Ensambo 9 - Baibuli Ekibono kya Katonda 2014

Amagezi gafumba embaga

¹ Amagezi gaazimba endhu yaago, gaagikolera n'empango musanvu.

² Gaita ku nsolo dhaago olw'embaga, gaayiisa omwenge gwago ogw'emizabbibu, era gaategeka ekiiwulo.

³ Gaatuma abagheereza baago abaguna, baaja ku bifo ebisinga bugulumivu mu kibuga, baayeta bati:

⁴ “Buli muntu yeenayeena azira ky'aidhi, aidhe mu ndhu muno.” Era amagezi ago gaakoba buli muntu aziramu kategeera, gati:

⁵ “Idha olye ku mere yange ye nfumbye, era onhwe ni ku mwenge gwange ogw'emizabbibu gwe mpiisiisa.

⁶ Va mu bantu abazira kye baidhi obe mulamu, era weebise mu nsambo eyoleka ng'otegeera.”

Okugerangerania omuntu omugezi ku muntu eyeekuluntaza

⁷ Ole bw'alamba omuntu eyeekuluntaza yeereetera mwene ebivumo, ole anenia omukozi ow'ebibi yeerumiriza mwene.

⁸ Otanenianga muntu yeekuluntaza, aja bwa kukukyagha. Aye onenianga muntu mugezi, kuba oyo aja kukusiima.

⁹ Bw'ogalagira omuntu omugezi yeeyogeraku okuba omugezi. Bw'oyegeresa omuntu akola ebituufu yeeyongeraku okwega.

¹⁰ Omuntu okuba n'amagezi asooka na kutya Musengwa Katonda, era omuntu aidhi oyo Omutukuvu, aba n'okutegeera.

¹¹ Nze amagezi ndidha kukughangaaza enaku kamaala, era nhongere emyaka ku bulamu bwo.

¹² Bw'oba n'amagezi ofunamu omuganhulo. Bw'oganhooma ofiirwa.

Omusiru afumba embaga

¹³ Omukazi omusiru ayogera mu mamiro aga ghaigulu, azira ky'aidhi era taba na nsoni.

¹⁴ Atyama ku mulyango ogw'endhu ye, oba yaatyama mu bifo ebigulumivu mu kibuga.

¹⁵ Aba agho ng'ayeta ababitagho, ababa bali kwejiira mu ngendo dhaibwe, ati:

¹⁶ “Buli muntu yeenayeena azira ky'aidhi aidhe mu ndhu muno!” Era yaakoba buli muntu aziramu kategeera, ati:

¹⁷ “Amaadhi amaibe obwibe gawooma inho, n'emere eriirwa mu ngiso n'esinga kuwooma.”

¹⁸ Aye abo b'ayeta tibaidhi ng'abantu abaja mu ndhu y'omukazi oyo bafiirayo, era ng'abageni be bali ghansi ere yeene mu magombe.