Ensambo 6 - Baibuli Ekibono kya Katonda 2014

Okulabulwa obuteeyimirira muntu ng'ali kwewola

¹ Mwana wange, bwe weeyimiriranga omuntu, ni weeyama okumusasuliragho eibandha,

² olwo onaabanga weetaire mwene omugugha mu nkoto olw'ebibono byo, era nga weesibye mwene olw'ebisuubizo byo.

³ Era olwo nga weetaire mwene mu ngalo edh'omuntu owundi. Kale ni okumwewonia tezangaku oje y'ali omweghembe akusaasire.

⁴ Lekanga kusooka kutendukaku waire okutyamaku n'owuumula.

⁵ Omuntu oyo mwewonienga mangu ng'empongo bwe yeewonia mu ngalo edh'omuyiizi, oba ng'enhonhi bwe yeewonia omutego ogw'omutezi.

Okulabula abagayaavu

⁶ Imwe abagayaavu, muje mubone ebisimizi, mwetegereze bye bikola era mwege.

⁷ Bizira mukulembeze waire mwami oba omufuzi,

⁸ aye byeyagalira emere mu biseera eby'omwero, byeterekera eby'okulya mu biseera eby'amakungula.

⁹ Imwe abagayaavu, muja kulambaala kutuuka li? Muja kuzuuka li mu ndoolo dhaimwe?

¹⁰ Eby'okutendukaku akatono n'eby'okulambaalaku akatono, era n'eby'okuzingiraku amakono okuwuumulaku,

¹¹ n'ebireetera obwavu okubalumba ng'oti mukambuzi, n'obwetaavu okubeeyongeraku ng'oti n'abantu omunhazi ali n'ekiisi b'anhazeeku ebyaibwe.

Ebigema ku mukozi ow'ebibi

¹² Omuntu omukozi ow'ebibi era azira mugaso, aja ng'ayogerayogera eby'obuguya,

¹³ yaanhiiranhiira amaiso, yaasiita ebigere ku itaka, oba yaaghemya n'engalo dhe.

¹⁴ Buli kiseera ategeka okukola ebibi mu mwoyo gwe ogwakiidhama eira, era yaasiikuulira baine ebizibu.

¹⁵ Kyova aligwa ku buzibu obutaloodheka nga tabwetegekeire, era mu kaseera buseera balimutentena nga takairayo kuwona.

Ebintu Musengwa Katonda by'atayenderaku irala naire

¹⁶ Ghaligho ebintu mukaaga Musengwa Katonda by'akyagha, nkani biri musanvu bye yeenhinhata:

¹⁷ okwebona ng'owa ghaigulu, okuba omuguya, okutemula abantu abaziraku musango,

¹⁸ okuba n'omwoyo ogutegeka enkwe, okuba n'ebigere ebyanguyiriza okukola ebibi,

¹⁹ okugha obudhulizi obw'obuguya, n'okusiikuulira abantu abali aghalala ebizibu.

Okulabula ku bwenzi

²⁰ Mwana wange, gemanga ebyo lata wo by'akulagira, era otavanga ku ebyo inhoko by'akwegeresa.

²¹ Bitenga ku mwoyo gwo buliidho, era obivaalenga ng'oti kinhere kya mu nkoto.

²² Biidha kukukulemberangamu buli gh'onaajanga, bikukuumenga ng'otendwike obwire, era bikughenga amagezi ng'ozuuse ku nkyo.

²³ Kuba ebyo bye bakulagira biri ng'oti itaala eryaka mu nzikiiza, n'ebyo bye bakwegeresa byaba ng'oti butangaavu, ate ebyo bye bakuneniamu byakutuusa ku bulamu.

²⁴ Bikuwonia omukazi omukozi ow'ebibi, muka beene oyo, akusendasenda ng'akozesa olulimi olw'okwewooya.

²⁵ Otamwegwanizanga mu mwoyo gwo olw'obulungi obw'emboneka ye, era otatwalirizibwanga lwa mmoga ye.

²⁶ Kuba ole asobola okukozesa malaaya ng'amughaire bwa mpiiya dhigula kya kulya, aye ole akwana muka beene aghaayo bulamu bwe bwene.

²⁷ Omuntu asobola okubbeedera omuliro mu kifuba, gwaloba kumwokya?

²⁸ Oba, omuntu aghanga okutambulira ku manda agaliku omuliro, ebigere bye byaloba kuya?

²⁹ Kityo bwekiri, ni ku ole ayenda ku muka beene; oyo akikola yeenayeena aja kubonerezebwa.

³⁰ Abantu tibanhooma mwibi, aiba olw'okwewonia endhala?

³¹ Era bwe bamugema bamuliyisa emikuzi musanvu, yaaghaayo ebintu ebiri mu ndhu ye byonabyona.

³² Omuntu ayenda ku muka beene tabaamu kategeera. Aba ali bwa kwezikiriza mwene.

³³ Balimunhooma, baamukuba, yaanuubukanuubuka, era okuswala kwe tikuja kumuvaaku naire.

³⁴ Eiruba lifuula omusaadha okuba omukambwe einho, era bw'aba yeesasuuza tabaamu kusaasira naire.

³⁵ Ezira mutango gw'aliganha kutwala, era talinhiigulukuka ni bw'omugha ebirabo eby'okulala okulala.