Ezekieli 27 - Baibuli Ekibono kya Katonda 2014

Ezekieli alira okufa kwa Tiro

¹ Agho Musengwa Katonda yaayogera ninze, yankoba ati:

² “Iwe omuntu, yemba olwembo olw'enaku ku lw'ekibuga Tiro,

³ ekyazimbwa ku mwalo ogw'enhandha, era ekisuubulagana n'abantu ab'omu biketezo eby'oku nhandha kamaala. Kikobe oti Musengwa Katonda akoba ati: Iwe Tiro, weesaaka ng'okoba oti obulungi obw'emboneka yo buziraku kamogo.

⁴ Ensalosalo dho dhiri ghagati mu nhandha. Abazimbi bo baakuzimba waaba ng'oti lyato erikoleibwa obulungi.

⁵ Baakozesa embaawo edh'emiti emireeyiriri, egyavanga e Seniri. Baatoola omuvule e Lebanoni, baakukoleramu omulongooti.

⁶ Baakola enkasi dho mu miti emikologho, egyavanga e Bashani. Baakwaliiramu munda embaawo edh'emiti emyalumugi egyavanga ku kizinga ky'e Kupuro, ate ku mbaawo okwo baayaliiraku amasanka.

⁷ Baakola amatanga go mu ngoye edhaalukibwa obukalamu einho edhaavanga e Misiri. Amatanga ago nga n'agakola nga bendera yo. Baakughembaku engoye enungi edh'erangi ya bbululu n'edh'eya nakasooma, okuva mu bizinga eby'e Elisha.

⁸ Abaakubanga enkasi dho okukuvuga baali batyamye b'e Sidoni n'ab'e Aruvadi, ate abavuzi bo baaba abantu ab'e Zemeri abali n'obukugu.

⁹ Mu iwe n'omwali abakungu ab'e Gebali ghalala n'abantu baayo abaali n'obukugu, abaakolanga amaato go. Mu iwe n'omwali emeeri dhoonadhoona edh'oku nhandha n'abavuzi baadho, olw'okusuubula ebintu byo.

¹⁰ “Abaisirukale ab'e Perusia, n'ab'e Ludi, n'ab'e Puti, baalinga mu magye go ng'abalwani bo. Era mu iwe mwe baaghanikanga engabo dhaibwe n'enkoofiira dhaibwe edh'ebyuma, olwo baakuleetera okuba ow'ekitiisa.

¹¹ Abaisirukale ab'e Aruvadi n'abe Heleki n'abaakuumanga ebimante byo ebikwezungulwire. Ate ab'e Gamadi n'abaabanga mu bituuti byo ebirengererwaku. Era baaghanikanga engabo dhaibwe ku bimante ebikwezungulwire, olwo baakuleetera okulungiya einho emboneka yo.

¹² “Ab'e Tarushishi baasuubulagananga n'iwe olw'ebintu eby'obukombe kamaala by'oli nabyo, baakusasulangamu feeza, ekyuma ekigumu einho, amabaati, n'ekyuma ekizitogha.

¹³ Ab'e Yavani, n'ab'e Tubali, n'ab'e Mesheki boona baasuubulagananga n'iwe. Nga bakuleetera abairu n'ebintu eby'ekyuma eky'ekikomo, waabasasulamu bye wasuubulanga.

¹⁴ Ab'e Bethi Togarima baagulanga ebintu bye wasuubulanga, baakusasulangamu embalaasi edh'okutambuliraku, n'edh'omu lutalo, n'enhumbu.

¹⁵ Ab'e Dedani baasuubulagananga n'iwe, n'ab'omu biketezo eby'oku nhandha kamaala boona baasuubulagananga n'iwe, baakuleeteranga amasanka n'embaawo, waabasasulamu bye wasuubulanga.

¹⁶ Ab'e Assiria baasuubulagananga n'iwe olw'ebintu ebingi bye wakolanga, baakughangamu amabaale ag'omughendo ageetebwa emeraludo, n'engoye edh'erangi ya nakasooma, n'emidaliso, n'engoye empegheevu, n'amabaale ag'omughendo ageetebwa korali n'ageetebwa agate.

¹⁷ Ensi Buyudaaya ni Isiraeli dhaasuubulagananga n'iwe. Waadhighanga bye wasuubulanga, ate dheene dhaakughangamu engaano, n'omuzigo ogw'ebibala eby'emiti emyoliva, n'emitiini egisookereza okwama, n'omudheenene ogw'endhuki, n'omuzigo, n'obuwoowo obwetebwa balamu.

