Ezekieli 23 - Baibuli Ekibono kya Katonda 2014

Abakazi aboluganda nga bamalaaya

¹ Agho Musengwa Katonda yaayogera ninze, yankoba ati:

² “Iwe omuntu, ghaaligho abakazi babiri nga inhaibwe mulala.

³ Bwe baali bakaali bato nga bali e Misiri baakola obwa malaaya, abasaadha baabaniogerezanga amabeere, baafiirwa okusigala nga bakaali beegha.

⁴ Omukulu eriina lye nga ni Ohola, ate omuto nga ni Oholiba. Ohola oyo ng'aligho okutegeeza Samaria, ate Oholiba yaabaagho okutegeeza Yerusalemu. Abakazi abo bombi nabafumbirwa, banzaalira abaana.

⁵ “Waire Ohola yali mukazi wange, aye era yakolanga obwamalaaya, yeefulugutanga n'abagonzi be Abassiria.

⁶ Abassiria abo baalinga balwani abaavaalanga engoye dha nakasooma, nga bakungu, era nga baduumizi mu magye. Boonaboona baali baisuka ababoneka obulungi, era nga baisirukale ba ku mbalaasi.

⁷ Ohola oyo yalaaya ku buli musaadha Mussiria yeenayeena eyali asinga kuboneka bulungi. Era okwefuluguta nabo einho kwamuleetera okweyonoona ng'asinza ebisinzibwa byaibwe byonabyona ebitali Katonda.

⁸ Tiyalekayo bwamalaaya bwe, bwe yakola okuviira irala ng'ali e Misiri, ye yabeera n'abasaadha mu buliri ni bamwesanhukizaaku ng'akaali muto, ni bamuleetera okuba nga takaali mwegha.

⁹ Kale nze kyenava ni mmughaayo mu ngalo edh'abagonzi be Abassiria be yeefulugutanga nabo.

¹⁰ Abo baamutoolamu engoye dhe baamuleka madu, baagema batabane be ni baghala be, era mwene baamwita n'empiima. Bwe yamala okusalirwa atyo omusango ni gumusinga, yaafuuka kya kuyeeyereza mu bakazi.

¹¹ “Waire muganda we Oholiba yabona ebyo, aye era yamala yaaba mubi n'okusinga Ohola oyo mu kwefuluguta n'abasaadha n'okukola obwamalaaya.

¹² Yeena yeefuluguta n'Abassiria abakungu, abaduumizi mu magye, abalwani abaavaalanga engoye enungi einho, n'abaisirukale ab'oku mbalaasi, nga boonaboona baisuka ababoneka obulungi.

¹³ Naabona nga yayonooneka, era kyaba nti aboluganda bombi baagema ngira ndala.

¹⁴ “Aye ono yaswisaagho mu bwamalaaya bwe, kuba yabona ebifaananie eby'abasaadha Abababilonia bye baakuba ku bimante mu langi ya kasaayisaayi,

¹⁵ nga beesibye emisipi mu nkende era nga beesibye ku mitwe ebitambaala eby'omusono. Boonaboona nga bavaire ng'oti n'abakungu ab'omu nsi Babilonia.

¹⁶ Bwe yababona yaabeegomba n'omwoyo gwamudunguda, yaabatumira abakwenda mu Babilonia.

¹⁷ Era Abababilonia baidha baaba naye mu buliri. Baamumaliraku obwenzi bwaibwe, baamwonoona. Yaamala yaabeesinwa, yaakyuka yaabavaaku.

¹⁸ Bwe yaja mu maiso n'okukola obwamalaaya bwe ng'abantu boonaboona babona era ni yeeyanikanga amadu, nze naakyuka naamuvaaku nga mwesiniirwa, nga bwe nakyuka ninva ku muganda we.

¹⁹ Aye era yeeyongera bweyongere kukola bwamalaaya, nga bwe yabukolanga nga mughala muto e Misiri.

²⁰ Omwoyo gwamweyongera okumudunguda olw'okwegomba abasaadha abali ng'oti bwa ndogoyi oba mbalaasi nume, abaatamiira obutamiire okuba n'abakazi mu buliri.

²¹ “Oholiba, wayenda okwira mu bwenzi bwe wakolanga e Misiri ng'okaali muto. Eyo abasaadha ye baakuniogererezanga amabeere, n'ofiirwa okusigala ng'okaali mwegha.”

Katonda asalira omuto ku boluganda ababiri omusango

²² “Kale ni, iwe Oholiba, nze Musengwa Katonda ndi kukukoba nti: Bona eno, ndikusiikuulira abaali abagonzi bo be wakyuka n'oleka nga bakusinie, naabasoloza baava ku ndhuyi dhoonadhoona, baidha baakwefuulira baakulumba.

²³ Ndireeta Abababilonia n'Abakaladea boonaboona, n'abasaadha abava e Pekoda, n'abava e Shoa, n'abava e Koa, n'Abassiria boonaboona. Ndisoloza abaisuka ababoneka obulungi, abakungu era abaduumizi mu magye, abasaadha ab'ebitiibwa, era nga boonaboona baisirukale ba ku mbalaasi.

²⁴ Balikulumba nga baviira ku luuyi olw'omukono omugooda olw'e buvandhuba, nga bali na igye iramba, n'ebigaali eby'omu lutalo, n'eby'okutambuliramu. Baliidha n'enkoofiira edh'ekyuma ku mitwe, nga bagemye engabo entono n'enene, baakulumba nga bakuva ku buli luuyi. Ndikughaayo mu ngalo dhaibwe, baaja baakusalira omusango nga bajiira ku mateeka gaibwe.

