Ezekieli 25 - Baibuli Ekibono kya Katonda 2014

Okulanga ebibi eby'okutuuka ku nsi Ammoni

¹ Agho Musengwa Katonda yaayogera ninze, yankoba ati:

² “Iwe omuntu, amaiso go galingirize Abammoni, olange akabi akali kubaidhira.

³ Koba Abammoni bawulire nze Musengwa Katonda bye ndi kubakoba nti: Imwe mwasanhuka mwakoba muti, ‘Otyo, kirongoolo,’ eisinzizo lyange lwe baalyonoona, ensi Isiraeli ni bagizikiriza, n'Abayudaaya ni babatwala mu bunhage.

⁴ Kale ni ndibaghaayo mu ngalo edh'abantu ab'e buvandhuba baabaghangula, baasimba weema dhaibwe mu nsi yaimwe baagibaamu. Baliryanga ebibala era baanhwanga amata ebyandibaire ebyaimwe.

⁵ Ndifuula ekibuga Rabba kyaba kyayiro kya ngamiya, ate ebibuga by'omu Ammoni ebindi naabifuula bigo bya ntaama na mbuzi. Olwo mulimanha nga ninze Musengwa Katonda.”

⁶ Musengwa Katonda waife ayongera yaakoba ati: “Mwakuba mu ngalo, mwasambagala olw'eisanhu, mwalaga omwoyo gwaimwe omubi ogwidhwire obukyayi eri ensi Isiraeli.

⁷ Kale ni bona eno, ndigolola omukono gwange naababonereza, naabaghaayo eri amaghanga agandi gaabanhagululaku ebyaimwe. Ndibaita naabamaliriragho, mwaloba kwirayo kabiri kuba ighanga, waire okuba n'ensi eyaimwe ku bwaimwe. Olwo mulimanha nga ninze Musengwa Katonda.”

Okulanga ebirituuka ku nsi Moabu

⁸ Musengwa Katonda akoba ati: “Olw'okuba ab'e Moabu baakoba bati Buyudaaya eri ng'amaghanga agandi goonagoona,

⁹ ndireka ebibuga ebikuuma ensalosalo edh'ensi eyo Moabu era ebigigheesa ekitiisa, baabirumba. Ebibuga ebyo ni bino: Bethi Yeshimothi, Baali Meoni ni Kiriathaimu.

¹⁰ Ndireka abantu ab'e buvandhuba baalumba Abamoabu n'Abammoni baabaghangula, baaloba kwirayo kabiri kuba ighanga.

¹¹ Ntyo bwendisalira ensi Moabu omusango ni ngibonereza. Olwo balimanha nga ninze Musengwa Katonda.”

Okulanga ebirituuka ku nsi Edomu

¹² Musengwa Katonda akoba ati: “Olw'okuba Abaedomu beesasuuliza ku Bayudaaya bubi inho, olwo beereetaku omusango omunene einho,

¹³ nze Musengwa Katonda kyenva nkoba nti, ndigolola omukono gwange naabonereza ensi Edomu eyo naagimalamu abantu n'ensolo, era nagyonoonayonoona. Abantu baamu balibaitira mu lutalo, okuva e Temani okutuukira irala e Dedani.

¹⁴ Ndikozesa abantu bange Abaisiraeli baaneesasuulizaagho ku Edomu. Baligikolaku nga bwe nhenda, baagimaliraku obusungu bwange n'ekiruyi kyange. Olwo Abaedomu balimanha nga bwe neesasuuliza ku bantu.” Musengwa Katonda atyo bw'akoba.

Okulanga ebirituuka ku nsi Filisitia

¹⁵ Musengwa Katonda akoba ati: “Olw'okuba Abafilisiti beesasuliza ku bazigu baibwe ab'olubeerera baababisa bubi inho n'omwoyo ogwidhwire obukyayi,

¹⁶ nze Musengwa Katonda kyenva nkoba nti, ndigolola omukono gwange naabonereza ensi Filisitia eyo naagimalamu abantu. Ndizikiriza n'abaliba basigairegho mu kiketezo eky'oku nhandha.

¹⁷ Ndibabonereza n'obukambwe, naabeesasulizaaku mu busungu obubitirivu. Olwo balimanha nga ninze Musengwa Katonda.”