Ezekieli 14 - Baibuli Ekibono kya Katonda 2014

Okuvumirira okusinza ebitali Katonda

¹ Agho abandi ku bakulembeze ab'omu Isiraeli baidha okuneebuuzaaku, baatyama agho mu maiso gange.

² Musengwa Katonda yankoba ati:

³ “Iwe omuntu, abantu abo baghaireyo emyoyo gyaibwe okusinza ebitali nze Katonda, era ebyo bye bajiiraku byabaleetera okukola ebibi. Kale nsobola ntya okubaganha baneebuuzeeku?

⁴ “Agho ni yogera nabo, obakobe oti nze Musengwa Katonda nkoba nti: Omuntu yeenayeena ow'omu ighanga Isiraeli aghaayo omwoyo gwe okusinza ebitali nze Katonda, era n'abijiiraku ni bimuleetera okukola ebibi, memale kabiri n'aidha okwebuuza ku mulanzi, nze Musengwa Katonda mwene, ninze ndimwiramu mu nsambo egwaniire obungi obw'ebisinzibwa ebitali Katonda omuntu oyo by'ajiiraku.

⁵ Olwo nsobole okwiza ye ndi ab'omu ighanga Isiraeli boonaboona, ebisinzibwa ebyo ebitali Katonda be byaleetera okunvaaku.

⁶ “Kale ni kobera ab'eighanga Isiraeli oti nze Musengwa Katonda ndi kubakoba nti: Mwenenie, mukyuke muve mu kusinza ebitali nze Katonda. Mukyuke muve ku ebyo byonabyona ebyenhinhalwa bye mujiiraku.

⁷ “Omuntu yeenayeena ow'omu ighanga Isiraeli, oba omusenze yeenayeena eyasenga mu Isiraeli, bw'anvaaku n'aghaayo omwoyo gwe okusinza ebitali nze Katonda, era n'abijiiraku ni bimuleetera okukola ebibi, memale kabiri n'aidha okwebuuza ku mulanzi, nze Musengwa Katonda mwene, ninze ndimwiramu.

⁸ Ndimwefuulira naamukyagha, naamufuula akamanhiso ak'okulabulanga abandi era eky'okuyeeyereza. Era ndimuboola naalekera agho okumubalira mu bantu bange, memale olwo mwamanha nga ninze Musengwa Katonda.

⁹ “Omulanzi bw'alimbibwa n'abaaku ni by'ayogera eby'obulimba, nze Musengwa Katonda mwene ninze mba mmulimbye, era ndigolola omukono gwange naamubonereza naamutoolayo mu bantu bange Abaisiraeli.

¹⁰ Omulanzi, n'oyo amwebuuzaaku, bombi balibonerezebwa. Era ekibonerezo eky'omulanzi kiriba n'ekirala n'eky'oyo amwebuuzaaku.

¹¹ Olwo ab'omu ighanga Isiraeli balobe kabiri kunvaaku ni badaaliima, era ni beeyonoona nga bakola ebibi, aye babenga bantu bange, ate nze mbenga Katonda waibwe. Nze Musengwa Katonda ninze nkobye.”

Noa, Danieli, ni Yobu

¹² Musengwa Katonda era yankoba ati:

¹³ “Iwe omuntu, ensi bw'ekola ebibi n'ensungughaza ng'ezira bwesige ye ndi, ndigolola omukono gwange naagibonereza, naazikiriza emere yaayo, naagisindikira endhala era naita abantu baayo n'ensolo.

¹⁴ Abantu bano abasatu: Noa, Danieli ni Yobu, ni bwe bandigibairemu, bandiwoniizaagho bwa bulamu bwaibwe bwonka olw'obutuufu bwaibwe.” Musengwa Katonda atyo bw'akoba.

¹⁵ “Bwe nsindika ensolo edh'omu nsiko mu nsi, ni dhigyonoona nga dhija dhiita abantu, ensi eyo n'efuuka ebifulukwa era n'ewolongera nga ghazira na muntu agibitamu olw'okutya ensolo edho,

¹⁶ abantu abo abasatu ni bwe bandigibairemu, nze Musengwa Katonda ndayira nti nga bwendi omulamu, tibandiwoniizaagho waire abaana baibwe. Beene bonka bati n'abandiwonezeibwa, aye ensi eyo yaasigala bifulukwa byereere.

¹⁷ “Oba bwe ndeetera olutalo okwidha mu nsi, ni ndulagira okwita abantu n'ensolo okumaliriragho,

¹⁸ abantu abo abasatu ni bwe bandigibairemu, nze Musengwa Katonda ndayira nti nga bwendi omulamu, tibandiwoniizaagho waire abaana baibwe. Beene bonka bati n'abandiwonezeibwa.

¹⁹ “Oba bwe nsindika endwaire ya kawumpuli mu nsi eyo, ni ngimaliraku obusungu bwange okwita abantu n'ensolo okumaliriragho,

²⁰ Noa ni Danieli ni Yobu ni bwe bandigibairemu, nze Musengwa Katonda ndayira nti nga bwendi omulamu, tibandiwoniizaagho waire abaana baibwe. Bandiwoniizaagho bwa bulamu bwaibwe bwonka olw'obutuufu bwaibwe.”

²¹ Agho ni Musengwa Katonda akoba ati: “Bwenebwene tikirisingagho inho bwe ndisindika ku Yerusalemu ebibonerezo byange ebina ebikakali: olutalo, endhala, ensolo edh'akabi, n'endwaire ya kawumpuli, okuja okukiitamu abantu n'ensolo?

²² Aye ghalibaagho abaliwonagho ni basigalagho n'abaana baibwe. Abo bwe balireetebwa ye muli ni mubona emize gyaibwe n'ebibi bye bakola, mulikakasa ng'ekibuga Yerusalemu kigwaniire okukibonereza mu nsambo eyo.

²³ Olwo mulimanha nga nali mutuufu okukola ebyo bye nakola mu Yerusalemu.” Musengwa Katonda atyo bw'akoba.