Ensambo 30 - Baibuli Ekibono kya Katonda 2014

Aguru bye yayogera

¹ Bino n'ebibono bya Aguru mutabane wa Yake ow'e Massa, bye yakoba Ithieli ni Ukali, ati:

² “Bwenebwene ndi ng'oti nsolo busolo, nziramu kutegeera kwa buntu.

³ Tyegangaku magezi, waire okumanha ebifa ku Katonda.

⁴ Naani eyaali aniinieku mu igulu, n'aniinukayo n'aika ku nsi? Naani eyaali asoloizaaku empewo n'agigemera mu ngalo dhe? Naani eyaali azingiireku amaadhi mu kivaalo kye? Naani eyataagho ensalosalo ensi kw'ekoma? Eriina lye naani, era mutabane naani, bw'oba ng'oidhi?

⁵ Kiisi Katonda ky'akoba kiba kituufu, era Katonda oyo aba ngabo eri abo abamweyuna okubawonia.

⁶ Ku bibono bye otakookerangaku bibyo, olwo alobe kukubonereza na kwanika buguya bwo.

⁷ Wo Musengwa Katonda, nkusaba ebintu bibiri, obimpe nga nkaali kufa:

⁸ Mponia ebikyamu n'obuguya, era otampa kuba mwavu oba mukombe. Aye nkusaba ompenga eby'okulya bye neetaaga byonka.

⁹ Olwo ndobe kuba na bingi inho, okutuuka n'okukwegaana nti, ‘Musengwa Katonda naani?’ Oba bwemba omwavu ndobe kwiba na kuvumagania liina lyo iwe Katonda wange.

¹⁰ Otayogeranga kibi ku mugheereza ye musengwa we, olwo alobe kukukolimira na kukuleetera kubonerezebwa.

¹¹ Ghaligho abantu abakolimira baiseibwe, era abatasabira bainhaibwe nkabi.

¹² Ghaligho abeerowooza okuba abalongoofu, aye nga baidhwire bibi.

¹³ Ghaligho abeetwala okuba aba ghaigulu, era nga batwala abandi boonaboona okuba ghansi ghaibwe.

¹⁴ Abandi bakambwe inho, nga bali n'amaino ng'oti mpiima dheene, era ng'oti biso byene. Banhunhunta abaavu n'abaghafu kwenda bwa kubamaliriragho ku nsi.

¹⁵ Omudindiri guli n'abaana babiri, nga buli kiseera balira bati: ‘Mpa.’ Ghaligho ebintu bisatu oba bina ebitaiguta, era ni bino:

¹⁶ Amagombe, enda ey'omukazi omugumba, eitaka eikalu bekalukalu, n'omuliro ogutaiguta nku.

¹⁷ Amaiso g'oyo anhooma ise oba ag'oyo atagondera inhina, galimodhebwamu amakoova ag'omu nsiko, era gaaliibwa ensega.

¹⁸ Eriyo ebintu bisatu ebineewuunhisa ekibitiriire, mu butuufu biri bina ebiinema okutegeera, era ni bino:

¹⁹ Engeri enkookooma y'emanhamu engira mw'egulukira ku igulu, engeri omusota ye gumanha engira ye gubitamu ku lubaale, engira eryato ye libitamu mu nhandha ghagati, n'engeri omukwano ye gwidhamu ghagati agh'omusaadha n'omukazi.

²⁰ Eno n'enkola ey'omukazi omwenzi: bw'amala okwenda anaaba yeenhiriza, era yaakoba mule ati: ‘Ghazira kibi kye nkoze.’

²¹ Eriyo ebintu bisatu ebireetera ensi okutabulwa, mu butuufu biri bina ebirema ensi okuguminkiriza, era ni bino:

²² Omwiru okufuuka kyabazinga, n'omusiru okufuna buli ky'ayenda.

²³ Omukazi aziraku amwenda okufuna omusaadha, n'omwiru omukazi okwira mu kifo kya muka mwene wo.

²⁴ Ku nsi kuliku obutonde obutonioli buna, aye nga buli n'amagezi mangi inho, era ni buno:

²⁵ Obusimizi n'obuntu obuzira maani, aye bweyagalira emere mu biseera eby'omwero.

²⁶ Obuduuyu ti n'obw'amaani einho, aye bukola amaka gaabwo mu gabaalebaale

²⁷ Enzige dhizira kyabazinga, aye dhijiira mu bikunsu ng'oti baisirukale

²⁸ Omunha osobola okugugema mu ngalo dho, aye ogyagaana nga giri eyo mu bisaagaati bya bakyabazinga.

²⁹ Eriyo ebintu bisatu ebitambula n'osiima, mu butuufu biri bina ebitambula n'osigala ng'obyegomba, era ni bino:

³⁰ Empologoma, nga n'ensolo esinga dhoonadhoona amaani era ezira yindi y'esegulira.

³¹ Enkoko empanga etambula ng'eyemereiza oluyundhu, era n'embuzi enume, ni kyabazinga ng'ali n'eigye lye.

³² Bw'oba ng'okoze eky'obusiru ni weekuluntaza, oba n'otegeka okukola ekibi, sooka weekube mu kifuba obuuze omwoyo.

³³ Bw'osaadha amata muvaamu omuzigo, bw'onhigiriza enhindo muvaamu omusaayi, era bw'osiikuula obusungu muvaamu okusoola.”