²⁵ Olw'obusungu obundiku, ndibasindika baakukolaku baakumaliraku ekiruyi kyaibwe. Balikusalaku enhindo n'amatu, baita n'abaana bo. Bwenebwene balitwala batabane bo ni baghala bo baabookya omuliro.

²⁶ Balikutoolamu engoye dho, era baakutoolaku ebyamadholobera byo ebirungi einho.

²⁷ Agho ndirekeza obwenzi n'obwamalaaya bye watoola mu nsi Misiri. Era toliiramu kabiri kulingirira bifaananie bya misambwa gya Bamisiri, waire okwiramu okulowooza ku nsi Misiri.”

²⁸ Musengwa Katonda akoba ati: “Bona eno, ndikughaayo mu ngalo dh'abo be wakyagha, abo be wakyuka n'oleka nga bakusinie.

²⁹ Nga bwe bakukyaye, balikutoolaku byonabyona bye wakolerera, baakuleka ng'oli madu ng'oti malaaya, era ng'ozira kantu naire. Obwenzi bwo n'obwamalaaya bwo,

³⁰ n'obukuleeteire ebyo byonabyona, kuba wakola obwenzi n'amaghanga, weeyonoona n'okusinza ebitali nze Katonda beene bye baasinzanga.

³¹ Wagema engira n'endala eyo nga muganda wo, kale ni ndikugha ekikopo eky'ekibonerezo ng'ekikye.”

³² Musengwa Katonda akoba ati: “Olinhwa ku kikopo kya muganda wo eky'ekibonerezo, ekireeyi era ekinene. Balikusekerera era bakukiina; kuba ekikopo ekyo kiidhuvu.

³³ Kirikutamiiza era kyakuleetera enaku, kuba ekikopo ekyo ekya muganda wo Samaria, kitiisa inho era kireeta ekiwuubaalo.

³⁴ Olikinhwa waakimaliriramu, waatoola endhawu dhaakyo edhimenheike waadheekalabuza mu kifuba olw'okunakughala. Nze Musengwa Katonda ninze nkobye.”

³⁵ Musengwa Katonda akoba ati: “Kale nga bwewanvaaku n'oneerabirira irala, oli n'okugumira ekibonerezo olw'obwenzi bwo n'obwamalaaya bwo.”

Katonda asalira Ohola ni Oholiba omusango

³⁶ Agho Musengwa Katonda yaayogera ninze, yankoba ati: “Iwe omuntu, onaasalira Ohola ni Oholiba omusango? Kale bakobere ebyenhinhalwa bye baakola obalumirize.

³⁷ Baakola obwenzi era baatemula. Baakola obwenzi nga basinza ebitali nze Katonda, baaghaayo n'abaana baibwe beene be banzaalira, baabookya ng'emisengo eri ebisinzibwa ebyo.

³⁸ Era tibaakoma agho, aye ku lunaku lulala baayonoona eisinzizo lyange era baayonoona n'olunaku lwange olwa Sabbato.

³⁹ Ku lunaku lwene lwe baitiraku abaana baibwe ni babaghaayo ng'emisengo eri ebisinzibwa byaibwe ebyo, era ni ku lwene olwo lwe baidhiraku mu isinzizo lyange ni balyonoona.

⁴⁰ “Era baatumanga n'abakwenda baaja mu biketezo eby'eghala baayetayo abasaadha, era abasaadha baidhanga. Olwo ng'aboluganda abo bombi banaaba, nga basiiga amaiso gaibwe kalaamu, era nga beewoomya n'ebyamadholobera.

⁴¹ Agho baatyama ku buliri obw'ekitiibwa, ng'emberi ghaabwo ghaligho emeeza kwe bataire obubbaani n'omuzigo ogw'ebibala eby'emiti emyoliva bye nabagha.

⁴² Olwo ng'owulira amamiro ag'abantu abangi abali mu idembe lyaibwe. Era ghaabaagho n'ebisaadhasaadha ebitamiivu, ebireetebwa okuva eyo mu irungu. Byata obukomo ku mikono gy'abakazi abo, era byata engule edhiboneka obulungi, ku mitwe gyaibwe.

⁴³ “Agho nze neebuuza mule nti abasaadha bano banaakola obwenzi n'omukazi eyaweekererayo n'obwamalaaya?

⁴⁴ Era bairaganangayo ye bamalaaya abo, Ohola ni Oholiba, abakazi abenzi abo.

⁴⁵ Aye abantu abakola ebituufu balibasalira emisango, ogw'obwenzi n'ogw'obutemo, gyombi gyabasinga kuba benzi era batemo.”

⁴⁶ Musengwa Katonda akoba ati: “Mubasindikeku ekikuukuulu ky'abantu kibatuntuze era kibanhagululeku ebyaibwe.

⁴⁷ Kibakube amabaale, kibafumite empiima, kimale kiite n'abaana baibwe, era kyokye n'endhu dhaibwe.

⁴⁸ Ntyo bwendirekeza obwenzi mu nsi eno, okwo kwaba okulabula eri abakazi boonaboona, balobe kukola bwenzi bw'abo.

⁴⁹ Era imwe abakazi aboluganda mwembi, ndibeesasulizaaku naababonereza olw'obwenzi bwaimwe n'olw'okusinza ebitali Katonda. Olwo mulimanha nga ninze Musengwa Katonda.”