Ensambo 7 - Baibuli Ekibono kya Katonda 2014

¹ Mwana wange, gemanga bye nkoba era otwalenga ebiragiro byange ng'eky'omughendo einho.

² Bw'onaagemanga bye nkulagira oidha kuba mulamu. Era bye nkwegeresa bikuumenga, ng'oti bw'okuuma emboni ey'eriiso lyo.

³ Banga nabyo ekiseera kyonakyona ng'oti mpeta ku ngalo, era bitenga ku mwoyo gwo ng'oti bighandiike byaku.

⁴ Twalanga amagezi ng'oti bw'otwala mwanhoko, era otwalenga okutegeera ng'oti bw'otwala mukagwa wo einho.

⁵ Ebyo biidha kukuwonianga omukazi omwenzi, oyo muka beene akusendasenda ng'akozesa olulimi olw'okwewooya.

Omukazi omwenzi

⁶ Lwali lulala nga ndi mu ndhu yange, naabisa amaiso mu lutanda oluli mu idinisa,

⁷ naalengera abaisuka abazira kye baidhi, era mu baisuka abo naabonamu omwisuka aziramu kategeera.

⁸ Yali ali kutambulatambula mu nguudo, mu ikoona aghali endhu ey'omukazi, era ng'ali kuja ku ndhu eyo.

⁹ Lyali iguloigulo, agho nga mu kanzimyenzimye, ng'enzikiiza ey'obwire eri kugema.

¹⁰ Naja okubona, nga baagaanana n'omukazi oyo, eyali avaire nga malaaya era ng'ategeike ky'aja okukola.

¹¹ Yayogeranga mu mamiro aga ghaigulu, ng'azira miraala naire. Era buli kiseera nga yeewuuba mu nguudo.

¹² Olundi ng'aba ku luguudo, olundi yaaba mu mpya edh'ekibuga, era kiisi ghali ikoona ng'aba agho yeeteega.

¹³ Agho omukazi yeevumba omwisuka era yaamunhwegera, yaamulingirira mu maiso, yaamukoba ng'akanaghaire ati:

¹⁴ “Olwaleero mpaireyo ekigheebwayo olw'okutabagana, era naasasula kye neeyama. Kale ndi n'emamba kamaala eka.

¹⁵ Kyenviire ni nfuluma nga ndi kwenda inho okukwagaana. Nfubye inho okukunoonia era buti nkwagaine.

¹⁶ Ku buliri bwange ndhazeeku amasuuka, amaghegheevu geene ag'erangi, agava e Misiri.

¹⁷ Era naamansiraku obuwoowo obwakolebwa: mu mirra, ni mu alowe, ni mu kinnamoni.

¹⁸ Idha tuje tusanhusaganie obwire bwonabwona; tube mu kwegonza tuwoomerwe inho.

¹⁹ Eka baze azirayo, yaja mu lugendo oluleeyi.

²⁰ Era yaja n'empiiya kamaala. Kale asuubirwa okwira eyo nga mu mwezi ghagati.”

Omwisuka agwa mu lutuula

²¹ Agho omukazi yaakozesa ebibono ebisendasenda yaikirizisa omwisuka, era yaakozesa olulimi olw'okwewooya, yaamughangula.

²² Amangu ago omwisuka yaatoolera okunonereza omukazi, ng'oti n'ente ye bali kutwala okwita, oba ensolo eri kuja okwingira mu lutuula,

²³ akalaso mwe kagifumitira mu byenda. Omwisuka yali ng'oti n'enhonhi bw'eziinhuuka, ng'eri kuja okugwa ku mutego. Yali taidhi ng'ali kweita mwene.

²⁴ Mperaano ni baana bange, muwulirisenga bye nkoba, era mwetegerezenga inho ebibono byange.

²⁵ Mutaganhanga mukazi oti n'oyo kuwungula myoyo gyaimwe, era mutajiiranga ku mpisa dhe.

²⁶ Abasaadha bangi b'azikiriiza; bwenebwene abantu b'aitaitaine bali lukunkumuli.

²⁷ Bw'oja mu ndhu ye, oba oseese mu magombe, era oba otuuse mu nsi ey'abafu.