Ezekieli 16 - Baibuli Ekibono kya Katonda 2014

Yerusalemu ti kyesigwa ye Katonda

¹ Kabiri Musengwa Katonda yaayogera ninze, yankoba ati:

² “Iwe omuntu, manhisa Yerusalemu ebyenhinhalwa bye kikola,

³ okikobere bino, nze Musengwa Katonda, bye ndi kukikoba nti: “Iwe Yerusalemu, ensimuko yo n'obuzaale bwo biri mu nsi Kanaani. Lata wo yali Muamori ate inhoko yaaba Muhitti.

⁴ Bwe wazaalibwa tibaakusalaku lulira, waire okukunaazaaku n'amaadhi okutukula. Era tibaakusiigaku muunhu waire okukubwikaku engoye.

⁵ Ghazira muntu yakusaasira n'akukolera waire ekintu ekirala kiti ku ebyo. Olwazaalibwa oti baakukyayiragho, baakusuula bwa mu nsiko.

⁶ “Bwe nali ndi kubitagho nti naakubona ng'oli kusambagalira mu musaayi gwo. Wali osaabaine omusaayi aye nga tisobola kukuleka kufa.

⁷ Kale naakulabirira waakula n'amaani ng'oti n'ekimera eky'omu nimiro. Era waakulira irala waafuuka mughala muguna mwene atoonha obutoonhe. Waasunia amabeere era waakuza n'enviiri, aye ng'oli madu geene, tovaire.

⁸ “Kabiri bwe nali ndi kubitagho nti naakubona ng'otuusiiza ekiseera eky'okufumbirwa. Agho naakughembaku ekivaalo kyange waalekera okuba amadu. Bwenebwene naakusuubiza okukufumbirwa era naamala naakola n'iwe endagaano ey'okufumbiraganwa, waafuuka wange.” Musengwa Katonda atyo bw'akoba.

⁹ “Agho naatoola amaadhi naakunaazaaku omusaayi gwo gwonagwona, era naakusiiga omuzigo.

¹⁰ Nakuvaaza engoye edhaalukibwa obukalamu, n'engaito edh'oluwu olulungi einho, naakughemberera olugoye olughegheevu, era naakusiba n'ekitambaala ekya liiri.

¹¹ Nakuvaaza ebyamadholobera: ebikomo ku makono, n'ebinhere mu nkoto.

¹² Naakutaaku n'empeta ey'oku nhindo, n'eby'oku matu, naakuvaaza n'engule eboneka obulungi ku mutwe.

¹³ Kale waaba nga weenaweena nkudholiige ni zaabu ni feeza, era ng'ovaala engoye empegheevu, n'edha liiri edhaalukibwa obukalamu. Waalyanga emere esinga obulungi, n'omuzigo ogw'ebibala eby'emiti emyoliva, era waanhwanga n'omudheenene ogw'endhuki. Olwo weeyongera okuba omuntu aboneka obulungi einho, waanhirira ng'oti bwa muka kyabazinga.

¹⁴ Era wamanhikana inho mu maghanga kamaala olw'obulungi obw'emboneka yo obwo, obwali bubitiriire einho olw'ebyo bye nakukolaku.” Musengwa Katonda atyo bw'akoba.

¹⁵ “Aye weesigulira ku bulungi obw'emboneka yo obwo ni ku kumanhikana kwo, waakola obwamalaaya. Waalaaya ku buli muntu eyabitangagho.

¹⁶ Watoola ku bivaalo byo waatimba amasabo go okugadholiga, waakolera omwo obwamalaaya mu nsambo etabangaghooku era etaja kubaagho kabiri.

¹⁷ Watoola ebyamadholobera ebirungi einho ebya zaabu n'ebya feeza bye nakugha, weekoleramu ebifaananie ebiri ng'oti basaadha wabisinza, waaloba kuba mwesigwa ng'oti n'omuntu akola obwamalaaya.

