Ezekieli 19 - Baibuli Ekibono kya Katonda 2014

Olwembo olw'enaku

¹ Agho Musengwa Katonda yankoba nhembere abakulembeze ba Isiraeli olwembo luno olw'enaku,

² nga nkoba nti: Inhoko yali ng'oti mpologoma nkazi, yaatyama yaayonsa ebyana byayo nga n'empologoma enume enkambwe dhiri agho!

³ Yakuza ekirala ku byana byayo, kyafuuka empologoma enume ento. Empologoma enume ento eyo yaayega okuyiiga, era yaalya n'abantu.

⁴ Amaghanga gaafuuwa amagwala okugiyiiga, baagigemya mu lwina lwe baagitega. Baagighaluza n'amalobo baagitwala mu nsi Misiri.

⁵ Inhoko bwe yabona nga biri bityo, eisuubi lyamuwaamu. Yaakuza ekindi ku byana byayo ebyo, kyafuuka empologoma enume ento.

⁶ Era kyakulira irala, kyatambulatambulanga nga kiri ghalala n'empologoma dhiinaakyo. Kyayega okuyiiga n'okulya n'abantu.

⁷ Kyayonoonayonoona ebifo byaibwe eby'okwewogomamu, kyazikiriza ebibuga byaibwe. Nga buli lwe kiwologoma kiti, abantu batya inho n'ebyalo byaibwe byawolongera.

⁸ Agho amaghanga gaava ku ndhuyi dhoonadhoona, geesoloza okwidha okukirumba. Baakitega olutuula, baakigemya mu lwina lwe baakitega.

⁹ Baakighaluza n'amalobo baakisibira mu kaguli, era baakitwalira omwo eri kyabazinga wa Babilonia. Baakikuuma butiribiri, olwo abantu balobe kukiwulira kabiri nga kiwologomera ku nsozi dha Isiraeli.

¹⁰ Inhoko yali ng'oti muzabbibu gwe basimbye mu isamba kumpi n'amaadhi, ni guba n'ensaga kamaala era nga gubala inho ebibala.

¹¹ Olusaga lwagwo olwasingamu obugumu lwakula lwaleegha, baalukolamu omwigo ogw'obwakyabazinga. Omuzabbibu ogwo gwakula gwaleegha inho ghaigulu, ng'ensaga dhaagwo edhiriku amakaba amangi badhirengerera ghala.

¹² Aye abantu baagwiwululagho n'emizi mu busungu, baagusuula ghansi. Empewo eva e buvandhuba yaidha yaagukaza. Ebibala byagwo baabikunkumusa ghansi, n'ensaga dhaagwo baadhikookola dhaakala, era baadhookya omuliro.

¹³ Buti baagusimba mu irungu, mu itaka eikalu ery'olubbalangu.

¹⁴ Enduli y'omuzabbibu ogwo yaagema omuliro, omuliro ogwo gwayokya ensaga dhaagwo n'ebibala byaku. Tigukaaliku nsaga ngumu dha kutema kukolamu miigo gya bwakyabazinga. Olwo n'olwembo olw'enaku, era baidha kulwembanga buli kaakyeire.