Ezekieli 21 - Baibuli Ekibono kya Katonda 2014

Empiima ya Musengwa Katonda

¹ Agho Musengwa Katonda yaayogera ninze, yankoba ati:

² “Iwe omuntu, amaiso go galingirize ku Yerusalemu. Olange ng'ovumirira ebifo abantu bye basinzizaamu, era ng'olabula ensi Isiraeli.

³ Kobera ensi Isiraeli oti nze Musengwa Katonda ndi kukoba nti: Bona eno, buti nze nfuuse muzigu y'oli, era ndisowola empiima yange mu kiruutu kyayo naita abantu abakulimu, abatuufu n'ababi, naabakumalamu.

⁴ Olw'okukumalamu iwe abantu abakulimu, abatuufu n'ababi, ndisowola empiima yange mu kiruutu kyayo naalwanisa abantu boonaboona, okuva ku luuyi olw'omukono omusaadha olw'e buvandhuba okutuuka ku luuyi olw'omugooda olw'e buvandhuba.

⁵ Abantu boonaboona balimanha nga nze Musengwa Katonda mwene, ninze nsowoire empiima yange mu kiruutu kyayo, era nga tija kugiizaamu.

⁶ “Kale ni, iwe omuntu, sinda inho ng'omuntu ali n'enaku enene ku mwoyo, sinda nga weenhiinkaire inho, bakubone.

⁷ Bwebakubuuza bati, ‘Lwaki oli kusinda?’ Ng'obairamu oti, ‘Ndi kusinda olw'amawulire ge mpuliire, ag'ebyo ebiri kwidha. Bwe birituuka, boonaboona emyoyo giribatekemuka, emikono gyabalebera, ebikiryaivu byabadhugumira, era baazirika. Bona eno, ebyo bija kubaagho bituukirire.’ ” Musengwa Katonda atyo bw'akoba.

⁸ Kabiri Musengwa Katonda yankoba ati:

⁹ “Iwe omuntu, langa okobere abantu, oti nze Musengwa Katonda ndi kukoba nti: Empiima, empiima bagighagaire era baagizigula.

¹⁰ Bagighagaire kutirimbula, baagizigula emyanse ng'oti lukuba. “Kale tighasobola kubaagho kusagamba, kuba abantu bange banhoomye buli kibonerezo, ghalala n'okulabulwa kwonakwona.

¹¹ Agho ni empiima bagizigwire nga bagitegeka okukozesebwa. Bagighagaire era baagizigula, omwisi agigeme mu ngalo.

¹² Iwe omuntu, lira amaziga era owowoole, kuba empiima eno eidhiriire bantu bange, n'abakulembeze boonaboona ab'omu Isiraeli. Baja kugheebwayo baitibwe ghalala n'abantu bange abandi boonaboona. Agho ni weekube ku bisambi weepampagule olw'okusoberwa.

¹³ Abantu bange ndidha kusooka mbalebe mbone bwe bali. Aye bwebanaanhooma okulabulwa, ebyo byonabyona biidha kubaagho.” Musengwa Katonda atyo bw'akoba.

¹⁴ “Kale, iwe omuntu langa, okube mu ngalo empiima eidhe eteme emikuzi ebiri, kabiri eteme n'ogwokusatu. Eyo n'empiima ebazingiiza okubatirimbula mu bungi.

¹⁵ Empiima eyo ereetera emyoyo gy'abantu okutekemuka, beekontola baagwa n'okugwa. Ngitaire mu kibuga nga bagizigwire, eri kumyansa ng'oti lukuba, ng'eteegereire okutirimbula.

¹⁶ Iwe empiima, tema ku luuyi olw'omukono omusaadha, ni ku lw'omugooda, yoonayoona obwogi bwo ye bunaalinga.

¹⁷ Zeena ndidha kukuba mu ngalo neemaleku obusungu.”

Empiima ya kyabazinga ow'e Babilonia

¹⁸ Kabiri Musengwa Katonda yankoba ati:

¹⁹ “Iwe omuntu, taagho engira ibiri, kyabazinga ow'e Babilonia mw'asobola okubita ng'agemye empiima ye. Dhiteegho nga dhombi dhiviira mu kiketezo kirala ekyo, era ote n'ekipande engira edho dhombi ghe dhaagaananira.

