Ezekieli 18 - Baibuli Ekibono kya Katonda 2014

Obuvunaanizibwa obwa buli muntu

¹ Kabiri Musengwa Katonda yaayogera ninze yankoba ati:

² “Mutera okukozesa endhogera ekoba eti, ‘Abazaire baalya emizabbibu egikaagha, aye ate abaana n'abaagemwa engigina ku maino.’ Muba mutegeeza ki?

³ “Aye nze Musengwa Katonda ndayira nti nga bwendi omulamu, endhogera eyo timwidha kwiramu kugikozesa mu Isiraeli kabiri.

⁴ Bona eno, nze ninze nfuga obulamu obwa buli muntu, ka bube obw'omuzaire oba obw'omwana. Kale omuntu akola ebibi n'alifa.

⁵ “Omuntu omutuufu n'oyo akola ebituufu ebigwaniire ng'ajiira ku mateeka.

⁶ Atasinza ebyo ebitali nze Katonda ab'eighanga Isiraeli bye basinza, era atalya ku misengo gye bagheerayo mu masabo ku nsozi. Atasendasenda muka beene n'aba naye mu buliri, era ataba mu buliri na mukazi ng'ali mu biseera bye eby'okulwala.

⁷ Atafufunkiriza muntu yeenayeena, era atanhaga kintu kyonakyona ku muntu. Airiza eyamwewolaku omusingo gwe, n'agha omuyala eky'okulya, era n'agha ali amadu eky'okuvaala.

⁸ Atawola muntu lwa kumufunaku magoba olwo mwene yeeyongere okuba omukombe, era eyeesamba okukola ebibi, ate n'asalira abantu emisango mu mazima.

⁹ Ajiira ku biragiro byange era n'akuuma amateeka gange. Oyo n'omuntu omutuufu era bwenebwene aliba mulamu.” Musengwa Katonda atyo bw'akobye.

¹⁰ “Aye omuntu asobola okuzaala omwana omunhazi, omutemo,

¹¹ oba akola ebintu ng'oti ni bino: ng'alya ku misengo abantu gye bagheerayo mu masabo ku nsozi, yaasendasenda baka beene yaaba nabo mu buliri,

¹² yaakiriga abaavu n'abali mu bwetaavu, yaakola obunhazi, yaaloba kwiriza muntu eyamwewolaku musingo gwe, yaasinza ebyo ebitali nze Katonda, yaakola ebyenhinhalwa,

¹³ era yaawola omuntu lwa kumufunaku magoba olwo mwene yeeyongere okuba omukombe. Bwenebwene omuntu oyo agwaniire okuba omulamu? Busa naire, tibalimulekagho nga mulamu. Alifa olw'okukola ebyenhinhalwa ebyo byonabyona, era aliba nga ni mwene eyeereeteire okufa.

¹⁴ “Ate omuntu oyo asobola okuzaala omwana, era omwana oyo yaabona ebibi byonabyona ise bye yakola, aye yaaloba kubikola.

¹⁵ Nga tasinza ebyo ebitali nze Katonda ab'eighanga Isiraeli bye basinza, waire okulya ku misengo abantu gye bagheerayo mu masabo ku nsozi. Nga tasendasenda baka beene n'aba nabo mu buliri,

¹⁶ era nga ghazira muntu yeenayeena y'akolaku kibi. Nga tatwala musingo gwa muntu yamwewolaku, waire okunhaga ekintu ku muntu yeenayeena. Aye ng'agha abayala eby'okulya, n'abali amadu yaabagha eby'okuvaala.

¹⁷ Nga yeesamba okukola ebibi, tawola muntu lwa kumufunaku magoba olwo mwene yeeyongere okuba omukombe, akuuma ebiragiro byange era yaajiira ku mateeka gange. Omuntu oyo talifa lwa bibi ise bye yakola. Bwenebwene aliba mulamu.

