Ensambo 5 - Baibuli Ekibono kya Katonda 2014

Okulabula ku bwenzi

¹ Mwana wange wulirisanga inho amagezi ge nkugha, era oisengayo inho omwoyo ku bye nkwegeresa,

² olwo oidha kusalangagho ekigwaine okukolebwa, n'omunwa gwo gwogerenga eby'amagezi.

³ Omunwa ogw'omukazi omwenzi gwogera ebibono ebidhuudhuula ng'oti mudheenene oguli kutoonha obutoonhe okuva mu bisasala, era akozesa amamiro amaghegheevu agali ng'oti n'omuzigo ogw'emiti emyoliva.

⁴ Aye ku nkomerero akaayirira ng'oti lubiriizi, era yaaba mwogi ng'oti mpiima yeene eri n'obwogi ku ndhuyi dhaayo dhombi.

⁵ Bw'oja naye akutuusa bwa ku kufa; engira ye eigukira bwa mu magombe.

⁶ Omukazi oyo tagema ngira ya bulamu naire, aye atambulatambula eyo atyo ate nga takiidhi.

⁷ Buti ni, mwana wange, wulirisanga bye nkoba, era oteerabiranga bibono bye ndhogera.

⁸ Weesambirenga irala omukazi ng'oti n'oyo, era otaseetanga kumpi na mulyango gwa ndhu ye naire.

⁹ Kuba bw'otaamwesambirenga irala, abantu abandi baidha kutwala ekitiibwa ky'obairenga nakyo, era oitibwe abantu abakambwe ng'okaali mwisuka.

¹⁰ Era abagwira balitwala ebintu bye wakolerera; abantu ab'endha baidhuza endhu dhaibwe ebintu byo bye wafuna mu kutakabana.

¹¹ Ku nkomerero ey'obulamu bwo oliririra ku ndiri ng'omubiri gwo gwonagwona guli kuseenena guwaagho.

¹² Olirira ng'okoba oti: “Kale lwaki nalobanga okugalagirwa? Era lwaki nanhoomereranga okunenezebwa?

¹³ Nalobanga okuwulirisa abasomesa bange bye bankobanga, era naaloba kwisanga mwoyo ku bye bangalagiranga.

¹⁴ Nali ntuuse okuswazibwa mu bantu abeesoloiza.”

Banga mwesigwa ye mukazi wo

¹⁵ Mwana wange, mukazi wo ali ng'oti n'ensulo ey'amaadhi amalungi. Kale ni banga mwesiga ng'onhwa amaadhi ag'omu nsulo yo yonka.

¹⁶ Iwe okibona nga kikalamu amaadhi agava mu nsulo yo okukuuluulira eyo gatyo, ni gaba ng'oti mukoka mu nguudo edh'omu bibuga?

¹⁷ Leka amaadhi ag'omu nsulo yo gabe gago iwe wenka, se ti ga bantu bandi.

¹⁸ Banga musangaavu olw'ensulo yo eyo, osagambenga olwa mukazi wo oyo ye wafuna ng'okaali mwisuka.

¹⁹ Aboneka bulungi ng'oti mpongo, era anhirira ng'oti mpuuli. Leka akusanhusenga enaku dhoonadhoona, era akugonzenga mu bwidhuvu.

²⁰ Mwana wange, lwaki owaamu olw'omukazi omwenzi? Lwaki ota muka beene mu kifuba kyo?

²¹ Musengwa Katonda abona buli muntu ky'akola, era yeekalirisa ensambo ye yeebisaamu.

²² Ebibi eby'omubi bimufuukira ng'oti lutuula, era bimugema ng'oti n'omutego bwe gugema enhonhi.

²³ Obuteefuga bumuleetera okufa, era obusiru bwe obungi bwamuleetera okuja e magombe.