²⁰ Laga engira kyabazinga mw'anaabisa empiima okutuuka ku kibuga Rabba eky'Abammoni, n'engira mw'anaagibisa okutuuka e Buyudaaya ku kibuga Yerusalemu ekyezungulwirwa ebimante ebigumu.

²¹ Kyabazinga ow'e Babilonia oyo ayemereire ghale engira dhombi ghe dhaagaananira. Olw'okwenda okuzuula engira y'anaagema, ali kusuula obulaso ghansi, yeeraguza ku misambwa, era yaakebera eini ery'ensolo y'aghaireyo ng'omusengo.

²² Mperaano agemye akalaso mu mukono gwe omusaadha, ng'akalulu kagwire ku kibuga Yerusalemu. Akalaso ako kamukoba aje akisimbeku ebintu eby'okukozesa okuwomola ekimante kyakyo, akizimbeku ebituuti ebirengererwaku, n'ebintu eby'okukontesa endhigi dh'emiryango gyakyo, era abunge n'emungo dh'eitaka edh'okuniiniraku okukirumba. Olwo akube enduulu edh'omu lutalo, era aite.

²³ Aye okulagula okwo kwidha kuboneka ng'oti kwa buguya eri ab'omu Yerusalemu, kuba baakola endagaano ni kyabazinga oyo. Aye ate okulagula okwo kwidhie okubaidhukiza ebibi byaibwe bye baakola, n'okubalabula nti baidha kutwalibwa mu bunhage.

²⁴ “Agho ni, nze Musengwa Katonda ndi kukoba nti: Ebibi byaimwe bimanhiike era biboneekerera mu bikolwa byaimwe byonabyona. Kale ni nga bwemubindidhukiza buli kaseera, nja kubaghaayo eri abazigu baimwe, babageme.

²⁵ “Iwe omufuzi wa Isiraeli, omubi era atasiimya Katonda naire, olunaku lwo lutuuse, n'ekiseera eky'okubonerezebwa kwo okusembayo.

²⁶ Nze Musengwa Katonda ndi kukoba nti: Toolaku engule yo ku mutwe era osibuleku n'ekitambaala kyo ku mutwe, kuba ebintu tibirisigala nga bwe biri naire. Niinia abanafu babe bafuzi, ate ab'obukumu obaniinuse babe ghansi.

²⁷ Ekibuga ekyo ndikizikiriza kyafuuka bifulukwafulukwa, okutuusa oyo ye nhenda okukigha lw'aliidha, ni nkimugha.

Empiima n'Abammoni

²⁸ “Iwe omuntu, langa okobere abantu bino, nze Musengwa Katonda, bye ndi kukoba Abammoni, abavuma Abaisiraeli. Bakobere oti: ‘Bona empiima, empiima yiiyo bagisowoireyo okutirimbula era baagizigula emyanse ng'oti lukuba.

²⁹ “‘Okubonekerwa kwe mufuna kwa buguya, ni bye mulagula ti bituufu naire. Muli babi abatasiimya Katonda naire, era olunaku lwaimwe lutuuse, n'ekiseera eky'okubonerezebwa kwaimwe okusembayo. Empiima eja kusala amamiro gaimwe.

³⁰ “ ‘Mwize empiima mu kiruutu kyayo. Mu kifo kyene mwe mwatonderwa, mu nsi yeene mwe baabazaalira, mwe ndibasalirira omusango.

³¹ Ndibamaliraku obusungu bwange, ekiruyi kyange kyabatumbukiraku ng'oti muliro, era naabaghaayo mu ngalo edh'abantu abakambwe ng'oti nsolo, abali n'obumanhirivu mu kuzikiriza.

³² Muliba ng'oti nku nga muli mu muliro oguli kwaka. Omusaayi gwaimwe guliyuyika mu nsi yaimwe yeene, olwo ghalobe kubaagho muntu airamu kubaidhukira.’ ” Musengwa Katonda atyo bw'akoba.