¹⁸ Waatoola engoye edhaalukibwa obukalamu dhe nakugha, wadhibivaaza. Waatoola omuzigo gwange ogw'ebibala eby'emiti emyoliva n'obubbaani bwange, waabighaayo ye biri ng'ebigheebwayo.

¹⁹ Emere yange ye nakugha ey'obuwunga obuseereibwa obukalamu, n'omuzigo ogw'ebibala eby'emiti emyoliva, n'omudheenene ogw'endhuki, waabighaayo ye biri ng'ebigheebwayo ebiri n'akawoowo akasanhusa ebifaananie ebyo.” Musengwa Katonda atyo bw'akoba.

²⁰ “Era waatoola batabane bo ni baghala bo be wanzaalira, waabaghaayo ye biri ng'emisengo egyokebwa. Olowooza oti ekya iwe obutaba mwesigwa ye ndi kyali kitono,

²¹ memale otoole n'abaana bange boona obatirimbule okubaghaayo y'ebifaananie ebyo, bookebwe mu muliro ng'emisengo?

²² Mu ebyo byonabyona ebyenhinhalwa n'obwamalaaya bye wakola, tiwaidhukiraku na bya mu buto bwo, nga bwe wali amadu geene, era ng'oli kusambagalira mu musaayi gwo.”

Yerusalemu ekibuga malaaya

²³ Musengwa Katonda akukoba iwe Yerusalemu ati: “Okagwireku, era okagwireku inho! Bwe wamala okukola ebibi ebyo byonabyona,

²⁴ kabiri waayongeraku n'okwezimbira mu buli luya lwa kibuga, amasabo okukoleramu obwamalaaya n'ebifo ebigulumivu eby'okusinzizaamu ebintu ebyo ebitali nze Katonda.

²⁵ Olw'emboneka yo enungi, mu buli maagaanana ga luguudo wataagho ekifo okukoleramu obwamalaaya, weekubanga ku buli muntu eyabitangagho. Mu nsambo eyo obwamalaaya bwo bweyongerangaku buli lunaku.

²⁶ Wayendaku ni ku Bamisiri, baliraanwa bo abeegombi ng'oti ki! Obwamalaaya bwo bweyongerangaku bweyongere, wansonsoonia wandeetera okusungughala.

²⁷ “Kale buti ngalwire omukono gwange okubabonereza. Era nja kukendeeza ku mugabo gwo, nkugheeyo y'abazigu bo Abafilisiti abakweguguna obwegugune, era abeesinwa eira ebikolwa byo eby'obwenzi.

²⁸ “Wayendaku ni ku Bassiria boona, olw'obutasinwa bw'oli nabwo. Bwenebwene waalaaya nabo, aye era waasigala ng'okaayenda bwende.

²⁹ Weeyongera okukola obwamalaaya, waayendaku ni ku basuubuzi Abababilonia. Aye era waasigala ng'okaayenda bwende.”

³⁰ Musengwa Katonda akoba ati: “Omwoyo gwo gwakula gutya, iwe okukola ebintu ebyo byonabyona ng'oti ni malaaya ataswalaku naire:

³¹ ni weezimbira mu buli maagaanana ga luguudo amasabo okukoleramu obwamalaaya, ni mu buli luya lwa kibuga n'ozimbamu ebifo ebigulumivu eby'okusinzizaamu ebintu ebyo ebitali nze Katonda. Aye ate waaba nga toli kunoonia mpiiya ng'oti ni malaaya eyeetunda!

³² Aye waaba ng'omukazi omufumbo omwenzi alekerera iba, n'aja n'ayenda abasaadha abandi.

³³ Kya buliidho nti abasaadha n'abatonera bamalaaya ebirabo. Aye kabiri iwe mwene niiwe otonera abagonzi bo ebirabo, okubagulirira olw'obwenzi bwo, baidhe okuva mu ndhuyi dhoonadhoona bakole niiwe obwamalaaya.

