Ezekieli 24 - Baibuli Ekibono kya Katonda 2014

Sefuliya entalaivu

¹ Ku lunaku olweikumi mu mwezi ogweikumi, mu mwaka ogwomwenda nga tuli mu bunhage, Musengwa Katonda yankoba ati:

² “Iwe omuntu, ghandiika olunaku lw'omwezi olw'olwaleero luno, kuba luno n'olunaku kyabazinga ow'e Babilonia lw'atandiikiireku okuzingiza ekibuga Yerusalemu.

³ Kale ni ja okobere eighanga eryo eidheemu olugero, oti Musengwa Katonda akoba ati: Ta sefuliya ku muliro, giteeku omale ogifukemu amaadhi.

⁴ Suula mu maadhi ago ebinofu by'emamba nga birungi, ekisambi n'omukono. Omale oidhuzeegho emamba ey'oku magumba esinga bulungi.

⁵ Kozesa emamba ey'entaama esingamu obulungi, obunge enku kamaala ghansi gh'esefuliya, otogose emamba eyo n'amagumba ago, biye bukalamu.”

⁶ Musengwa Katonda kyava n'akoba nti: “Ekibuga ekyo ekirimu abatemo kikagwireku! Kiri ng'oti sefuliya erimu obutalaivu, ng'obutalaivu bwamu tibutoolwangamuuku. Toolamu emamba kinofu kirala kirala nga tiweeroboza.

⁷ Omusaayi ogw'abantu be baatemula gukaali mu kibuga ekyo. Tibaaguyugha mu nkungu n'egughembaku. Aye baaguyugha bwa ku lubaale lwereere.

⁸ Omusaayi ogwo nkaagulese agho ku lubaale gulobe kughembwaku, gusiikuule obusungu bwange mbeesasuulizeeku.”

⁹ Musengwa Katonda kyava n'akoba nti: “Ekibuga ekyo ekirimu abatemo kikagwireku! Nze mwene ndibunga emungo y'enku enene.

¹⁰ Yongeraku enku kamaala okumeku omuliro. Fumbira irala bulungi emamba okutuusa bw'enaakaliira n'amagumba ni gasiriira.

¹¹ Agho leka sefuliya eyo endhereere ey'ekyuma ky'ekikomo esigale ku muliro, esuughe eyengerere, eikoodera lyonalyona erigirimu lisaanuuke n'obutalaivu buye buweemu.

¹² Aye ndaagiire bwereere, omubiri gw'obutalaivu munene inho, tigusobola kuwaamu na muliro.

¹³ Yerusalemu, obutalaivu obwo n'obwo obwenzi bwo bw'okola. Era olw'okuba nafuba inho okukulongoosa aye nga tosobola kulongooka n'owaamu ikoodera, toliiramu kabiri kulongooka okutuusa lwe ndikumaliraku obusungu bwange.

¹⁴ Nze Musengwa Katonda mwene, ninze nkobye. Era ekyo ndikikola naakituukiriza. Tiriira inhuma, tirisaasira era tiryeidhusa naire. Ndikusalira omusango nga njiira ku mpisa dho ni ku bikolwa byo.” Musengwa Katonda atyo bw'akoba.

Muka Ezekieli afa

¹⁵ Musengwa Katonda kabiri yankoba ati:

¹⁶ “Iwe omuntu, bona, onaaja okutemya n'okuzibula nga nkutoire ku maiso oyo asinga okukusanhusa. Aye otalira, oba okuwowoola, oba okutoonhia eiziga waire eirala liti.

¹⁷ Sindira mule kisiriikiriza, otalira oyo afiire. Otaleka kusiba kitambaala kyo ku mutwe, waire okuleka okuvaala engaito mu bigere olw'enaku. Era oteeghemba ku maiso, waire okulya emere abalizi ye balya ku lumbe.”

¹⁸ Kale nze Ezekieli mu biseera eby'enkyo naaba agho nga mpaya n'abantu bukalamu. Aye eigulo eryo mukazi wange yaafa. Ku lunaku olwairirira, naakola nga Musengwa Katonda bwe yandagiire.

¹⁹ Abantu bambuuza bati: “Lwaki toli kutukobera bukwenda bw'oli nabwo, obukuleeteire okwebisa otyo?”

²⁰ Agho naabakobera nti: “Musengwa Katonda yayogeire ninze, yankoba

²¹ mbakobere imwe abantu ab'eighanga Isiraeli nti: Bona eno, ndyonoona eisinzizo lyange, eribaleetera okwebona nga muli ba maani, ni libasanhusa okulingirira, ni mwegomba okulingiramu. N'abaana baimwe be mwaleka mu Yerusalemu, balifiira mu lutalo.

²² Era olwo mwena mulikola nga nze bwenkoze, timulyeghemba ku maiso, waire okulya emere abalizi ye balya ku lumbe.

²³ Timulireka kusiba bitambaala byaimwe ku mitwe, waire okuleka okuvaala engaito mu bigere olw'enaku. Era timulirira maziga waire okuwowoola. Aye muligoogomba mwawaagho olw'ebibi byaimwe, buli muntu yaasindira mwine enaku.

²⁴ Olwo nze Ezekieli ndiba akamanhiso ye muli: byonabyona bye nkoze, mwena bye mulikola. Era Musengwa Katonda akoba ati ebyo bwe biribatuukaku, mulimumanha ng'oyo ni Musengwa Katonda.”

²⁵ Era Musengwa Katonda yankoba ati: “Iwe omuntu, olunaku lulituuka naabatoolaku eisinzizo eribaleetera okwebona nga ba maani era nga ba bitiibwa, beesuuta, era lyabasanhusa okulingirira, beegomba okulingiramu. Era ku lunaku olwo ndibatoolaku n'abaana baibwe.

²⁶ Ku lunaku olwo, oyo alirumuka n'awonagho aliidha y'oli yaakukobera.

²⁷ Ku lunaku olwo olulimi lwo lulisibulukuka waasobola okwiramu okwogera, era waayogera n'oyo alirumuka n'awonagho. Olwo iwe waaba akamanhiso akalabula abantu abo, era olwo beene baamanha nga ninze Musengwa Katonda.”