Ezekieli 30 - Baibuli Ekibono kya Katonda 2014

Musengwa Katonda alibonereza Misiri

¹ Musengwa Katonda yaayogera ninze, yankoba ati:

² “Iwe omuntu, langa okobere abantu, nze Musengwa Katonda bye ndi kukoba. Bakobere oti: Muwowoole amaziga nga mukoba muti: Tukagwireku! Olunaku olw'akabi luli kwidha!

³ Olunaku lwa Musengwa Katonda luli kumpi, oluliba olw'ebire ebyereere ku igulu era olw'akabi eri amaghanga.

⁴ Ghalibaagho olutalo mu Misiri, ghaabaagho n'obulumi mu Ethiopia. Ku lunaku olwo, abantu baliitibwa bangi mu nsi Misiri, n'eby'obukombe byayo byanhagululwa, n'emisingi gyayo gyamenhebwagho.

⁵ Abantu ab'e Ethiopia, n'ab'e Puti, n'ab'e Ludi, n'ab'e Arabia, n'ab'e Libya, era n'ab'ensi dhoonadhoona edhiryeyimba aghalala okuyambagana nabo, baliitibwa mu lutalo.”

⁶ Musengwa Katonda era akoba ati: “Abo abayamba ensi Misiri baligwa. Era eigye lyayo ery'amaani erigireetera okwekudumbaza lirizikirizibwa. Era abantu baliitirwa mu lutalo, okuva e Migidoli okutuuka e Siyene. Nze Musengwa Katonda ninze nkobye.

⁷ Ensi eyo Misiri ndigifuula bifulukwa byereere okusinga n'ensi edhindi dhoonadhoona edhaali dhifuuliibwaku ebifulukwa. N'ebibuga byayo birizika okusinga ebibuga ebindi byonabyona ebyali bizikiriziibwaku.

⁸ Era bwe ndikukunaania omuliro ku nsi eyo, n'abo boonaboona ababaire bagiyambanga ni baweekereragho okufa, olwo balimanha nga ninze Musengwa Katonda.

⁹ “Ku lunaku olwo ndituma abakwenda baaziinhuuka embiro, baaja baadhugumiza abantu b'e Ethiopia abaliba nga bali mu miraala, nga baziramu kwekengeera naire. Era obulumi bulibaidhira ku lunaku olwo ensi Misiri lw'eribonerezebwaku. Bwenebwene olunaku olwo luli kwidha.”

¹⁰ Musengwa Katonda akoba ati: “Ndirekeza eby'obukombe bya Misiri, nga nkozesa Nebukadinezzari kyabazinga wa Babilonia.

¹¹ Ndimuleeta ghalala n'abaisirukale be abasingayo mu maghanga obukambwe, baidha okuzikiriza Misiri. Balisowolayo empiima dhaibwe baalwanisa ensi eyo, baagiidhuza emirambo egy'abo be baliita.

¹² Ndikaliiza omwiga Kiyira, naaghaayo ensi Misiri efugibwe abantu ababi. Ndireetera ensi eyo okuzikirira n'ebintu byonabyona ebigirimu, nga nkozesa abagwira. Nze Musengwa Katonda, ninze ndhogeire.”

¹³ Musengwa Katonda akoba ati: “Ndizikiriza ebisinzibwa ebitali Katonda, naalekeza okusinza ebifaananie okuli mu Menfisi. Teribaayo mufuzi kabiri mu Misiri, era ensi eyo ndigireetamu entiisa.

¹⁴ Ekiketezo eky'e Pathirosi ndikifuula bifulukwa byereere, naayokya ekibuga Zoani omuliro, era naasalira ekibuga Thebesi omusango naakibonereza.

¹⁵ Ndimalira obusungu bwange ku kibuga Pelusiumu ekifo kya Misiri ekyo eky'okwewogomamu, era naamaliragho irala olukunkumuli olw'abantu ab'e Thebesi.

¹⁶ Ndikunaania omuliro ku Misiri, ab'e Pelusiumu baawulira obulumi obutaloodheka, n'ebimante eby'oku kibuga Thebesi byawomolwawomolwa ebituli.

¹⁷ Abaisuka ab'omu bibuga Oni ni Pibesethi baliitirwa mu lutalo, ate abantu abandi baatwalibwa mu bunhage.

¹⁸ Lwe ndikomya obufuzi bwa Misiri enzikiiza erigema mu kibuga Tehafunehesi, olwo naalekeza amaani agabaleetera okwekuluntaza. Ekire kirighemba ku Misiri, abantu baamu baatwalibwa mu bunhage.

¹⁹ Ntyo bwendisalira Misiri omusango naagibonereza. Olwo balimanha nga ninze Musengwa Katonda.”

Kyabazinga wa Misiri obuyinza babumutoolaku

²⁰ Ku lunaku olwomusanvu mu mwezi ogusooka, mu mwaka ogweikumi n'omulala (11) nga tuli mu bunhage, Musengwa Katonda yankoba ati:

²¹ “Iwe omuntu, mmenhie kyabazinga wa Misiri omukono. Era ghazira muntu aguzingiriireku kighero, okuguyunga guwone gwiremu amaani, gusobole okwiramu okuzunza empiima.

²² Agho ni, nze Musengwa Katonda kyenva ndi kukoba nti: Bona eno, buti nfuuse muzigu wa kyabazinga wa Misiri. Era ndimumenha emikono gyombi, gule ogw'amaani ni gule ogwamenheka, naamulekuza empiima yaamuva mu ngalo yaagwa.

²³ Ndisansaaniza Abamisiri mu maghanga, naabaidhuza eyo mu nsi enhingi.

²⁴ Olwo naaleetera emikono gya kyabazinga w'e Babilonia okuba egy'amaani era naamuta mu ngalo empiima yange. Aye naamenha emikono gya kyabazinga wa Misiri, yaasindira mu maiso ga kyabazinga ow'e Babilonia ng'oti n'omuntu afumitiibwa ebibwa ebija okumwita.

²⁵ Bwenebwene ndireetera emikono gya kyabazinga w'e Babilonia okuba egy'amaani, era naamuta mu ngalo empiima yange, aye naanafuya egya kyabazinga w'e Misiri. Bwe ndita empiima yange mu ngalo dha kyabazinga w'e Babilonia, n'agyolekeza ensi Misiri, olwo balimanha nga ninze Musengwa Katonda.

²⁶ Ndisansaaniza Abamisiri mu maghanga, naabaidhuza eyo mu nsi enhingi. Memale olwo baamanha nga ninze Musengwa Katonda.”