³⁴ Kale waaba ng'oli wa ndhawulo ku bakazi abandi bamalaaya, kuba ghazira yakupikiriza kufuuka malaaya. Kabiri iwe mwene niiwe ogulirira abasaadha, se ti beene okukusasula. Bwenebwene oli wa ndhawulo.”

Katonda asalira Yerusalemu omusango

³⁵ Kale ni, iwe Yerusalemu malaaya, wulira Musengwa Katonda by'akoba.

³⁶ Musengwa Katonda oyo akoba ati: “Waweesa ensoni, waatoolamu engoye waasigala madu, era olw'obwenzi bwo weeghaayo y'abagonzi bo, ni y'ebitali nze Katonda bye wasinzanga. Era waaghangayo abaana bo ye biri, baitibwe ng'emisengo.

³⁷ Olw'ebyo bye wakola, ndisoloza abagonzi bo boonaboona be wasanhukanga nabo, abo be wayendanga n'abo be wakyaghanga. Ndibasoloza baava ku ndhuyi dhoonadhoona, baidha baakwefuulira baakulumba. Olwo naakutoolamu engoye dho, boonaboona baakubona ng'oli madu.

³⁸ Ndikusalira omusango gwe basalira abakazi abafumbo abenzi era abatemo, naakugha ekibonerezo eky'okwitibwa, olw'obusungu n'enkikidi bye wandeetera okuba nabyo olw'obwenzi bwo.

³⁹ Ndikughaayo mu ngalo edh'abagonzi bo abo, baaja baasuula ghansi amasabo go era baamenhagho ebifo byo ebigulumivu by'osinzizaamu ebintu ebitali nze Katonda. Balikutoolamu engoye dho, era baakutoolaku ebyamadholobera byo ebirungi einho, baakuleka ng'oli madu ng'ozira kantu naire.

⁴⁰ “Balikuleetaku eigye iramba, baakukuba amabaale era baakutematema n'empiima dhaibwe.

⁴¹ Balyokya endhu dho, baakubonereza ng'abakazi abandi kamaala babona. Nze ndikulekeza okukola obwamalaaya, waaba nga tokaagulirira bagonzi bo.

⁴² Ntyo bwendikumaliraku obusungu bwange, olwo naalekera agho okuba n'enkikidi ku lulwo, ye wandeetera okuba nayo olw'obutaba mwesigwa ye ndi. Nditereera naalekera agho okukusungughalira.

⁴³ Olw'okuba tiwaidhukira bya mu buto bwo, aye waakolanga ebinsungughaza, kyendiva ni nkwesasuulizaaku. Kale lwaki ku bikolwa byo bire ebindi byonabyona ebyenhinhalwa, wayongerezaaku n'obwenzi?” Musengwa Katonda atyo bw'akobye.

Inhina w'omughala ni mughala we bafaanania empisa

⁴⁴ Musengwa Katonda akoba ati: “Abantu baidha kukozesanga ensambo eno nga bakwogeraku bati, ‘Inhina w'omughala ni mughala we bafaanania empisa.’

⁴⁵ Bwenebwene oli mughala wa inhoko, eyakyagha iba n'akyagha n'abaana be. Era oli nga baganda bo, abaakyagha baibaibwe ni bakyagha n'abaana baibwe. Inhaimwe yali Muhitti, ate iseimwe yaaba Muamori.

⁴⁶ “Mukulu wo bamweta Samaria, ng'ali ku luuyi lwo olw'omukono omugooda olw'e buvandhuba ghalala n'ebibuga bye. Ate muto wo bamweta Sodoma, ng'ali ku luuyi lwo olw'omukono omusaadha olw'e buvandhuba ghalala n'ebibuga bye.

⁴⁷ Aye tikyakumala kwebisa nga beene, oba okukola ebyenhinhalwa nga beene kuba ghaabitagho bwa kaseera katono, waayonooneka n'okubasinga mu byonabyona by'okola.

⁴⁸ “Nze Musengwa Katonda omulamu, ndayira nti muganda wo Sodoma aghalala n'ebibuga bye tibaakola bibi nga iwe aghalala n'ebibuga byo bye mwakola.

