Ensambo 3 - Baibuli Ekibono kya Katonda 2014

Amagezi agagheebwa abakaali abato

¹ Mwana wange, oteerabiranga bye nkwegeresa, era idhukiranga byonabyona bye nkulagira.

² Kuba bija kukuleetera okughangaala emyaka kamaala, era ebintu bikujiirenga bukalamu.

³ Otavanga ku buwulize na ku bwesigwa; bivaalenga ng'oti kinhere kya mu nkoto, era leka bikubenga ku mwoyo ng'oti bighandiike byaku.

⁴ Agho Katonda aidha kukusiimanga era n'abantu batyo, olwo oyetebwe ow'empisa enungi.

⁵ Weesigenga Musengwa Katonda n'omwoyo gwo gwonagwona, se ti kwesiga kutegeera kwo.

⁶ Idhukiranga nga Musengwa Katonda ali emberi wo okukugalagira mu byonabyona by'okola, era aidha kukutereekezanga by'okola byonabyona.

⁷ Iwe mwene oteebonanga ng'omugezi einho, aye tyanga Musengwa Katonda era weekuumenga obutakola bibi.

⁸ Agho oidha kuwonezebwanga mu mubiri obulwaire bwonabwona, era obenga n'amaani mu magumba.

⁹ Oghanga Musengwa Katonda ekitiisa ng'omugha ebisinga bulungi ku by'ofuna byonabyona, era ng'omugha ku byonabyona ebisooka okukungulwa eby'omu misiri gyo.

¹⁰ Memale olwo ebyagi byo biidhule emere, n'ebikunhiro byo eby'omwenge ogw'emizabbibu biidhule omwenge.

¹¹ Mwana wange, otanhoomanga Musengwa Katonda by'akugalagira, oba okwesinwa by'akuneniamu.

¹² Musengwa Katonda anenia oyo y'agonza, ng'omuzaire bw'anenia omwana ye yeesiimiramu.

¹³ Wa nkabi oyo ayagala era n'azuula amagezi, era wa nkabi oyo afuna okutegeera;

¹⁴ kuba amagoba g'afunamu gasinga g'afuna mu feeza, era omugaso gw'afunamu gusinga gw'afuna mu zaabu.

¹⁵ Amagezi ga mughendo inho okuwula amabaale ag'omughendo, era mu bintu byonabyona ebyegombebwa ezira kisobola kugeefaanaanirizaaku.

¹⁶ Amagezi galeetera omuntu okughangaala, gaamuleetera n'okuba omukombe era ow'ekitiisa.

¹⁷ Amagezi galeetera omuntu okuba mu bulamu obukalamu, era gaamuleetera okububaamu mu miraala.

¹⁸ Abafuna amagezi bafuna obulamu; abo abagagumiraku baba ba nkabi.

¹⁹ Musengwa Katonda yatonda ensi n'amagezi amangi, era yaakozesa okutegeera yaataagho eigulu n'ebiririku.

²⁰ Magezi ge n'agaleetera amaadhi okutiirikira ku nsi nga gava mu itaka, era gaaleetera n'ebire okutoonhesa ku nsi omusulo.

²¹ Mwana wange weegemenga ku magezi amatuufu ni kukukola ekigwaine, era otaganhanga bintu ebyo kukuvaaku.

²² Biidha kukuleetera okughangaala, era bikuleetere n'obulamu obweyagaza.

²³ Olwo oidha kutambulanga bukalamu mu ngira yo nga ghazira kikutiisa, era ekigere kyo tikiidhanga kwekontola naire.

²⁴ Bw'onalambaalanga tighaabengagho kikutiisa, era bw'onaatendukanga oidha kuwomerwanga endoolo dho.

²⁵ Toobenga na kweraliikirira kabi kukwidhira, waire okweraliikirira okuzikirira okukuzinduukiriza, ng'oti n'okwo okwidhira abakozi b'ebibi.

²⁶ Musengwa Katonda aidha kukugumyanga, era aidha kukukuumanga olobe kugwa mu mitego.

²⁷ Otalobanga kukolera muntu kirungi ky'agwaniire, kasita onaabanga ng'osobola okukikola.

²⁸ Otakobanga muntu kwira lwaidho, ng'ate ky'ayenda oli nakyo agho.

²⁹ Otategekanga kukola muntu mwino bubi, oyo aba agho okumpi n'iwe era ng'akwesiga.

³⁰ Otaniobananga na muntu bya bwereere nga ghazira kibi ky'akukoze.

³¹ Oteegombanga muntu akozesa bukambwe, era otasalangagho ku kujiira ku ngeri dhe.

³² Musengwa Katonda yeenhinhata omukozi w'ebibi, aye abeesimbu abeesiga.

³³ Musengwa Katonda akolimira ab'endhu edh'abakozi ab'ebibi, aye yaagha enkabi ab'endhu edh'abatuufu.

³⁴ Anhooma abo abeekuluntaza, aye abawombeefu abagemerwa ekivunika.

³⁵ Abagezi baligheebwa ekitiisa, aye abasiru balyeyongera kunhoomebwa.