Ezekieli 22 - Baibuli Ekibono kya Katonda 2014

Ebibi bya Yerusalemu

¹ Agho Musengwa Katonda yaayogera ninze, yankoba ati:

² “Iwe omuntu, onaasala omusango? Onaasalira ekibuga ekyo omusango ekiidhwire abatemo? Kale ni kimanhise ebyenhinhalwa byonabyona bye kikola.

³ Kobera ekibuga ekyo oti nze Musengwa Katonda ndi kukoba nti: Olw'okuba waita abantu bo kamaala ababa mu iwe, era weeyonoona n'okusinza ebitali Katonda, ekiseera kyo kiri kwidha.

⁴ Waiza omusango ogw'obutemo olw'okwita abantu kamaala batyo, era weeyonoona n'ebifaananie ebisinzibwa ebitali Katonda bye wakola. Olwo waaleetera olunaku lwo okutuuka amangu n'ekiseera kyo okuwaaku. Kyenava ni nkuleka okuvumibwa amaghanga, n'okunhoomebwa ensi dhoonadhoona.

⁵ Abakuli okumpi n'abakuli eghala balikunhooma, kuba oli n'eriina eibi era oidhwire obusasamalo.

⁶ “Bona eno, abakulembeze ab'omu Isiraeli ababa mu iwe, baita abantu nga bakozesa obukumu bwaibwe.

⁷ Abazaire mu iwe batwalibwa ng'ekitagasa, ebintu by'abasenze byakupankupanizibwa, banamwandu ni bamulekwa baatulugunhizibwa.

⁸ Onhoomerera ebintu byange ebitukuvu, era waayonoona n'olunaku lwange olwa Sabbato.

⁹ Mu iwe mulimu abantu abaghaayiriza banaibwe olw'okwenda okubaitisa, mwabaamu abalya ku misengo gye bagheerayo mu masabo ku nsozi, mwabaamu n'abeesanhusa n'okukola obwenzi.

¹⁰ Mu iwe mulimu abasaadha ababa ni baka baiseibwe mu buliri, era mwabaamu n'abo abakaka abakazi ni baba nabo mu buliri nga bali mu biseera byaibwe eby'okulwala.

¹¹ Mu iwe mulimu abenda ku baka beene, mwabaamu abenda ku baka batabane baibwe, n'abenda ku baanhinaibwe abaana ba baiseibwe.

¹² Era mu iwe mulimu abagulirirwa okutemula abantu. Mwabaamu abawola banaibwe olw'okubafunaku amagoba olwo beene beeyongere okuba abakombe. Era mwabaamu n'abatoola ebintu bya banaibwe mu kukupankupania. Abantu abo baaneerabira ira.” Musengwa Katonda atyo bw'akoba.

¹³ “Kale bona eno, ndikubonereza n'amaani olw'obunhazi bwo n'obutemo bwo.

¹⁴ Olowooza oti mu biseera bye ndikukangaivuliramu, oliba okaalimu amaani era ng'okaasobola waire okugalula omukono gwo? Nze Musengwa Katonda ninze mwene nkobye, era ekyo ndikikola.

¹⁵ Abantu bo ndibasansaaniza eyo mu maghanga, naabaidhuza eyo mu nsi enhingi, olwo naakumalamu ebikolwa byo ebibi byonabyona.

¹⁶ Agho amaghanga ago galikunhoomoola waawaamu ekitiibwa, era waamanha nga ninze Musengwa Katonda.”

Ekyokero kya Katonda

¹⁷ Kabiri Musengwa Katonda yankoba ati:

¹⁸ “Iwe omuntu, Abaisiraeli bafuuse iseedha omuzira mugaso. Bafuuse iseedha eriviiremu feeza n'ekyuma eky'ekikomo, n'eibaati, n'ekyuma ekigumu einho, n'ekyuma ekizitogha einho, oluvainhuma lw'okusaanuusibwa n'okukenenulwa mu muliro.

¹⁹ Agho ni, nze Musengwa Katonda kyenva ni mbakoba nti: Olw'okuba boonaboona baafuuka iseedha buseedha, ndibasololeza ghalala mu Yerusalemu,

²⁰ ng'abantu bwe basoloza feeza, n'ekyuma eky'ekikomo, n'ekyuma ekigumu einho, n'ekyuma ekizitogha einho n'eibaati, ni babita mu kyokero ni babisaanuusa. Zeena ntyo bwe ndibasoloza, nga ndiku obusungu n'ekiruyi, naabata agho naabasaanuusa.

²¹ Bwenebwene ndibasoloza naabakumaku omuliro ogw'obusungu bwange, baasaanuukira mu Yerusalemu.

²² Nga feeza bw'asaanuukira mu kyokero, boona bwe balisaanuukira mu Yerusalemu, memale baamanha nga nze Musengwa Katonda mwene, ninze mbamaliireku obusungu bwange.”

Ebibi by'abakulembeze ab'omu Isiraeli

²³ Kabiri Musengwa Katonda yankoba ati:

²⁴ “Iwe omuntu, kobera Abaisiraeli oti ensi yaibwe ti nongoofu, era ndigibonereza olw'obusungu obundiku.

²⁵ Abakulembeze baamu bali ng'oti mpologoma ewologoma, n'ekankanula ky'egemye. Baita abantu, baanhaga empiiya n'eby'obukombe, era baaleka abakazi kamaala nga bafuuse banamwandu.

²⁶ Bakabona baamu baamenha amateeka gange. Tibaawulagho bintu bitukuvu na bitali bitukuvu, waire okwawulagho ebirongoofu n'ebitali birongoofu. Era tibakuza lunaku lwange lwa Sabbato, baaleetera abantu obutampa kitiisa.

²⁷ Abakulembeze baamu bali ng'oti misege egikankanula kye gigemye. Baita abantu baabazikiriza, basobole okutwala ebintu byaibwe, bakombaghale.

²⁸ Abalanzi baamu baghemba ku bibi ebyo, ng'omuntu bw'asiiga ekimante langi endheru. Okubonekerwa kwe bafuna kwa buguya, ni bye balagula ti bituufu naire, nga bakoba mbu, ‘Musengwa Katonda akoba ati,’ ate nga nze Musengwa Katonda nzira kye nkobye naire.

²⁹ Abatyamye b'omu nsi eyo bakola obukupankupania, baanhaga ku bantu ebyaibwe. Banhigiriza abaavu n'abali mu bwetaavu, baakupankupania ebintu by'abasenze aghazira kusaasira naire.

³⁰ Nanoonia mu bantu abo aye tyafunamu waire mulala, asobola okuzimba obuyaaka ekimante waire okukuuma mu bifo ekimante ghe kyawomolwa ebituli, asobole okuwonia ensi eyo, ndobe kugizikiriza.

³¹ Kale ndibamaliraku obusungu bwange, naabazikiriza n'omuliro gw'ekiruyi ekindiku, naabeesasuulizaaku olw'ebyo bye baakola. Nze Musengwa Katonda ninze nkobye.”