Ezekieli 1 - Baibuli Ekibono kya Katonda 2014

Ezekieli abonekerwa omukuzi ogusooka 1:1—7:27 Ekityamo kya Katonda

¹ Ku lunaku olwokutaanu mu mwezi ogwokuna, mu mwaka ogwamakumi asatu (30), nze Ezekieli kabona mutabane wa Buzi, mu biseera ebyo nali mba ghalala ni banhage banange agho kumpi n'omwiga ogwetebwa Kebari mu Babilonia. Agho eigulu lyaghembuka era naabonekerwa Katonda.

² Ogwo gwali nga n'omwaka ogwokutaanu kasookanga kyabazinga Yehoiakini atwalibwa mu bunhage.

³ Nga tuli eyo e Babilonia okumpi n'omwiga Kebari, Musengwa Katonda yayogera ninze era naawulira mule ng'amaani ge gandidhieku.

⁴ Bwe nali nga nkaalingiriire, naabona empewo ey'amaani ng'ekunta okuva ku luuyi olw'omukono omugooda olw'e buvandhuba. Naabona n'ekire ekikologho nga kyezungulwirwa okumyansa, era nga kirimu n'omuliro oguli kwaka obutalekera. Ghagati mu muliro ogwo nga ghali kumirimiinha ng'oti kyuma kya kikomo ekizigule.

⁵ Era ghagati agho nga ghaligho ebintu bina, ebyaboneka ng'oti n'ebitonde ebiramu. Byali biboneka ng'oti bantu,

⁶ aye nga buli kirala kiri n'obweni bwa mikuzi ena era kyaba n'amaghagha ana.

⁷ Amagulu gaabyo gaali matereevu agaziramu ngode naire, n'ebibbonge byabyo byaba ng'oti binuulo bya nte nto. Byali biri kumesunkana ng'oti n'ekyuma eky'ekikomo ekizigule.

⁸ Ebitonde ebiramu ebyo ebina (4) ebyaliku obweni obw'emikuzi ena ni bibaaku n'amaghagha ana, era byaliku n'emikono ena egiri ng'oti gya bantu, nga giri ghansi w'amaghagha gaabyo, ku ndhuyi dhaabyo eina.

⁹ Buli kirala kyali kyandhulwiza amaghagha gaakyo, kyaba nti buli nkomerero ey'eighagha lyakyo egema ku nkomerero edh'amaghagha ga biinaakyo ebikiri eruuyi n'eruuyi. Kale nga buli ye bija, bijiira ghalala nga bigemagaine aghazira kukyuka naire.

¹⁰ Buli kirala ku bitonde ebiramu ebyo ebina (4) kyaliku obweni nga bwa mikuzi ena: kyaliku obwali ng'oti bwa muntu nga buli emberi waakyo, kyabaaku obwali ng'oti bwa mpologoma ku luuyi lwakyo olw'omukono omusaadha, kyabaaku obwali ng'oti bwa nte nume ku luuyi lwakyo olw'omukono omugooda, era kyabaaku obwali ng'oti bwa nkookooma y'enkoone yaakyo.

¹¹ Bityo bwe byali nga biboneka mu maiso. Era buli kirala kyali kyandhulwiza amaghagha gaakyo, abiri nga gagemye ku nkomerero edh'amaghagha ga biinaakyo ebikiri eruuyi n'eruuyi, ate abiri agandi nga kigaghembye ku mubiri gwakyo.

¹² Olw'okuba nti buli kirala kyali n'obweni obulingiriire ku ndhuyi eina, kyasobolanga okuja buli ghantu omwoyo ye gwayendanga kije, aghazira kukyetaagisa kukyuka.

¹³ Ghagati agh'ebitonde ebiramu ebyo ghaaligho ebintu ebyaboneka ng'oti manda agaliku omuliro, oba ng'oti bisiki ebiri kwaka. Ebintu ebyo byali nga biri kutambula bwe biira eno n'ere ghagati mu bitonde ebiramu ebyo. Era omuliro ogwo nga guli kumalanga gwayaka inho, gwavaamu okumyansa ng'oti kwa lukuba.

¹⁴ N'ebitonde ebiramu ebyo byona byali biri kumansuka embiro ng'oti kughemya kwa lukuba, nga biira eno n'ere.

