku abaisirukale ab'amaani ab'omu maghanga agasingayo obukambwe, baita abantu bo boonaboona era baazikiriza ebintu byo ebikwesiimisa.

¹³ Ndiita ensolo dho dhoonadhoona buli aghali amaadhi mu Misiri. Ghalobe kubaagho muntu agatambuliramu okugataabuula, waire ensolo eganiinamu okugasiikuula.

¹⁴ Agho naaleetera amaadhi go okulaala, n'emiiga gyo gyakuuluula amaadhi amalungi. Nze Musengwa Katonda ninze nkobye.

¹⁵ Bwe ndifuula Misiri ebifulukwa ebyereere, ni nzikiriza ebintu ebigirimu, ni ndhita n'abantu abagibaamu, olwo balimanha nga ninze Musengwa Katonda.

¹⁶ “Okulira okwo kulifuuka lwembo, abakazi ab'omu maghanga baalwembanga okulira Misiri n'abantu baamu boonaboona. Nze Musengwa Katonda ninze nkobye.”

Ensi ey'abafu

¹⁷ Ku lunaku olweikumi n'eitaanu mu mwezi ogusooka, mu mwaka ogweikumi n'ebiri (12) nga tuli mu bunhage, Musengwa Katonda yayogera ninze, yankoba ati:

¹⁸ “Iwe omuntu, wowoola amaziga olw'abantu kamaala ab'e Misiri, era obasindike mu nsi ey'abafu babe ghalala n'ab'ensi edhindi edh'amaani abaamala eira okwika eyo mu lwina.

¹⁹ Bakobe oti, Mulowooza muti imwe musinga abantu abandi boonaboona obulungi mu mboneka? Mwidha kwika ghansi mu nsi ey'abafu mubenga eyo ghalala n'abatatya Katonda.”

²⁰ “Abantu b'e Misiri baligwa ghalala n'abo be baitira mu lutalo. Empiima ey'okubaita boonaboona etegekeibwa.

²¹ Eyo mu nsi ey'abafu, abantu ab'amaani abaalwaniranga ku luuyi olw'Abamisiri abo, baliboogeraku bati, ‘Bona, abatatya Katonda abaitirwa mu lutalo baabo baise eno ghansi, era balambaire baasirika aghazira kwesegenhia naire!’

²² “Ensi Assiria eri eyo, n'abaisirukale baayo boona bali eyo mu magombe gaibwe okugyezunguluza. Boonaboona baitirwa mu lutalo.

²³ Amagombe gaibwe gali mu kifo ekisembayo ghansi, mu nsi ey'abafu. Abaisirukale baayo boonaboona bali eyo mu magombe gaibwe okugyezunguluza, nga boonaboona baitirwa mu lutalo. Ate nga bwe baali bakaali balamu baaleeteranga abantu okutya einho mu nsi.

²⁴ “Ensi Elamu eri eyo, n'abaisirukale baayo boonaboona bali eyo mu magombe gaibwe okugyezunguluza. Boonaboona baitirwa mu lutalo, baika ghansi mu nsi ey'abafu nga ti bakekete. Buti bali eyo mu kuswala kwaibwe ghalala n'abo abaika eyo ghansi mu lwina. Ate nga bwe baali bakaali balamu baaleeteranga abantu okutya einho mu nsi.

²⁵ Ensi Elamu eyo egalaamiriire ghansi mu abo abaitibwa, n'abaisirukale baayo boonaboona bali mu magombe gaibwe okugyezunguluza. Boonaboona baitirwa mu lutalo nga ti bakekete. Bwe baali bakaali balamu baaleeteranga abantu okutya einho mu nsi, aye mpegaano bali eyo mu kuswala kwaibwe ghalala n'abo abaika eyo ghansi mu lwina. Bateereibwa ghalala n'abo abaitirwa mu lutalo.

²⁶ “Ensi Mesheki ni Tubali dhiri eyo, n'abaisirukale baadho boona bali eyo mu magombe gaibwe okudheezunguluza. Boonaboona abo abataali bakekete baitirwa mu lutalo. Ate nga bwe baali bakaali balamu baaleeteranga abantu okutya einho mu nsi.

²⁷ Aye tibaaziikibwa ghalala na balwani ab'eira abaali ab'amaani abataali bakekete, abaika ghansi mu nsi ey'abafu n'eby'okulwanisa byaibwe: ng'empiima dhaibwe dhiteereibwa emintwetwe waibwe, n'engabo dhaibwe dhaateebwa ku mibiri gyaibwe. Abasaadha abo baali ba maani nga baleetera abantu okutya einho mu nsi.

²⁸ “Kale ni weena Misiri balikuzikiriza waasigala agho ng'ogalaamiriire ghalala n'abatatya Katonda abataali bakekete abaitirwa mu lutalo.

²⁹ “Ensi Edomu eri eyo ghalala ni bakyabazinga baayo n'abakungu baayo. Baali balwani ba maani, aye mpegaano bagalaamiriire ghalala n'abo abatatya Katonda abataali bakekete, abaitirwa mu lutalo ni baika eyo ghansi mu lwina.

³⁰ “Era eyo n'eri n'abakungu ab'omu kiketezo ku luuyi olw'omukono omugooda olw'e buvandhuba, n'Abasidoni boonaboona, abaafiira aghalala n'abo abatatya Katonda abaitirwa mu lutalo nga ti bakekete. Waire nga baatiisanga abantu olw'amaani gaibwe, mpegaano bali eyo mu kuswala kwaibwe ghalala n'abo abaika eyo ghansi mu lwina.

³¹ “Kyabazinga wa Misiri bw'alibona abo boonaboona abaitirwa mu lutalo, alyerabiraku enaku ey'abantu be boonaboona abaafa.” Musengwa Katonda atyo bw'akoba.

³² Musengwa Katonda era akoba ati: “Ninze mwene eyataagho kyabazinga wa Misiri aleeterenga abantu okutya einho ku nsi. Aye yeena ghalala n'abaisirukale be boonaboona, baliitibwa era baalambaazibwa ghalala n'abatatya Katonda abataali bakekete abaitirwa mu lutalo.” Musengwa Katonda oyo atyo bw'akoba.