¹⁸ Ab'e Damasiko baakugulangaku ebintu bye wakolanga ebingi, n'eby'obukombe bye wali nabyo ebya buli nsambo. Baakusasulangamu omwenge ogw'emizabbibu ogw'e Heluboni, n'ebiviiri eby'entaama ebyeru,

¹⁹ n'omwenge ogw'emizabbibu ogundi ogw'e Uzali. Era baakuleeteranga n'ekyuma ekigumu einho ekimesunkana, n'obuwoowo bwa kassia n'obwa kalamu, iwe waabafaanisangamu bye wasuubulanga.

²⁰ Ab'e Dedani baasuubulagananga n'iwe nga bakuleetera engoye dhe bakolamu ebintu ebityamibwaku ku migongo egy'ensolo dhe bavuga.

²¹ Ab'e Arabia n'abakungu boonaboona ab'e Kedari, baakuleeteranga entaama n'embuzi, mwasuubulagananga bukalamu.

²² Abasuubuzi b'e Sheba n'ab'e Raama baakuleeteranga obuwoowo obusinga bulungi, ni zaabu, n'amabaale ag'omughendo, iwe waabaghangamu bye wasuubulanga.

²³ Ab'e Harani, n'ab'e Kanne, n'ab'e Edeni, n'ab'e Sheba, n'ab'e Assihuri, n'ab'e Kilimadi, boonaboona baasuubulagana n'iwe.

²⁴ Abo baakuguzanga ebintu ebirungi einho, engoye dha langi ya bbululu, n'engoye dhe baatungirangamu eby'okudholiga, n'ebisampa ebya langi kamaala, n'emigugha egyalukibwa obukalamu.

²⁵ Eby'okusuubula byo baabitwaliranga mu maato amakologho ag'e Tarushishi. Kale waaba ng'oti n'emeeri eidhwire ebintu n'ezitogha, ng'eri ghagati mu nhandha.

²⁶ Abaakubanga enkasi dho okukuvuga baakutuusa mu nhandha ghagati. Empewo eva e buvandhuba yaakumenheramenhera eyo ghagati mu nhandha.

²⁷ Obukombe bwo n'ebintu byo bye wasuubulanga, abantu abaakubanga enkasi okukuvuga n'abakozi baaku abandi, abaatambuzanga bye wasuubulanga, n'abaisirukale bo boonaboona abaali mu iwe, n'abantu abandi boonaboona abaali mu iwe, abo boonaboona baadimira ghagati mu nhandha, ku lunaku olw'okuzikirira kwo.

²⁸ Abavuzi bo bwe baakuba enduulu, ab'oku bukalu bw'enhandha baadhugumira.

²⁹ Agho abakuba enkasi n'abavuga amaato, n'abakozi baaku abandi boonaboona baava mu maato gaibwe, baayemerera ku mbali kw'enhandha.

³⁰ Baalira inho amaziga era baawowoola ku lulwo. Beeyugha enkungu mu mitwe era beevulunga mu ivu.

³¹ Ku lulwo baamwa emitwe gyaibwe okugimaliriraku enviiri ng'oti mpaata, baavaala ekutiya olw'okunakughala, era baagegenga olw'enaku eyabali ku myoyo embitirivu, baalira inho amaziga.

³² Baalira amaziga nga bali kuwowoola ku lulwo bati, ‘Naani agezeka ku kuzikirizibwa kwa Tiro, ekibuga ekyo ekyazikirizibwa ghagati mu nhandha?

³³ Ebintu byo bye waleetanga okuva mu nhandha, byesiimisanga abantu kamaala mu bwetaavu bwaibwe. Waaleetera bakyabazinga kamaala okukombaghala olw'obukombe bwo n'olw'ebyo bye wasuubulanga.

³⁴ Aye Mpegaano enhandha ekumenhiemenhie, ebintu bye wasuubulanga byonabyona, n'abakozi bo boonaboona baadimira ghalala n'iwe mu maadhi amaleeyi.’

³⁵ Abantu ab'omu biketezo eby'oku nhandha boonaboona baatya inho olw'ebyo ebyakutuukaku. Ni bakyabazinga baibwe beeraliikirira ekibitiriire, nga ni mu maiso bamoga kutya kwereere.

³⁶ Abasuubuzi ab'omu maghanga goonagoona beeraliikirivu inho olw'enkomerero etiisa inho y'otuuseeku, kuba tokairayo kubaagho ebyanda n'ebyanda.”