Ezekieli 12 - Baibuli Ekibono kya Katonda 2014

Omulanzi aba ng'oti n'omuntu anoonia obubudamo

¹ Musengwa Katonda yaayogera ninze, yankoba ati:

² “Iwe omuntu, oli mu bantu abadheemu, abali n'amaiso aye nga tibabona era abali n'amatu aye nga tibawulira, olw'okuba badheemu.

³ “Kale ni, iwe omuntu, siba omugugu obe ng'oti n'omuntu ali kulumuka okuja okunoonia obubudamo, ositule oje musana mukulu ng'abantu bakubona. Ove mu kifo kyo, oje osenge mu kindi nga bakubona. Oba katyo banaategeeramuuku, waire nga badheemu.

⁴ Oidha kubbeeda omugugu gwo ogwo musana mukulu ng'abantu bakubona, obe ng'oti n'omuntu ali kulumuka okuja okunoonia obubudamo. Ositule oveegho eigulo ng'abantu bakubona, obe ng'oti n'abantu be bakaka okuja mu bunhage bwe baba.

⁵ Oidha kuwomola ekituli mu kimante ky'endhu yo, obikize omwo ebintu byo ng'abantu bakubona.

⁶ Olwo obibbeedere ku ibega, ofulume mu nzikiiza nga bakubona, oje nga weeghembye mu maiso nga tobona y'oja. Ebyo byonabyona biidha kuba kamanhiso ak'okulabula Abaisiraeli.”

⁷ Kale nze Ezekieli naakola nga Musengwa Katonda bwe yandagira. Naafulumya ebintu byange era naasiba omugugu gwange ng'oti n'omuntu aja mu bunhage. Eigulo nze mwene naawomola mu kimante ekituli, mwe nabitira ng'enzikiiza eri kugema. Era naabbeedera ebintu byange ku ibega ng'abantu babona, naaja.

⁸ Bwe bwakya enkyo, Musengwa Katonda yaayogera ninze, yankoba ati:

⁹ “Iwe omuntu, Abaisiraeli abadheemu abo tibaakubuuziizaaku bati, ‘Oli kukola ki?’

¹⁰ Bakobe oti nze Musengwa Katonda ndi kubakoba nti obukwenda buno bugema ku mufuzi ali mu Yerusalemu, ni ku Baisiraeli boonaboona abali mu kibuga ekyo.

¹¹ Bakobe oti ekyo ky'okoze n'akamanhiso k'ebyo ebija okubatuukaku. Balibabinga ewaibwe, baaja mu bunhage.

¹² N'omufuzi ali mu bantu abo yeena alibbeeda omugugu gwe ku ibega ng'enzikiiza egemye, yaafuluma. Alibitira mu kituli kye baliwomola mu kimante, yaaja nga yeeghembye mu maiso nga tabona y'aja.

¹³ Ndimutega naamugemya mu lutuula lwange, naamutwala mu kibuga Babiloni mu nsi ey'Abakaladea, yaafiira eyo aye nga ekibuga ekyo takiboineeku naire.

¹⁴ Abantu be boonaboona abamwezungulwire ndibasansaaniza eyo ku ndhuyi dhoonadhoona edh'ensi nga n'omuli abayambi be, n'abaisirukale be. Era ndireetera entalo okubaagho, dhaabaita.

¹⁵ “Bwe ndibasansaaniza eyo mu maghanga ni mbaidhuza eyo mu nsi enhingi, balimanha nga ninze Musengwa Katonda.

¹⁶ Aye ndirekaghooku abatono baawona okwitibwa mu ntalo, n'okulambuka endhala, n'okufa endwaire ya kawumpuli. Olwo basobole okutegeera, eyo ye baliba mu maghanga, nga baakola ebyenhinhalwa. Era olwo bamanhe nga ninze Musengwa Katonda.”

Omulanzi atengera ng'akamanhiso

¹⁷ Kabiri Musengwa Katonda yankoba ati:

¹⁸ “Iwe omuntu, kola olye emere yo ng'oli kutengera, era onhwe amaadhi ng'oli kudhugumira olw'okutya.

¹⁹ Kobera abantu boonaboona ab'omu nsi yo oti Musengwa Katonda akoba ati: Abaisiraeli abakaali mu Yerusalemu baliryanga emere nga bali mu kutya, era baanhwanga amaadhi nga beeraliikirivu kuba ensi yaibwe eritoolebwamu byonabyona ebigirimu, olw'okuba nti abantu abagirimu bakola ebikolwa eby'obukambwe.

²⁰ Ebibuga byonabyona buti ebirimu abantu birizikirizibwa, ensi eyo yaasigala agho bifulukwa byereere. Olwo balimanha nga ninze Musengwa Katonda.”

Ensambo eyakozesebwanga einho Abaisiraeli, n'obukwenda bwa Musengwa Katonda obutaabasanhusa

²¹ Agho Musengwa Katonda yaayogera ninze, yankoba ati:

²² “Iwe omuntu, lwaki mu nsi yaimwe Isiraeli mukoba mu nsambo muti, ‘Ebiseera bija nga bibita, aye nga ebyalangibwa mu kubonekerwa ghazira kituukirira.’

²³ Kale ni bakobere oti nze Musengwa Katonda ndireetera ensambo eyo okukoma. Tibaliirayo kugikozesa mu Isiraeli kabiri. Era bakobe oti ekiseera kituuse ebyalangibwa mu kwolekebwa byonabyona bituukirizibwe.

²⁴ “Mu Isiraeli timulibaamu kabiri kubonekerwa kwa buguya, waire obulanzi obubuzaabuza.

²⁵ Nze Musengwa Katonda mwene, ninze ndidha okwogeranga, era nga kye nkoba kituukirizibwa. Tighaabengagho kulwisa naire. Kye nnaayogeranga mu biseera byaimwe, imwe abadheemu, ndidha kukituukirizanga. Nze Musengwa Katonda ninze nkobye.”

²⁶ Era Musengwa Katonda yankoba ati:

²⁷ “Iwe omuntu bona eno, Abaisiraeli bakoba bati iwe by'obona mu kubonekerwa tibyakutuukirira mu nnaku dhino, era mbu by'olanga bya mu biseera biri mberi inho.

²⁸ Kale ni bakobere oti nze Musengwa Katonda nkoba ati: Tighaabengagho kulwisa naire. Kye nnaayogeranga kiidha kutuukirizibwanga. Nze Musengwa Katonda ninze nkobye.”