Ezekieli 2 - Baibuli Ekibono kya Katonda 2014

¹ “Iwe omuntu, yemerera ku magulu go ndhogere n'iwe.”

² Amamiro ago bwe gaali gali kwogera ninze, omwoyo gwa Katonda gwandidhaku, gwanginga gwanhemereza ku magulu gange. Naawulira ng'amamiro gali kwogera ninze,

³ nga gakoba gati: “Iwe omuntu, ndi kukutuma y'Abaisiraeli, eighanga eryo ery'abadheemu. Abantu abo banvaaku baakola ebibi ye ndi ng'oti ni badhaadha baibwe bwe baakola, era bakandheemera ni ye buli eno.

⁴ Bali n'empwitu era tibantaamu kanhagansi naire. Kale ndi kukutuma ye bali, obakobere nze Musengwa Katonda bye ndi kubakoba.

⁵ Oba abadheemu abo bakuwulirisa oba tibakuwulirisa, aye era balimanha nga ghaalighooku omulanzi eyababaamu.

⁶ “Era iwe omuntu otabatyanga waire okutyanga bye boogera. Ni bw'onaababangamu ng'oti n'omuntu ali mu nkandwa ni mu mawa, oba ng'oti n'atyaime ku siga, otatyanga badheemu abo bye boogera waire okudhugumira olw'emmoga yaibwe eidhwire obukambwe.

⁷ Oidha kubakobera bye ndi kukutuma okubakobera, oba bawulirisa oba tibawulirisa.

⁸ “Aye iwe omuntu wulirisa kye ndi kukukoba: otaba mudheemu ng'oti ni beene. Kola oyasame, olye kye nja okukugha.”

⁹ Naja okulinga nti, nga mbona omukono ogusonse ye ndi. Era okuja okwetegereza nga mbona gugemye enzingo ey'ekitabo erimu ebighandiikiibwaku.

¹⁰ Agho yaazingulula enzingo ey'ekitabo eyo mu maiso gange, naabona nga yaghandiikibwaku munda ni ku ngulu. Yali nga yaghandiikibwaku ebibono eby'okulira enaku, n'okugegenga, n'okuwowoola.