Ezekieli 15 - Baibuli Ekibono kya Katonda 2014

Olufumo olugema ku muzabbibu

¹ Agho Musengwa Katonda yaayogera ninze ng'akoba ati:

² “Iwe omuntu, omuzabbibu oli ni bw'ogugeza ku muti, oba ku lusaga lwonalwona olw'oku muti ogw'omu kibira?

³ Omuzabbibu basobola okugusalamu embaawo baadhibaadhamu ekintu kyonakyona? Oba basobola okugutoolaku waire enkondo obukondo baaghanikaku ekintu kyonakyona?

⁴ Omuti ogwo bagukumisa bwa muliro. Aye omuliro bwe gumala okugwokya eruuyi n'eruuyi, ni ghagati ni guya, basobola kabiri okugukozesa ekintu kyonakyona?

⁵ Bona eno, oba bwe gwali nga gukaali omulamba tigwali na mugaso, memale obwo omuliro nga gumaze okugwokya eruuyi n'eruuyi, ni ghagati nga gumaze okuya, bwe gunaaba n'omugaso?”

⁶ Musengwa Katonda kyava n'akoba ati: “Nga bwe mpaayo omuzabbibu ni bagutoola mu miti egy'omu kibira okuja okugukumisa omuliro, era ntyo bwe ndighaayo abatyamye ab'omu Yerusalemu ni mbabonereza.

⁷ Ndibeefuulira naababonereza ni bwe balirumuka batya okuwona omuliro, era gulibookya. Kale ni bwendyefuulira abantu abo ni mbabonereza, mulimanha nga ninze Musengwa Katonda.

⁸ Ndizikiriza ensi eyo yaafuuka bifulukwa byereere, kuba abantu baamu tibaali beesigwa ye ndi. Nze Musengwa Katonda ninze nkobye.”