Ensambo 4 - Baibuli Ekibono kya Katonda 2014

Okulamba okw'omuzaire

¹ Baana bange, muwulirisenga inho nze omuzaire waimwe bye mbagalagira, era mwetegerezenga inho mughange okuba n'okutegeera.

² Bye ndi kubeegeresa birungi byene, kale mutabivangaku naire.

³ Bwe nali nkaali n'abazaire bange nga ndi muto mwene era nga ninze omwana waibwe omulala ati,

⁴ omuzaire wange yandhegeresanga ati: “Idhukiranga bye nkukoba, era otabyerabiranga. Bw'onaagemanga bye nkulagira oidha kubanga mulamu.

⁵ Otabyerabiranga waire okubivaaku. Funanga amagezi n'okutegeera.

⁶ Otavanga ku magezi, gaidha kukukuumanga; yendanga amagezi ago gaidha kukuwonianga mu bizibu.

⁷ Amagezi n'ekintu ekiwula obukulu. Kale ni funanga amagezi. Era mu byonabyona by'onaafunanga, twalanga amagezi nga n'ekintu ekikulu.

⁸ Twalanga amagezi ng'eky'omughendo, goona gaidha kukufuulanga mukologho; gatenga mu kifuba kyo, goona gaidha kukugheesanga ekitiisa.

⁹ Galikusiba ekitambaala ekidholige ku mutwe gwo, era gaakuvaaza engule eboneka obulungi einho.”

¹⁰ Mwana wange, gemanga bye nkoba era obitwalenga ng'ekikulu, olwo oidha kughangaala emyaka kamaala.

¹¹ Nakwegeresa eby'amagezi; era naakwoleka empisa enungi.

¹² Ezira kiidha kukwekiikanga mberi ng'oli kutambula; era toidha kwekontolanga ng'oli kulumuka.

¹³ Kuumanga by'oyeze, otabivangaku; bigemenga bukalamu, kuba obwo n'obulamu bwo.

¹⁴ Otajiiranga ku bakozi ba bibi, era otakolanga bye bakola.

¹⁵ Weesambirenga irala abantu abo, era otaseetanga ye bali. Bakubenga bwa nkoone iwe weejiire.

¹⁶ Kuba tibasobola kutenduka okutoolaku nga bamaze kukola kibi; endoolo dhibabulira irala okutuusa nga bamaze okugwisa omuntu.

¹⁷ Kuba okukola ebibi n'okukola ebikolwa eby'obukambwe, kwabafuukira ng'oti n'emere ye balya, era ng'oti n'omwenge gwe banhwa.

¹⁸ Obulamu obw'abatuufu buli ng'oti ndhuba ku nkyo, etoolereza okuvaayo yaaja nga yeeyongera okwaka, okutuuka mu kasana ghagati.

¹⁹ Aye obulamu obw'abakozi ab'ebibi buli ng'oti nzikiiza egemye bedimudimu; ni bwe bagwa tibamanha na kye beekontoireku.

²⁰ Mwana wange, wulirisanga inho bye nkoba; era otenga inho omwoyo ku bye ndhogera.

²¹ Otabiganhanga kukuvaaku naire; bitenga ku mwoyo gwo.

²² Omuntu bw'abyagala bimugha obulamu, era bya muwonia ebimuluma mu mubiri.

²³ Weekuumenga inho by'odhuuba mu mwoyo gwo, kuba obulamu bwo bufugibwa ebyo ebikuli ku mwoyo.

²⁴ Otakobanga kintu kyonakyona kitali kituufu, era weesambirenga irala okwogera eby'obuguya.

²⁵ Amaiso galingirizenga mberi y'oli kuja, se ti kugalingirizanga mbali.

²⁶ Tegekanga by'oja okukola byonabyona, olwo ghabulenga ekisoba mu byonabyona by'onaakolanga.

²⁷ Tambulanga butereevu aghazira kudaaliimira eno n'ere; otaganhanga kigere kyo kuja mu ngira ya kukola bibi.