Ezekieli 26 - Baibuli Ekibono kya Katonda 2014

Okulanga ebirituuka ku nsi Tiro

¹ Ku lunaku olusooka mu mwezi, mu mwaka ogweikumi n'omulala nga tuli mu bunhage, Musengwa Katonda kabiri yankoba ati:

² “Iwe omuntu, mpulira abantu b'e Tiro nga boogera ku Yerusalemu bati, ‘Otyo, Yerusalemu ekyali omulyango ogw'obusuubuzi bw'amaghanga nga bwe bakimenhie ni kifuuka ebifulukwa, buti niife twize mu kifo kyakyo, tukombaghale.’

³ “Kale ni, nze Musengwa Katonda kyenva ni nkoba nti: Bona eno iwe ekibuga Tiro, buti nze nfuuse muzigu y'oli. Era ndisitula amaghanga kamaala, gaidha gaakulumba ng'oti kwefuukuula kwa nhandha.

⁴ Galimenhamenha ebimante byo ebikwezungulwire n'ebituuti byo ebirengererwaku. Era nze Musengwa Katonda mwene ndighalagata eitaka lyonalyona erikulimu iwe Tiro, naalimalamu waasigala lubaale lwereere.

⁵ Agho gh'oli mu nhandha, olibanga kifo kya bavubi kwanikangamu butimba bwaibwe. Era nze Musengwa Katonda nkoba nti oliba munhago eri abamaghanga agandi.

⁶ N'abantu abali mu bubuga bwo ere ku bukalu ng'osomoike enhandha, baliitibwa mu lutalo. Olwo iwe Tiro olimanha nga ninze Musengwa Katonda.”

⁷ Era Musengwa Katonda akoba ati: “Bona, ndireeta Nebukadinezzari kyabazinga ow'e Babilonia, kyabazinga asinga mu bakyabazinga boonaboona. Aliidha yaalumba Tiro ng'aviira ku luuyi olw'omukono omugooda olw'e buvandhuba, ng'ali n'eigye einene inho, eririmu embalaasi, n'ebigaali eby'omu lutalo, n'abaisirukale ab'oku mbalaasi.

⁸ Baliitira mu lutalo abantu bo iwe Tiro, abali mu bubuga bwo ere ku bukalu ng'osomoike enhandha. Balikuzimbaku ekimante eky'okukuzingiza, baakubungaku n'emungo dh'eitaka edh'okuniiniraku okukulumba, olwo baagema engabo dhaakola ekimante ekigumu.

⁹ Balikonta ebimante byo n'ebintu ebiwomola, era baamenhagho ebituuti byo ebirengererwaku n'empasa.

¹⁰ Baliba n'embalaasi kamaala, dhaasiikuula enkungu waagibuliramu n'okugibuliramu. Empindo ey'embalaasi, n'ebigaali eby'okutambuliramu, n'ebigaali eby'omu lutalo, eritengeesa ebimante byo nga bali kubita mu miryango gyo, okwingira mu kibuga ekimaze okuwomolwawomolwa.

¹¹ Embalaasi dhaibwe dhirityankirira enguudo dho dhoonadhoona, era baliita abantu bo n'empiima, n'empango dho edh'amaani baadhisuula ghansi.

¹² Balyagaaza eby'obukombe byo n'eby'obusuubuzi byo ye biriba yoonayoona, baabinhagulula. Baamenhagho ebimante byo ebikwezungulwire, era baasaaniagho n'endhu dho enungi. Baatoola amabaale go, n'embaawo dho, n'ebintu byo ebindi bye boonoine, baabisuula mu nhandha.

¹³ Ndirekeza abantu okwembera mu iwe enhembo, naasirisa n'entongooli dho dhoonadhoona nga tidhikaawulirwaku naire.

¹⁴ Ndikufuula lubaale lwereere, waasigala ng'oli kifo kya bavubi kwanikangaku butimba bwaibwe. Era tibaliiramu kukuzimba kabiri. Nze Musengwa Katonda mwene, ninze nkobye.”

¹⁵ Musengwa Katonda era akoba ekibuga Tiro, ati: “Abantu ab'omu biketezo eby'oku nhandha bwe baliwulira okubwatuka kwo ng'oli kugwa, n'okuwowoola kw'abo abafumitiibwa mu iwe mu kutirimbula, balitya inho baadhugumira.

¹⁶ Agho bakyabazinga boonaboona ab'ensi edhiriiraine ku nhandha, baliva ku bityamo byaibwe eby'obwakyabazinga, baatoolamu ebivaalo byaibwe ebiriku amadholobera. Baatyama ku itaka era baadhugumira buli kaseera, nga batiire inho olw'ebyo ebikutuuseeku.

¹⁷ Balirira amaziga ku lulwo nga bakoba bati: Wo, ozikiriire iwe ekibuga ekibaire ekimanhifu einho. Iwe owalinga n'amaato ag'amaani ku nhandha. Iwe n'abatyamye bo mwaleeteranga abantu abasaabala ku maadhi okutya okw'amaani!

¹⁸ Mperaano ebizinga biri kudhugumira ku lunaku lw'ogwiriireku. Bwenebwene ebizinga byonabyona ebiri mu nhandha byeraliikirivu okubona okuzikirira kwo.”

¹⁹ Musengwa Katonda akoba ati: “Ndikufuula ekibuga ekyonooneibwa ni kifuuka ebifulukwa, olwo waaba ng'ebibuga ebindi ebitakaabaamu bantu. Ndikuyoolookezaaku amaadhi amangi ag'enhandha gaakusandikira.

²⁰ Ndikusindika waaja ghansi, waaba eyo n'abafu ab'eira abaika e magombe. Ndikuta ghansi eyo waaba mutyamye w'eyo mu nsi ey'abafu, ghalala n'abo abaika eyo mu lwina, mu bifulukwafulukwa eby'ebyanda ebyabita. Olwo ghabulegho omuntu asenga mu iwe kabiri, waire iwe mwene okwirayo okubalirwa mu nsi ya balamu.

²¹ Ndikutuusa ku nkomerero etiisa inho, waasaaniragho irala. Abantu ni bwe balikunoonia batya, toliirayo kuboneka kabiri.” Musengwa Katonda atyo bw'akoba.