⁴⁹ Bona eno, ekibi Sodoma kye yakola ghalala n'ebibuga bye, kyali kwekuluntaza olw'okuba n'emere enhingi, era nga buli kintu kibajiira bukalamu mu miraala, aye ni baloba okuyamba abaavu n'abali mu bwetaavu.

⁵⁰ Beetwalanga nga ba ghaigulu era baakolanga ebyenhinhalwa nga mbona. Kyenava ni mbazikiriza nga mboine ebyo.

⁵¹ “Ni muganda wo Samaria ebibi bye yakola tibyagheza waire ekitundu ekirala kiti ku bibi byo ng'obigabainiamu aghabiri. Bw'otoola ebyenhinhalwa Samaria bye yakola n'obigeza ku bibyo iwe bye wakola, Samaria aboneka ng'oti azira na kibi kye yakola, era ng'oti aziraku na musango.

⁵² Mpegaano oli n'okugumira ensoni dho, kuba olw'okukola ebibi ebyenhinhalwa einho n'okusinga ebya baganda bo, oleeteire baganda bo abo okuba abalungi okukusinga. Kale ni swala era ofe ensoni, kuba niiwe mwene oleeteire baganda bo okuboneka ng'oti balungi.”

Sodoma ni Samaria biriizibwagho

⁵³ Musengwa Katonda akoba ati: “Ndireetera Sodoma aghalala n'ebibuga bye, kabiri ebintu byairamu okubajiiranga obukalamu. Era naaleetera ni Samaria aghalala n'ebibuga bye, boona kabiri ebintu byairamu kubajiiranga obukalamu. N'iwe Yerusalemu weena ndikuleetera kabiri ebintu byairamu okukujiiranga obukalamu.

⁵⁴ Olwo oswale era ofe ensoni olw'ebyo byonabyona bye wakola. Ekyo kireetere baganda bo okuwulira mule nga bali bulungi.

⁵⁵ Baganda bo abo, Sodoma ni Samaria aghalala n'ebibuga byaibwe, baliirayo baaba mu mbeera dhaibwe edh'eira. N'iwe weena aghalala n'ebibuga byo, muliirayo mwaba mu mbeera dhaimwe edh'eira.

⁵⁶ Koodhi tiwayeeyerezanga muganda wo Sodoma bwe wali ng'okeebona ng'oli wa ghaigulu,

⁵⁷ era nga n'ebibi byo bikaali kumanhika? Aye mpegaano weena Abaedomu, n'Abafilisiti, n'abo boonaboona abakukyagha abakwezungulwire, bali kukunhooma.

⁵⁸ Era ogwaniire okugumira ekibonerezo eky'obwenzi bwo, n'eky'ebibi byo ebindi byonabyona ebyenhinhalwa bye wakola.” Musengwa Katonda atyo bw'akobye.

Endagaano ey'ebyanda n'ebyanda

⁵⁹ Musengwa Katonda era akoba ati: “Bwenebwene ndikubisa nga bw'ogwaniire, olw'okunhoomoola kye weeyama n'omenha endagaano.

⁶⁰ Aye nze ndikuuma endagaano ye nakola n'iwe ng'okaali muto, era ndikola niiwe endagaano ey'ebyanda n'ebyanda.

⁶¹ Baganda bo bombi, mukulu wo ni muto wo, bwe baliira y'oli ensoni dhiri kugema olw'ebyo bye wakola. Ndibakwiriza baaba ng'oti bwa baghala bo, waire ng'ekyo tikiri mu ndagaano yange n'iwe.

⁶² Ndiizaagho endagaano yange n'iwe.

⁶³ Era ndikusonigha ebyo byonabyona bye wakola, aye waabiidhukiranga ensoni dhaakugema, nga tosobola kwogera kintu kyonakyona olw'okuswala.” Musengwa Katonda atyo bw'akobye.