Ezekieli 3 - Baibuli Ekibono kya Katonda 2014

¹ Agho Katonda yankoba ati: “Iwe omuntu, lya enzingo ey'ekitabo eyo ekugheereibwa, omale oje oyogere n'abantu b'omu Isiraeli.”

² Kale naayasama, yampa enzingo ey'ekitabo eyo okugirya.

³ Era yankoba ati: “Iwe omuntu, lya enzingo ey'ekitabo eyo ye nkughaire ekutuuke mu nda ekwigute.” Agho naagirya era mule mu kanwa yaadhuudhuula ng'oti mudheenene gwa ndhuki.

⁴ Katonda oyo yankoba ati: “Iwe omuntu, ja y'abantu b'omu Isiraeli obakobere bye nja okukukoba.

⁵ Tiri kukutuma ya ighanga lyogera by'otategeera era ery'olulimi olukalangafu, aye ndi kukutuma y'abantu b'omu Isiraeli.

⁶ Ngoli ndi kukutuma ya maghanga mangi agoogera by'otategeera era ag'enimi enkalangafu, bwenebwene abantu b'omu maghanga ago bandikuwuliriisa.

⁷ Aye ab'eighanga lya Isiraeli tibaidha kukuwulirisa, kuba tibenda kuwulira nze bye mbakoba, olw'okuba ba mpwitu era baakalanguka emyoyo.

⁸ Bona eno, mperaano weena nkufiire obe n'empwitu era okalanguke omwoyo ng'oti ni beene.

⁹ Nkufiire obe mubbalangafu okusinga n'olubaale. Kale otatyanga badheemu abo waire okudhugumira olw'emmoga yaibwe eidhwire obukambwe.”

¹⁰ Era Katonda oyo yankoba ati: “Iwe omuntu, tega kutu owulire byonabyona bye nja okukukoba era obiteeku omwoyo.

¹¹ Memale olwo oje ye Baisiraeli baino abali mu bunhage, obakobere ebyo nze Musengwa Katonda bye nhenda okubakoba, oba bakuwulirisa oba tibakuwulirisa.”

¹² Agho omwoyo gwa Katonda gwambeeda, ekitiisa kya Musengwa Katonda kyasituka nga kiva mu kifo kyakyo, era naawulira emugongo wange omuvuuma oguli ng'oti kugugumuka kwa musisi ow'amaani einho.

¹³ Omuvuuma ogwo gwe nawulira, gaali amaghagha ag'ebitonde ebiramu ebina (4) nga gali kugemaganaku, ng'otaireku n'okuvuga okw'enkede edhaajiiranga aghalala n'ebitonde ebiramu ebyo. Ebyo n'ebyawulikika ng'oti kugugumuka kwa musisi ow'amaani einho.

¹⁴ Omwoyo gwa Katonda gwambeeda gwantwala, naaja nga ndiku obusungu n'enaku, era amaani ga Musengwa Katonda gandidhaku mangi inho.

¹⁵ Agho naatuuka e Telabibu kumpi n'omwiga Kebari, abantu be baatwala mu bunhage ghe baabanga. Naaba ghalala nabo okumala enaku musanvu, nga ntiire olw'ebyo bye nabona ni bye nawulira.

Musengwa Katonda ataagho Ezekieli ng'omukuumi

¹⁶ Enaku edho omusanvu bwe dhaawaaku, Musengwa Katonda yaayogera ninze. Yankoba ati:

¹⁷ “Iwe omuntu, nkutairegho obe omukuumi ow'abantu b'omu Isiraeli. Buli lw'onaawuliranga bye nkoba, ng'olwo oja obatuusaaku okulabula kwange kwe nnaabanga nkutumye.

¹⁸ Bwe nkoba omuntu omukozi w'ebibi nti, ‘Bwenebwene oidha kufa,’ aye iwe n'otalabula muntu oyo kuva mu bibi bye asobole okuwonia obulamu bwe, omuntu oyo alifiira mu bibi bye. Aye omusango ogw'okufa kwe ndiguta ku iwe.

¹⁹ Aye bw'olabula omubi, n'aloba okukyuka okuva mu bibi bye oba okuva mu ngeri dhe embi, omuntu oyo alifiira mu bibi bye. Aye iwe oliba owoniiza obulamu bwo.

²⁰ “Ate omuntu akola ebituufu bw'akyuka n'ava ku kukola ebituufu n'akola ebibi, era zeena ni mmuleka obuleke yeekontole agwe, omuntu oyo bw'otalimulabula aja kufiira mu bibi bye. N'ebikolwa ebirungi by'aliba akoze tija kubiraadha naire. Ate omusango ogw'okufa kwe ndiguta ku iwe.

²¹ Aye bw'olabula omuntu akola ebituufu alobe kukola bibi, era n'akuwulira n'atakola bibi, omuntu oyo bwenebwene aliba mulamu olw'okuwulirisa okulabula kwo. N'iwe weena oliba owoniiza obulamu bwo.”

Ezekieli alemwa okwogera

²² Agho naawulira mule ng'amaani ga Musengwa Katonda gandidhieku. Era Musengwa Katonda oyo yankoba ati: “Situkiramu oje mu kiketezo eky'oku museetwe, eyo ye ndidha okwogerera n'iwe.”

²³ Kale naasitukiramu, naaja mu kiketezo eky'oku museetwe. Bwe natuukayo naja okulinga nti, nga mbona ekitiisa kya Musengwa Katonda, ng'oti ni bwe nakibona nga ndi kumpi n'omwiga Kebari. Agho naakuba amakiryaivu naakutama n'obweni bwatuuka ku itaka.

²⁴ Aye omwoyo gwa Katonda gwandidhaku, gwansitusa gwanhemereza ku magulu gange, era gwayogera ninze. Gwankoba guti: “Ja weigalize mu ndhu yo.

²⁵ Era iwe omuntu, bona eno, baidha kukutaaku emigugha bagikusibise, obe nga tosobola kuja mu bantu.

²⁶ Era nja kuleetera olulimi lwo okukwesibira ku kibuno, obe ng'oti kasiru olwo olobe kusobola kulabula bantu abo abadheemu.

²⁷ Aye bwendiiramu okwogera niiwe, ndisimulula olulimi lwo, waabakobera nze Musengwa Katonda bye nhenda okubakoba. Abo abalyenda okuwulirisa baliwulirisa ate abatalyenda kuwulirisa balirekayo; kuba eighanga eryo lya bantu badheemu.”