¹⁸ Aye ise olw'okuba yali mukupankupania, ng'anhaga ku bantu ebyaibwe era ng'akola ebitali birungi, alifa olw'ebibi bye yakola.

¹⁹ “Aye musobola okwebuuza muti, ‘Lwaki omwana tibamuvunaana bibi ise bye yakola?’ Eky'okwiramu kiri nti omwana bw'aba nga yakola ebituufu ebigwaniire ng'ajiira ku mateeka, era nga yali mwegendereza okukuuma ebiragiro byange, aliba mulamu.

²⁰ Kale omuntu akola ebibi n'alifa. Omwana tibalimuvunaana bibi muzaire we bye yakola, waire omuzaire okuvunaanibwa ebibi omwana we bye yakola. Omuntu omutuufu aligheebwa empeera olw'ebituufu by'akola, ate omubi yaavunaanibwa olw'ebibi by'akola.

²¹ “Aye omuntu omubi bw'akyuka n'aleka ebibi bye byonabyona bye yakola, n'akola ebituufu ng'ajiira ku mateeka, talifa. Bwenebwene aliba mulamu.

²² Ebibi byonabyona bye yakola birimusoniyibwa, yaaba mulamu olw'ebituufu bye yakola.

²³ Mulowooza muti nze nhumirwa okubona omwonooni ng'afiire? Busa naire! Nhenda bwende akyuke aleke ebibi bye, abe mulamu.” Musengwa Katonda atyo bw'akobye.

²⁴ “Aye omuntu omutuufu bw'akyuka n'alekera okukola ebituufu, naakola ebibi, era n'akola ebyenhinhalwa byonabyona abantu ababi bye bakola, mulowooza muti aliba mulamu? Busa naire! Ghazira naire ekirala ku bikolwa bye eby'obutuufu bye yakola, kiriidhukirwa. Era alifa olw'obutaba mwesigwa, n'olw'ebibi by'akola.

²⁵ “Aye imwe mukoba muti, ‘Musengwa Katonda mu nkola ye tasala nsonga mu butuufu.’ Aye muwulire imwe ab'eighanga Isiraeli: Obwo bwenebwene nze mu nkola yange tisala nsonga mu butuufu? Nti katyo niimwe mutasala nsonga mu butuufu mu nkola dhaimwe!

²⁶ Omuntu omutuufu bw'akyuka n'alekera okukola ebituufu, naakola ebibi, alifa olw'ebibi by'akola.

²⁷ Aye omwonooni bw'akyuka n'alekera okukola ebibi, n'akola ebituufu ebigwaniire ng'ajiira ku mateeka, aliwonia obulamu bwe

²⁸ kuba olwo aba yeefumintiriiza yaakyuka, yaalekera okukola ebibi byonabyona bye yakola. Bwenebwene talifa, aliba mulamu.

²⁹ Aye imwe ab'eighanga Isiraeli mukoba muti, ‘Musengwa Katonda mu nkola ye tasala nsonga mu butuufu.’ Ee, imwe Abaisiraeli, obwo bwenebwene nze mu nkola yange tisala nsonga mu butuufu? Nti katyo niimwe mutasala nsonga mu butuufu mu nkola dhaimwe!

³⁰ “Nze Musengwa Katonda ndi kubakobera imwe Abaisiraeli, nti ndisalira buli muntu ku imwe omusango nga njiira ku bikolwa bye. Mwenenie mukyuke muve mu bibi byaimwe byonabyona, olwo ebibi byaimwe ebyo lwe bitaabaviiremu kuzikirira.

³¹ Mwetooleku ebibi byonabyona bye mubairenga mukola, mufune emyoyo emiyaaka n'endowooza empyaka. Imwe abantu b'eighanga Isiraeli, lwaki mwenda okufa?

³² Nze tinhumirwa kubona muntu yeenayeena ng'afiire. Kale ni mukyuke muve mu bibi byaimwe, memale mube balamu.” Musengwa Katonda atyo bw'akobye.