Ensambo 31 - Baibuli Ekibono kya Katonda 2014

Okugha kyabazinga amagezi

¹ Bino n'ebibono bya kyabazinga Lemueli ow'e Massa. Ebibono ebyo inhina n'eyabimwegeresa ng'akoba ati:

² “Iwe mwana wange, omwana eyanva mu nda. Omwana ye neeyama ye Katonda, wulirisa bukalamu.

³ Otamaliranga maani go ku bakazi waire okumalira ebibyo ku abo abazikiriza bakyabazinga.

⁴ Lemueli, bakyabazinga tibagwaniire kunhwa inho mwenge, oba okutwalirizibwa einho ebitamiiza ebika.

⁵ Bwe banhwa batyo basobola okwerabira amateeka, era baavuyavuya ebyo abatuntuzibwa bye bagwaniire okukolerwa.

⁶ Ebitamiiza ebika birekerenga oyo aja okufa, n'omwenge ogughenga oyo ali n'enaku embitirivu.

⁷ Abo leka banhwenga beerabirenga ku bizibu byaibwe, era balobenga kwidhukira nnaku yaibwe.

⁸ Yogererangagho abazira bwogereso era olwanirirenga abanhigirizibwa, babakolerenga nga bwe bagwaniire.

⁹ Boogererengagho, obasalirenga mu butuufu, era olwanirirenga ebyo abaavu n'abali mu bwetaavu bye bagwaniire okukolerwa.”

Omukazi ow'empisa enkalamu

¹⁰ Naani asobola okuzuula omukazi ow'empisa enkalamu? Omukazi oyo wa mughendo okusinga ebintu ebyakolebwa mu mabaale ag'omughendo.

¹¹ Iba amwesiga na mwoyo mulala, era talekera kumufunamu muganhulo.

¹² Buli kiseera akolera iba bikalamu byereere, era tamutuusaaku kabi koonakoona.

¹³ Anoonia obuviiri obw'entaama n'ewuuzi empegheevu, yaabirukamu engoye nga musangaavu.

¹⁴ Emere eya ghaka agitoola ghala, ng'oti n'amaato ag'abasuubuzi bwegatoola eby'okusuubula eghala.

¹⁵ Ava mu buliri nga bukaali na kukya bukalamu, okutegekera ab'omu maka ge eby'okulya, era yaagha abairu be abaguna emirimo.

¹⁶ Abona eitaka y'aligula, era yaakozesa empiiya dh'afuna yaasimbisa eisamba ery'emizabbibu.

¹⁷ Afungiza yaakola n'amaani, era yaakola n'emikono gye buli kiseera.

¹⁸ Abona omuganhulo oguli mu ebyo by'akola, era entaala ye obwire kumpi tezima olw'okukola einho.

¹⁹ Yeerangira mwene ewuuzi, era mwene yaadhirukamu engoye.

²⁰ Mwetegefu okugabira abaavu, n'okuyamba abali mu bwetaavu.

²¹ Ebiseera eby'ekiinhogogo tibimweraliikiriza, kuba ab'omu maka ge baba n'ebivaalo ebizito ebisuugha.

²² Yeekolera mwene emyebwiko, era yaavaala engoye empegheevu n'edha nakasooma.

²³ Iba aba mumanhifu mu kifo eky'olwekobaano ku mulyango ogwingira mu kibuga, ng'atyaime n'abakulembeze ab'omu kiketezo kye.

²⁴ Omukazi oyo atunga engoye empegheevu yaadhitunda yaakola ensibiro yaadhiguza abasuubuzi.

²⁵ Aba mumalirivu era wa kitiibwa, era ebiseera eby'omu maiso tibimweraliikiriza.

²⁶ By'ayogera bya magezi, era agalagira abantu n'ekivunika.

²⁷ Alabirira bukalamu eby'omu maka ge, era eby'obugayaavu abiziraku.

²⁸ Abaana be bamutendereza, n'iba yaamusaaka nga akoba ati:

²⁹ “Abakazi kamaala bakoze ebintu ebikalamu bingi, aye niiwe obasinga boonaboona.”

³⁰ Amaiso agasikiriza galimbalimba ababoni, n'obulungi bw'omuntu buwaagho aye omukazi atya Musengwa Katonda agwaniire okusaakibwa.

³¹ Oyo mumughenga ku bintu by'akolereire, era agwaniire okusaakibwanga mu kifo eky'olwekobaano ku mulyango ogwingira ekibuga.