Ezekieli 10 - Baibuli Ekibono kya Katonda 2014

Ekitiisa kya Musengwa Katonda kiva mu isinzizo

¹ Agho naja okulinga nti nga mbona ghaigulu agh'emitwe egy'ebitonde ebiramu ebyo, mu ibbanga eryali ghaigulu ku ngulu, nga ghaligho ekiri ng'oti kityamo kya bwakyabazinga, nga kifaanana ng'oti n'eibaale ery'omughendo eryetebwa saffiro.

² Katonda yaakoba omuntu eyali avaire engoye empegheevu ati: “Ja ghagati mu nkede edhiri kwezungulula ghansi agh'ebitonde bikerubi, oyoole amanda agaidhula engalo dho agaliku omuliro, oje ogamansire ku kibuga.” Omuntu oyo yaaja nga ndi kubona.

³ Mu kiseera ekyo, bikerubi byali byemereire ku luuyi olw'omukono omusaadha olw'e buvandhuba olw'eisinzizo. Omuntu oyo bwe yangira mu isinzizo, ekire kyagema woonawoona mu luya olw'omunda.

⁴ Ekitiisa kya Musengwa Katonda kyasituka nga kiva gha bikerubi, kyaja ku mulyango ogw'eisinzizo. Ekire kyagema woonawoona mu isinzizo, oluya lwaidhula obutangaavu obw'ekitiisa kya Musengwa Katonda.

⁵ Omuvuuma ogw'amaghagha ga bikerubi gwawulirwa n'ere mu luya olw'okuliya, nga guli ng'oti n'amamiro ga Katonda Aghanga Ebintu Byonabyona bwe gawulirwa, bw'aba ng'ayogeire.

⁶ Musengwa Katonda bwe yalagira omuntu ole eyali avaire engoye empegheevu okuyoola omuliro ng'agutoola ghagati agh'enkede edhaali dhiri kwezungulula ghansi gha bikerubi, omuntu oyo yaaja yaayemerera munda okumpi n'eyindi ku nkede edho.

⁷ Agho ekindi ku bikerubi, kyagolola omukono nga kiri ghagati gha bikerubi bire ebindi, kyatoola ku muliro ogwali ghagati ghaabyo kyaguta mu ngalo dh'omuntu ole eyali avaire engoye empegheevu. Oyo yaagugema yaafuluma nagwo.

⁸ Buli kikerubi kyaliku ekintu ekiboneka ng'oti mukono gwa muntu, nga kiri ghansi mu maghagha gaakyo.

⁹ Era naja okulinga nti nga mbona enkede ina kumpi agho ni bikerubi, nga buli gha mbali gha kikerubi ghaligho enkede ndala ndala. Enkede edho dhaali nga dhimirimiinha ng'oti ibaale ery'omughendo eryetebwa kurisolito.

¹⁰ Enkede dhoonadhoona eina dhaali dhifaanagana, ate buli nkede ng'eboneka ng'oti erimu enkede eyindi ghagati ghaayo obukiika.

¹¹ Kale nga bikerubi bisobola okuja ku ndhuyi eina edh'enkede edho aghazira kubyetaagisa kukyuka. Enkede edho dhoonadhoona dhaajiiranga ghalala buli ye dhaajanga nga tikidheetaagisa kumala kukyuka.

¹² bikerubi byali biidhwire amaiso ku mibiri gyabyo gyonagyona, ni ku mikono gyabyo, ni ku maghagha gaabyo, ni ku nkede dhaabyo, ni ku mpagi edh'omu nkede edho.

¹³ Nawulira ng'enkede edho bali kudheeta “Enkede edheezungulula.”

¹⁴ Buli kikerubi kyali n'obweni bwa mikuzi ena. Obweni obwasooka bwali ng'oti bwa nte nume, obwokubiri bwaba ng'oti bwa muntu, obwokusatu bwaba ng'oti bwa mpologoma, ate obwokuna bwaba ng'oti bwa nkookooma.

¹⁵ Agho bikerubi ebyo byaguluka byaja. Bikerubi ebyo, byali nga n'ebitonde ebiramu ebina (4) bye nabona mu kubonekerwa nga ndi kumpi n'omwiga Kebari.

¹⁶ Bikerubi ebyo bwe byagulukanga ni bija, nga n'enkede dhoona dhijiira ghalala nabyo. Bwe byayandhuluzanga amaghagha gaabyo ni biva ku itaka, nga n'enkede dhoona dhija nabyo.

¹⁷ Bwe byalekeranga okuguluka ni byemerera, nga n'enkede dhoona dheemerera. Ate bwe byagulukanga ni bija, nga n'enkede edho dhoona dhijiira ghalala nabyo, kuba omwoyo gwabyo gwali mu nkede edho.

¹⁸ Agho ekitiisa kya Musengwa Katonda kyava gha mulyango gw'eisinzizo, kyaja kyaba ghaigulu gha bikerubi.

¹⁹ Bikerubi byayandhuluza amaghagha gaabyo byava ku itaka nga ndi kubona, byaja nga n'enkede dhoona dhiri kujiira ghalala nabyo. Byayemerera ku lwigi olw'omulyango ogw'e buvandhuba ogw'eisinzizo, era okumesunkana okw'ekitiisa kya Katonda wa Isiraeli kwaba ghaigulu ghaabyo.

²⁰ Ebyo n'ebyali ebitonde ebiramu bye nabona ghansi gha Katonda wa Isiraeli gha mwiga Kebari era naamanha nga byali bikerubi.

²¹ Buli kikerubi kyali n'obweni bwa mikuzi ena, kyabaaku n'amaghagha ana, era kyabaaku n'ekintu ekiboneka ng'oti mukono gwa muntu, nga kiri ghansi mu maghagha gaakyo.

²² Emboneka yaabyo mu maiso, yali nga n'eyo yeeneyeene ye nabona okumpi n'omwiga Kebari. Buli kirala kyasobolanga okuja ku ndhuyi dhoonadhoona aghazira kukyetaagisa kumala kukyuka.