Ensambo 8 - Baibuli Ekibono kya Katonda 2014

Amagezi googera n'abantu

¹ Muwulirise amagezi gali kwogera. Okutegeera kuli kulangirira.

² Amagezi geemereire ku bifo ebisitufu ku mbali okw'enguudo, ni mu maagaanana ag'enguudo.

³ Galangirira nga gali mu kifo eky'olwekobaano gha mulyango ogwingira ekibuga, mu kifo abantu ghe beesololeza. Gakoba gati:

⁴ “Ndi kukoba imwe mwenamwena, buli muntu ali ku nsi yeenayeena awulire.

⁵ Imwe abazira kye mwidhi, mwege okumanha ekigwaine okukolebwa; imwe abasiru, mwege okutegeera.

⁶ Mumpulirise kuba bye nja okwogera bikulu, buli kibono ekinva mu kanwa kituufu.

⁷ Nze ndhogera mazima meereere; neenhinhata eby'obuguya byonabyona.

⁸ Ebibono byonabyona ebinva mu kanwa bituufu, muzira kya buguya waire ekibuzaabuza.

⁹ Byanguyira ole ategeera era byaba bituufu eri ole ali n'okumanha.

¹⁰ Mwendenga bye ndhegeresa mu kifo ky'okwenda feeza, era mugonzenga okumanha mu kifo ky'okugonza zaabu omukenenule.

¹¹ Amagezi ga mughendo inho okuwula amabaale ag'omughendo, era mu bintu byonabyona ebyegombebwa ezira kisobola kugeefaanaanirizaaku.”

Amagezi googera

¹² “Ninze Magezi, mba ghalala ni Kutegeera, era nkozesa okumanha naasalagho ekigwaine okukolebwa.

¹³ Okutya Musengwa Katonda kitegeeza kukyagha kukola bibi. Nze nkyagha okwekuluntaza n'okwetwala ng'owa ghaigulu n'okukola ebibi, era n'okwogera eby'obuguya.

¹⁴ Ninze agha abantu amagezi ni bakola ebikalamu. Ntegeera era ndi n'amaani.

¹⁵ Ninze agha bakyabazinga okufuga, era naagha abafuzi okutaagho amateeka amakalamu.

¹⁶ Ninze agha buli mufuzi okufuga, k'abe mukungu oba mulamuzi.

¹⁷ Ngonza abo abangonza, abo abandhagala n'omwoyo omulala bambona.

¹⁸ Ninze ngaba obukombe n'ekitiisa, obukombe obutuufu era obutawaagho.

¹⁹ Bye ngaba biwula zaabu, ni bw'aba omulungi einho, era byawula ni feeza omukenenule.

²⁰ Ntambulira mu butuufu, naakola ebyo ebituufu.

²¹ Mpa abo abangonza obukombe, naidhuza endhu dhaibwe ebintu eby'omughendo.”

Okwinhama okw'amagezi

²² “Ninze Musengwa Katonda ye yasookeraku okutonda, ninze ekintu kye yasookeraku okukola eira einho.

²³ Nateebwagho mu biseera ebyabita, naligho mu kusooka ng'ensi ekaali kubaagho.

²⁴ Nazaalibwa ng'enhandha dhikaali kubaagho, era nga n'enhindo edh'ensulo edhikuuluula dhoona dhikaali kubaagho.

²⁵ Nazaalibwa ng'ensozi enene dhikaali kuwumbibwa, waire obusozi obutono okuteebwagho.

²⁶ Katonda yali akaali kukola nsi na misiri gyaku, waire omuganda ogusooka ogw'enkungu.

²⁷ Bwe yali ng'abamba eigulu naligho, era naabaagho ng'akola ensalosalo enhandha kw'ekoma.

²⁸ Ni lwe yata ebire ku igulu, n'ata n'enhindo edh'ensulo mu nhandha naligho.

²⁹ Nali naye lwe yataagho ensalosalo enhandha kw'enaakomanga, amaadhi galobe kuswikangagho. Era nali naye lwe yataagho emisingi egy'ensi.

³⁰ Nabanga gh'ali ng'omwana omuto, nga buli lunaku mmusanhusa, era zeena naasagambanga okuba gh'ali.

³¹ Nga nsagambira mu nsi ye, era nga nsanhuka olw'abantu abagirimu.”

Ba nkabi abakola bye mbakoba

³² “Agho ni, baana bange, mumpulirise. Ba nkabi abo abagema bye nkoba.

³³ Muwulirisenga bye mbagalagira mube bagezi, mutabigayaaliranga.

³⁴ Wa nkabi oyo awulira bye nkoba, buli lunaku n'atatoola maiso ku lwigi lwange, era n'aba agho gha mulyango gwange ng'aguniriire.

³⁵ Abo abandhagala ni banzuula bafuna obulamu, era Musengwa Katonda abasanhukira.

³⁶ Aye oyo akola ebibi yeerumiriza mwene, era oyo ankyagha aba ayenda kufa.”