¹⁵ Bwe nali nkaalingiriire ebitonde ebiramu ebyo ebina (4), naabona enkede ina nga dhiri ku itaka, nga buli gha mbali gha kitonde ghaligho enkede ndala ndala.

¹⁶ Enkede edho eina dhoonadhoona dhaakolebwa nga dhifaanana era nga dhimirimiinha ng'oti ibaale ery'omughendo eryetebwa kurisolito. Buli nkede yali eboneka ng'oti erimu enkede eyindi ghagati ghaayo obukiika.

¹⁷ Kale enkede edho nga dhisobola okuja ku ndhuyi eina aghazira kudheetaagisa kukyuka.

¹⁸ Enkede edho dhaaliku empanka n'empagi, era nga dhiriku amaiso dhoonadhoona okudheezunguluza.

¹⁹ Ebitonde ebiramu ebyo buli ghe byajanga, nga n'enkede edho dhoona dhijiira ghalala nabyo. Era bwe byasitukanga mu ibbanga, nga n'enkede edho dhoona dhisitukira ghalala nabyo.

²⁰ Ebitonde ebiramu ebyo byajanga yoonayoona ye byayendanga, era nga n'enkede edho dhoona dhijiira ghalala nabyo, kuba omwoyo gwabyo gwali mu nkede edho.

²¹ Kale ebitonde ebiramu ebyo bwe byabanga ni ye bija, oba ni byemerera, oba ni bisituka mu ibbanga, nga n'enkede edho dhoona dhikola dhityo kuba omwoyo gwabyo gwali mu nkede edho.

²² Ghaigulu gh'emitwe egy'ebitonde ebiramu ebyo ghaaligho ekintu ekyaboneka ng'oti ni ku igulu era nga kimesunkana ng'oti n'eibaale ery'omughendo eryetebwa kurisitalo.

²³ Ghansi agho agh'ekintu ekyaboneka ng'oti ni ku igulu, n'aghaali ebitonde ebiramu ebyo nga buli kirala kyandhulwiza amaghagha gaakyo abiri, buli ighagha lyatuuka ku ly'ekitonde ekiramu ekindi ekikiriiraine. Era buli kitonde nga kiri n'amaghagha agandi abiri ge kyakozesa okweghemba ku mubiri gwakyo.

²⁴ Bwe byaguluka ni bija, naawulira omuvuuma ogw'amaghagha gaabyo nga guli ng'oti mpiriito ya maadhi, kabiri ng'oti n'okutyabuka okw'amamiro ag'oyo Aghanga Ebintu Byonabyona, era ng'oti n'okuwowoigana okw'eigye. Ate bwe byalekera okuguluka, byaisa amaghagha gaabyo.

²⁵ Bwe byalekera okuguluka ni biisa amaghagha gaabyo, ghaabaagho amamiro agaawulikika nga gali kuva ghaigulu gh'ekintu ekyaboneka ng'oti ni ku igulu ekyali gha mitwe gyabyo.

²⁶ Ghaigulu agh'emitwe egy'ebitonde ebiramu ebyo, mu ibbanga eryali ghaigulu ku ngulu, ghaaligho ekyaboneka ng'oti kityamo kya bwakyabazinga, nga kifaanana ng'oti n'eibaale ery'omughendo eryetebwa saffiro. Ku kityamo ekyo ekyaboneka ng'oti kya bwakyabazinga kwali kutyaimeku eyaboneka ng'oti muntu.

²⁷ Okuva aghaaboneka ng'oti n'enkende ye okuja ghaigulu, yali amesunkana ng'oti n'ekyuma eky'ekikomo ekizigule era ng'ali ng'oti omuliro gumwezungulwire yeenayeena. Ate okuva aghaaboneka ng'oti n'enkende ye okwika ghansi, ng'ali ng'oti ali mu muliro era ng'obutangaavu bumwezungulwire yeenayeena,

²⁸ obufaanana ni musoke asala ku igulu ng'amaadhi gali kughemya. Ekyo n'ekifaananie ekyaligho ekyayoleka ekitiisa kya Musengwa Katonda. Bwe nabona ebyo naakuba amakiryaivu era naakutama n'ekyeni kyatuuka ku itaka. Agho naawulira amamiro agakoba gati: